Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxj. Capittel.

¶ Vanden strijt tegen de Midianiten ende van de victorie Israels, ende deylinghe der bueten ende roofs.

1

⁺ ENde de HEEre sprack met Mose, segghende:

+ A vers 1

2

Doet^* wrake voor de kinderen Israels, ouer de Midianiten, dat ghy v daer nae vergadert tot uwen volcke.

* Num. 25.c.16.

3

Doen sprac Mose metten volcke, ende seyde: Rustet onder v lieden, totten heyre tegen de Midianiten,

4

Wt elcken stamme duysent, dat si den HEEre wraeck doen ouer de Midianiten,

[p. 62v]

dat ghy wt allen stammen Israels in dat heyr seyndet.

5

Ende si namen aen wt de duysenden Israels, duysent wt elcken stamme, twaelf duysent gherust ten heyre.

6

Ende Moses santse met Pinehas, Eleazar des Priesters sone int heyr, ende de heylighe cleederen, ende de gheluyt Trompetten in zijn hant.

7

^* Ende si leyden dat heyr teghen de Midianiten, so de HEEre Mose gheboden had, ende verworchden al wat manlijck was.

* Iosu. 13.c.21.

8

Daer toe de Coninghen der Midianiten verworchden si tsamen met haren verslaghenen, namelijcken, Eui, Rekem, Sur, Hur, ende Reba, de vijf Coningen der Midianiten.^† Bileam, Beors sone verworchden si ooc metten sweerde.

† 2.Pet. 2.c.16. Iosu. 13.c.22.

9

⁺ Ende de kinderen Israels namen gheuanghen der Midianiten wijuen, ende haer kinderen, alle haer vee, alle haer haue, ende si roofden alle haer goeden:

+ B vers 9

10

Ende verbranden metten viere alle haer steden haerder wooninghen, ende alle Borchten.

11

^* Ende namen alle den roof, ende al wat te nemen was, beyde menschen ende Vee,

* Deut. 20.b.14 1.Reg. 30.d.20

12

Ende brachtent tot Mose ende tot Eleazar den Priester, ende totter Menichten der kinderen Israels, te weten, de gheuanghen ende dat ghenomen Vee, ende dat gherooft goet inden Legher, opter Moabiten velt, dat aen de Iordane leyt tegen Iericho.

13

^† Ende Mose, ende de Priester Eleazar, ende alle de Vorsten der Menichten, ghinghen hen te ghemoet, buyten den Legher.

† Gen. 14.c.17.

14

Ende Mose werdt toornich op de hooftlieden des heyrs, de welcke hooftlieden ouer duysent, ende hondert waren, die daer wt den heyr ende strijde quamen,

15

Ende sprack tot hen: Waerom hebdy alle vrouwen laten leuen?

16

⁺ Siet,^* en hebben si niet de kinderen Israels, door Bileams raet afghekeert, dat si sondichden teghen den HEEre aen Peor, ende daer quam ouer de Menichte des HEEren een plaghe:

+ C vers 16

* Num. 25.a.1. Apoca. 2.c.14

17

^† Soo verworcht nv al watter manlijck is onder den kinderen, ende alle wijuen, die eenen man bekent, ende by gheleghen hebben.

† Iudi. 21.b.11.

18

Maer al de kinderen, die van wijfs name zijn, ende geenen man bekent, noch by gheleghen en hebben, die laet voor v leuen.

19

^† Ende leghert v seuen daghen buyten den Legher, alle die yemandt verworcht, oft die verslaghene aengheroert hebben, dat ghy v ontsondighet, inden derden, ende seuenden daghe, met den ghenen die ghi gheuanghen ghenomen hebt.

† Num. 19.b.11.

20

Ende alle cleederen, ende alle ghereetschap van vellen, ende alle pelswerck, ende alle houten vaten suldy ontsondighen.

21

⁺ Ende Eleazar de Priester sprack tot dat krijschvolck, dat inden strijt ghetrocken was: Dat is de Wet, welcke de HEEre Mose geboden heeft:

+ D vers 21

22

Gout, siluer, metael, ijser, ten, loot,

23

Ende al wat dat vier lijdt, suldy door tvier laten gaen, ende reynigen, dattet metten Besprengwater ontsondicht worde. Maer al tghene, dat tvier niet ghelijden en can, dat suldy door twater laten gaen,

24

Ende sult v cleederen wasschen ten seuenden daghe, soo wordy reyn. Daer na suldy inden Legher comen.

25

Ende de HEEre sprack met Mose, ende seyde:

26

^† Neemt de somme des roofs der gheuanghenen, beyde aen menschen ende Vee, ghy ende de Priester Eleazar ende de ouerste vaderen der Menichten.

† Deut. 20.b.14 Iosu. 8.f.27. 2.Mac. 8.c.28.

27

Ende gheeft de helft den ghenen die wtghetogen zijn int Heyr, ende den slach ghedaen hebben,

28

Ende dander helft der Menichten. Ende ghy sult den HEEre Heffen, vanden crijschlieden, die int heyr getrocken zijn, vanden vijf honderden een siele, beyde aen menschen, runderen, Ezelen ende schapen.

29

⁺ Van haerder helft suldijt nemen, ende den Priester Eleazar geuen, tot een Heffinghe den HEERE.

+ E vers 29

30

Maer vander helft der kinderen Israels, suldy nemen vanden vijftighen een stuck goets, beyde aen menschen, runderen, ezelen ende schapen, ende van alle vee, ende sullet den Leuiten gheuen, die de Wacht waernemen der Wooninghe des HEEren.

31

Ende Mose ende Eleazar de Priester, deden so de HEEre Mosi geboden had.

32

Ende den ouerblijuenden buet, die dat Crijschvolck gherooft had, was sesmael hondert ende vijfentseuentich duysent schapen,

33

Tweentseuentich duysent Runderen,

34

Eenentsestich duysent Ezelen.

35

Ende de Wijfs persoonen, die gheen mans bekent noch by gheleghen en hadden, tweendertich duysent sielen.

36

⁺ Ende de helft, die den ghenen, die int heyr getrocken waren, toebehoorde, was inden getale drie hondert mael ende seuenendertich duysent, ende vijf hondert Schapen.

+ F vers 36

37

Daer af quamen den HEEre ses hondert ende vijfentseuentich schapen.

38

Item sessendertich duysent Runderen, daer af quamper den HEEre tweentseuentich.

39

Item dertich duysent ende vijf hondert Ezelen, daer af quamper den HEEre eenentsestich.

40

Item menschen sielen, sesthien duysent sielen, daer af quamender den HEEre tweendertich.

41

Ende Mose gaf sulcke Heffinghe des HEEren, den Priester Eleazar, soo hem de HEEre gheboden had.

42

Maer dander helft, die Mose den kinderen Israels toe deylde, vanden Crijchslieden (te weten) de helft der Menichten toecomende,

43

⁺ Was ooc drie hondert mael ende seuenendertich duysent ende vijf hondert scapen,

+ G vers 43

44

Sessendertich duysent runderen,

45

Dertich duysent ende vijf hondert Ezelen,

46

Ende sesthien duysent menschen sielen.

47

Ende Mose nam van deser helft der kinderen Israels, oock dat vijftichste stuck, beyde van vee ende van menschen, ende gaft den Leuiten, die de wacht bewaerden aen de Wooninge des HEEren, alsoo den HEEre Mose gheboden hadde.

48

Ende de hooftlieden ouer de duysenden des crijschvolcx, te weten die ouer duysent ende ouer hondert waren, traden henen tot Mose,

49

Ende spraken tot hem: V

[p. 63r]

knechten hebben de Somme ghenomen der crijschlieden, die onder onse handen gheweest zijn, ende daer en ghebreect niet een.

50

⁺ Daerom brengen wy den HEEre ghiften. Al wat een yeghelijck vonden heeft, van gulden ghereetschap, ketenen, armringhen, ringhen, oorringen, ende spanselen, op dat onse sielen versoent worden voor den HEERE.

+ H vers 50

51

Ende Mose nam van hen, metten Priester Eleazar, dat gout van alderley iuweelen.

52

Ende alles gouts Heffinghe, dat si den HEEre Hieuen, was sesthien duysent, ende seuenenhondert ende vijftich Sikels, vanden Hooftlieden ouer duysent ende hondert.

53

Want de crijchslieden hadden gherooft, een yeghelijck voor hem seluen.

54

Ende Mose met Eleazar den Priester, nam dat gout, vanden Hooftlieden ouer duysent ende hondert, ende brachtent in de Hutte des ghetuychenis, tot een ghedachtenisse den kinderen Israels voor den HEEre.