Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxvj. Capittel.

¶ Dat erfdeel der stammen en sal niet ghemengt noch verandert worden.

1

⁺ ENde de Ouerste Vaderen vanden Gheslachte der kinderen Gilead, des Soons Machir, die Manasses sone was, vanden gheslachte der kinderen Ioseph, traden toe ende spraken voor Mose, ende voor de Vorsten vanden Ouersten vaderen der kinderen Israels, ende spraken:

+ A vers 1

2

^* Lieue Heere, de HEEre heeft gheboden, datmen dat Lant tot een erfdeel gheuen soude, metten Lote, den kinderen Israels.^† Ende ghy mijn Heere, hebt gheboden door den HEEre, datmen dat erfdeel Selaphehad, ons broeders sinen Dochteren gheuen sal.

* Num. 26.f.55

† Num. 27.a.7. Iosue. 15.d.18. 17.a.3.

3

Wanneer si yemandt wt den stamme Israels tot Wijuen neemt. Soo sal ons Vaders erfdeel minder worden, ende soo veel als si hebben, sal totten erfdeel comen, van dien stamme, daer si henen comen. Alsoo wort dat Lot onses erfdeels ghemindert.

4

Als dan nv dat Luytiaer der kinderen

[p. 65r]

Israels coemt, soo sal haer erfdeel totten erfdeele des stammes comen, daer si zijn. Alsoo werdt onses Vaders erfdeel vermindert, soo veel als si hebben.

5

⁺ Mose gheboot den kinderen Israels nae den beuele des HEEren, ende sprac: Den stamme der kinderen Iosephs heeft recht gesproken.

+ C vers 5

6

Dat ist dat de HEEre ghebiet den dochteren Selaphehads ende spreect:^† Laetse te houwelijc nemen soot hen belieft, alleen dat si houwen onder de geslachten vanden stamme haers vaders,

† Tob. 1.b.9. 7.c.15. 1.Cor. 7.d.39.

7

Op dat de Erfdeelen der kinderen Israels, niet en vallen vanden eenen stamme totten anderen.^† Want een yeghelijck onder de kinderen Israels, sal aenhanghen aen dat Erue vanden stamme zijns Vaders.

† 3.Reg. 21.a.3.

8

Ende alle dochteren die Erfdeel besitten, onder de stammen der kinderen Israels, sullen te houwelijc nemen, eenen vanden geslachte des stammes haers Vaders, op dat een yeghelijc onder de kinderen Israels, zijns Vaders erue behoude,

9

Ende geen erfdeel vanden eenen stamme en valle opten anderen: Maer een yeghelijc hanghe aen zijnder eruen, onder de stammen der kinderen Israels.

10

⁺ Ghelijck de HEEre Mosi gheboden hadde, soo deden de dochteren Selaphehads,

+ D vers 10

11

Mahela, Thirsza, Hagla, Milca ende Noa, ende namen te houwelijc de kinderen haerder Oomen,

12

Vanden gheslachte der kinderen Manasse, des soons Ioseph. Alsoo bleef haer erfdeel aen den stamme des geslachts haers Vaders.

13

Dat zijn de gheboden ende rechten, die de HEEre door Mose gheboot, den kinderen Israels, op der Moabiten Velt, aende Iordane teghen Iericho.

¶ Eynde des Vierden Boecx Mose.