Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiiij. Capittel.

¶ Dat lant Canaan wert wtghedeylt met sinen palen. Ende de namen worden ghetelt, der gheenre diet wtdeylen.

1

⁺ ENde de HEEre sprack met Mose, segghende:

+ A vers 1

2

Ghebiet den kinderen Israels, ende spreect tot hen: Als ghi int lant Canaan coemt, soo sal dat Lant, dat v tot eenen erfdeel valt, inden lande Canaan zijn palen hebben.

3

Den hoeck teghent zuyden sal beghinnen aen de woestijne Sin, by Edom, dat v Palen tegent zuyden zijn, vanden eynde vander souter zee, die teghent Oosten leyt.

4

Ende dat de selue palen reycken vanden Suyden, opwaerts na Acrabim, ende gaen door Sinna, ende haren wtganck vanden Suyden aen, tot Kades Bernea, ende reycken aen dat dorp Adar, ende gaen door Asmon,

5

Ende reycken van Asmon aen de beke Egypti, ende haer eynde sy aen de zee.

6

Maer de palen teghent Westen sullen dese zijn, te weten, de groote zee. Die sy uwe palen teghent Westen.

7

⁺ De palen teghent Noorden sullen dese zijn: Ghy sult meten van de groote zee, tot aen den berch Hor,

+ B vers 7

8

Ende vanden Berch Hor meten, tot datmen coemt te Hemath, dat haren wtganck sy de palen Sedada,

9

Ende des selfs palen sullen eynden te Siphron, ende haer eynde sy aen dat dorp Enam. Dat sullen v palen zijn teghent Noorden.

10

Ende ghy sult v meten, de palen tegent Oosten, van dat dorp Enan tot Sepham.

11

Ende de Palen sullen neder dalen, van Sepham

12

Na Ribla, tot Ain van Oostenwaers. Daer nae sullen si afgaen ende reycken op de side vander zee Chinereth, teghent Oosten, ende comen af aen de Iordane, dat haer eynde sy de soute zee. Dat sy v lant met sinen palen rontsom.

13

⁺ Ende Mose gheboot den kinderen Israels, ende sprac: Dat is dat lant, dat ghy metten lote onder v deylen sult, dat welcke de HEEre gheboden heeft, den negen stammen, ende den haluen stamme te gheuen.

+ C vers 13

14

^† Want den stamme der kinderen Ruben, des huys haers Vaders, ende den stamme der kinderen Gad, des huys haers Vaders, ende den haluen stamme Manasse, hebben haer deel ghenomen.

† Num. 32.f.33.

15

Alsoo hebben die twee stammen, ende den haluen stamme haer erfdeel wech, op dese side vander Iordanen, teghen Iericho, teghen dat Oosten.

16

⁺ Ende de HEEre sprac met Mose, segghende:

+ D vers 16

17

Dat zijn de^* namen der Mannen, die dlant onder v deylen sullen: De Priester Eleazar, ende Iosua Nuns sone.

* Deut. 3.e.28. Iosue. 14.a.1.

18

Daer toe suldy nemen eens yeghelijcx stams Vorsten, om dat lant wt te deylen.

19

Ende dat zijn dier Mannen namen: Caleb Iephunes sone vanden stamme Iuda.

20

Semuel Amihud sone vanden stamme Simeon.

21

Elidad Cislons sone vanden stamme BenIamin.

22

Buki Iagli sone, de Vorst vanden stamme der kinderen Dan.

23

Hanniel Ephods sone, de Vorst vanden stamme der kinderen Manasse, van Iosephs kinderen.

24

Kemuel Siphtan sone, de Vorst vanden stamme der kinderen Ephraims.

25

Elizaphan Parnachs sone, de Vorst vanden stamme der kinderen Sebulon.

26

Palthiel Asans sone, de Vorst vanden stamme der kinderen Isaschar.

27

Abihud, Selomi sone, de Vorst vanden stamme der kinderen Asser.

28

Pedahel Amihuds sone, de Vorst vanden stamme der kinderen Naphthali.

29

Dit zijn de ghene, die den HEERE gheboot, dat si den kinderen Israels dat erue wt deylen souden, int lant Canaan.