Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxx. Capittel.

¶ Van de gheloften die van man ende vijf ghedaen worden.

1

⁺ ENde Mose sprack metten Vorsten der stammen der kinderen Israels, ende seyde:

+ A vers 1

2

Dat ist, dat de HEEre gheboden heeft.

3

^† Als yemandt den HEEre eenighe belofte doet, oft eenen eedt sweert, dat hy zijn siele verbint, die en sal zijn woort niet crencken: Maer salt al doen, alsoot wt sinen monde ghegaen is.

† Deut. 23.d.21.

4

Als eens wijfs name den HEERE een gheloofte doet, ende haer verbint, als si noch in haers vaders huys, ende noch int Maechdom is,

5

Ende haer ghelofte, ende verbont, dat si ouer haer siele doet, coemt voor haren vader, ende swijcht hy daer stille toe, soo ghelt al haer ghelofte, ende alle verbont, daer si haer siele mede verbonden heeft.

6

Maer ist dattet haer haer vader belet, in dien daghe als hijt hoort, soo en ghelt gheen gelofte noch verbont, daer mede si haer ouer haer siele verbonden heeft. Ende de HEEre sal haer ghenadich zijn, om dattet haer vader haer belet heeft.

7

⁺ Maer heeft si eenen man, ende heeft op haer een gelofte, oft ontuaert haer wt haren lippen een verbont ouer haer siele,

+ B vers 7

8

Ende de man hooret, ende swijcht in dien seluen daghe stille, soo ghelt haer gelofte ende verbindinghe, daer si haer siele mede verbonden heeft.

9

Maer ist dattet haer haren man belet, dien dach, als hijt hoort, so is haer gelofte los, die si op haer heeft, ende die verbindinghe die si wt haren lippen heeft laten gaen, ouer haer siele, ende de HEEre sal haer genadich zijn.

10

De ghelofte eender weduwen ende verstootene, al dat, waer mede si haer verbinden ouer haer sielen, dat ghelt op haer.

11

Als yemants huysghesin wat gelooft, oft hem verbint met eenen eedt ouer zijn siele,

12

Ende de huysheere hooret, ende swijcht daer toe stille, ende en keeret niet, so is alle de ghelofte van weerden, ende al tghene daer mede het hem verbonden heeft.

13

Maer ist dattet de Huysheere los maect dien dach, als hijt hoort, soo en ist niet van weerden, wat wt sinen lippen ghegaen is, dat het belooft, oft daert hem ouer zijn siele mede verbonden heeft.⁺ Want de Huysheere heuet los ghemaeckt, ende de HEEre sal hem ghenadich zijn.

+ C vers 13

14

Ende alle beloften ende eeden, daermen mede verbint, om dat lijf te castijen, mach de Huysheere beuestighen oft crencken,

15

Also: Wanneer hy daer stille toe swijghet vanden eenen daghe totten anderen, so beuesticht hy, alle zijn gheloften ende verbindinghen diet op hem heeft, om dat hy in dien daghe ghesweghen heeft, doen hijt hoorde.

16

Maer ist dat hijt crencken sal, nae dat hijt ghehoort heeft, soo sal hy de misdaet draghen.

17

Dat zijn de settinghen die de HEEre Mose gheboden heeft, tusschen den man ende dat wijf, tusschen den Vader ende de dochter, de wijle als si noch maecht is, in haers vaders huys.