Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxij. Capittel.

¶ Hier wert Ruben, Gad, ende den haluen stamme Manasse, haer erfdeel bestelt aen dese zijde der Iordanen.

1

⁺ RVbens kinderen ende Gads kinderen,^* hadden seer veel vees, ende saghen dat lant Iaeser ende Gilead aen, voor bequame plaetsen voor haer vee,

+ A vers 1

* 1.Par. 6.a.9.

2

Ende quamen ende spraken tot Mosi ende totten Priester Eleazar, ende totten Vorsten der Menichten:

3

Dat lant Atroth, Dibon, Iaeser, Nimra, Hesbon, Eleale, Seban, Nebo ende Beon,

4

Dat de HEEre geslagen heeft voor de Menichte Israels, is bequaem totten vee, ende wy v knechten hebben vee.

5

Ende noch spraken si: Ist dat wy ghenade vonden hebben voor v, so geeft dit lant uwen knechten tot eyghen, soo en willen wy niet ouer de Iordane trecken.

6

Mose sprack tot hen: Sullen uwe broederen inden strijt trecken, ende ghy wilt hier blijuen?

7

Waerom maeckt ghy der kinderen Israels herten wederkeerich, dat si niet ouer en trecken int lant, dat hem de HEEre gheuen sal.

8

^+† Also deden ooc v vaderen, doen icse wt sant van Kades Bernea, om dat lant te besien.

+ B vers 8

† Num. 13.d.31.

9

Ende als si opwaerts ghecomen waren tot aen die beke Escol, ende saghent lant, maecten si dat herte der kinderen Israels wederkeerich, dat si niet en wilden in dat lant, dat hen de Heere gheuen wilde.

10

^† Ende des HEEren toren vergramde ter seluer tijt, ende swoer, ende sprack:

† Nu. 14.d.28.

11

Dese lieden, die wt Egipten ghetrocken zijn, van twintich iaren ende daer ouer, die en sullen dat lant niet sien, dat ic Abraham, Isaac, ende Iacob ghesworen heb, om dat si my niet trouwelijc na geuolcht en hebben,

12

Wtgenomen Caleb Iephune des Kenesiters sone, ende Iosua Nuns sone: Want si hebben den HEEre trouwelijck na gheuolcht.

13

Also vergramde des HEEren toren op Israel, ende lietse hier ende daer in de woestijne trecken veertich iaer, tot dat al dat geslachte was vergaen, dat quaet ghedaen had voor den HEEre.

14

⁺ Ende siet, ghy zijt opghetreden in uwer vaderen stede, dat der Sondaers des te meer zijn, ende ghy oock des toorens ende der gramschappen des HEEren, noch meer maect teghen Israel.

+ C vers 14

15

Want ist dat ghy v van hem keert, so sal hijse oock noch langer in de woestijne laten. Ende ghi sult alle dit volc verderuen.

16

Doen traden si toe, ende spraken: Wy willen hier slechts Schaepshutten bouwen voor onse vee, ende steden voor onse kinderen.

17

^† Maer wy willen ons toerusten voor aen, voor de kinderen Israels, tot dat wijse brengen in haer Steden. Onse kinderen sullen in de besloten steden blijuen, om de inwoonders wille des lants.

† Iosu. 4.c.12.

18

Wy en willen niet weder thuys keeren, tot dat de kinderen Israels innemen, een yeghelijck zijn erue.

19

Want wy en willen niet met hen eruen, op dander side des Iordaens. Maer onse Erue sal op dese side des Iordaens, teghen het Oosten gheuallen zijn.

20

^+* Mose sprac tot hen:^† Ist dat ghi dat doen wilt, dat ghy v rustet totten strijdt voor den HEEre,

+ D vers 20

* Deut. 3.c.18.

† Iosu. 1.c.13. 4.c.12.

21

Soo trect ouer de Iordane voor den HEEre, wie dat onder v toegerust is, tot dat hy zijn vianden wtdrijue, van sinen aensichte,

22

Ende dat lant onderdaen worde voor den HEEre. Daer nae suldy omkeeren, ende ontschuldich zijn den HEEre ende voor Israel, ende sult dit lant alsoo hebben tot eyghen voor den HEEre.

23

Maer ist dat ghy so niet doen en wilt, siet, so suldy v besondighen aen den HEEre, ende sult uwer sonde ghewaer worden, als si v vinden sal.

24

So timmert nv Steden voor v kinderen, ende Hutten voor v vee, ende doet wat ghy gheseyt hebt.

25

⁺ De kinderen Gad ende de kinderen Ruben spraken tot Mose: Vwe knechten sullen doen, soo mijn Heere gheboden heeft.

+ E vers 25

26

Onse kinderen, wijuen, haue, ende al ons vee, sullen in de steden Gilead zijn.

27

Maer wy uwe knechten, willen alle gherustet totten Heyre, inden strijdt trecken voor den HEEre, so mijn Heere gesproken heeft.

28

Doen gheboot Mose van haren tweghen den Priester Eleazar, ende Iosua Nuns sone, ende den Ouersten vaderen der stammen der kinderen Israels,

29

Ende sprack tot hen:^† Als Gads kinderen ende Rubens kinderen, met v ouer de Iordane trecken, alle gherustet totten strijde voor den HEEre, ende dat Lant v onderdaen is, soo gheeft hen dat lant Gilead tot eygen.

† Iosu. 4.c.12.

30

Maer en trecken si niet met v toegherust, soo sullen si met v eruen int lant Canaan.

31

De kinderen Gad ende de kinderen Ruben antwoorden, ende spraken:⁺ Soo de HEEre spreect tot uwen knechten, so willen wy doen.

+ F vers 31

32

Wy willen gerustet trecken voor den HEEre, int lant Canaan, ende onse erfgoet besitten op dese side des Iordaens.

33

^† Alsoo gaf Mose den kinderen Gad, ende den kinderen Ruben, ende den haluen stamme Manasse des soons Ioseph, dat conincrijc Sihon, des Conincx der Amo-

† Deut. 3.b.12. Iosu. 22.a.1. 12.b.8.c.15.

[p. 63v]

riten, ende dat conincrijc Og des Conincx tot Basan. Dat landt metten Steden in alle de Palen rontsom.

34

Doen timmerden Gads kinderen, Dibon,

35

Ataroth, Aroer, Atroth, Sophan, Iaseer, Iegabea,

36

Bethnimra ende Betharan, besloten steden, ende schaepshutten.

37

Rubens kinderen timmerden Hesbon, Eleale, Kariathaim.

38

Nebo, BaalMeon, ende veranderden de namen, ende Sibama, ende gauen den steden Namen die si timmerden.

39

^* Ende de kinderen Machir des soons Manasse ghinghen in Gilead, ende wonnent, ende verdreuen de Amoriten die daer in waren.

* Gen. 50.d.22.

40

Doen gaf Mose dien Machir den sone Manasse, Gilead, ende hy woonde daer in.

41

Maer Iair Manasses sone ghinck henen, ende wan haer dorpen, ende hietse Hauoth Iair.

42

Nobah ghinck henen, ende wan Knath met haer Dochteren. Ende hy hietse Nobah, nae sinen naem.