Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxviij. Capittel.

¶ Eenen yeghelijcken tijt wort haren offer bestelt.

1

⁺ ENde de HEEre sprack met Mose, segghende:

+ A vers 1

2

Ghebiet den kinderen Israels ende segt tot hen: Den offer mijns broots, dat welcke mijn offer is des soeten ruecx, suldy houden tzijnder tijt, dat ghijt my offert,

3

Ende segt tot hen:^† Dat zijn de offerhanden, die ghy den HEEre offeren sult. Iarighe lammeren, die sonder smette zijn, daghelijcx twee totten dagelijcxschen Brantoffer,

† Exo. 29.g.38. 1.Esd. 3.a.3. Hebr. 9.a.6.

4

Dat een lam des smorghens, dat ander aen den Auont.

5

Daer^† toe een thienden Epha Semelmeels, totten Spijsoffer, met olie ghemengt, die gestooten is, van een vierendeel van een Hin.

† Num. 15.a.4.

6

Dat is een dagelijcx Brandtoffer dat ghy offerde aen den Berch Sinai, tot eenen soeten rueck, een vier den HEEre.

7

Daer toe sinen Drancoffer, tot elcken lamme, een vierendeel van een Hin.

8

Int Heylichdom salmen den wijn des Drancoffers offeren den HEEre. Dat ander lam suldy ontrent den Auont maken, ghelijck dat Spijsoffer des morghens, ende sinen Drancoffer totten offer des soeten ruecx den HEEre.

[p. 61v]

9

⁺ Maer opten Sabbath dach twee iarighe lammeren sonder ghebreck, ende twee thienden Semelmeels tot eenen Spijsoffer, met olie ghemengt, ende sinen Drancoffer.

+ B vers 9

10

Dat is dat Brantoffer, van elcken Sabbath, bouen dat dagelijcx Brantoffer met sinen Dranckoffer.

11

Maer inden eersten daghe, van uwen maenden suldy den HEEre een Brandtoffer offeren: twee ionghe Ossen, eenen Ram, seuen iarige lammeren sonder smette,

12

Ende ooc drie thienden Semelmeels tot eenen Spijsoffer, met olie ghemengt, tot eenen Osse. Ende twee thienden Semelmeels tot eenen Spijsoffer, met olie ghemengt, tot eenen Ram.

13

Ende ooc een thienden Semelmeels, totten Spijsoffer, met olie ghemengt, tot eenen lamme. Dat is dat Brandtoffer des soeten ruecx, een offer den HEEre.

14

⁺ Ende haer Drancoffer sal zijn een halue Hin wijns, tot eenen Osse, een derdendeel Hin, tot den Ramme: Een vierendeel Hin, tot den lamme. Dat is dat Brantoffer van elcker maent des iaers.

+ C vers 14

15

Daer toe salmen eenen geyten bock tot eenen Sondoffer den HEEre maken, bouen dat daghelijcx Brantoffer, ende sine Dancoffer.

16

Maer inden^* veerthiensten dage der eerster maent, Is dat Paesschen des HEEren,

* Exod. 12.a.6. Leuit. 23.a.5. Deut. 16.b.6.

17

Ende inden vijfthienden dage der seluer maent, ist feeste.^† Seuen daghen salmen ongesuert broot eten.

† Exo. 23.b.15.

18

Den eersten dach sal heylich heeten, dat ghy te samen coemt. Gheen dienstwerck en suldy daer in doen,

19

^* Ende sult den HEEre Brantoffer doen, twee ionge Ossen, eenen Ram, Seuen iarige lammeren sonder smette,

* Leuit. 23.c.18.

20

Met haren Spijsofferen, Drie thienden [deel] Semelmeels, met olie gemengt, tot eenen Osse, en twee thienden [deelen] totten Ram, ende een thienden [deel]

21

Op elc lam, onder de seuen lammeren.

22

Daer toe eenen boc tot een Sondoffer, datmen v versoene.

23

⁺ Ende sult sulcx tsmorghens doen, bouen dat Brantoffer, dat een dagelijcx Brantoffer is.

+ D vers 23

24

Nae dese wijse suldy alle dage seuen dagen lanck, dat broot offeren, tot een offer des soeten ruecx den HEEre, totten daghelijcxschen Brantoffer, daer toe zijn Drancoffer.

25

Ende den seuensten dach sal bi v heylich heeten, dat ghy te samen coemt, gheen dienstwerc en suldy daer in doen.

26

Ende den dach der eerstelinghen, als ghy den HEEre dat nieuwe Spijsoffer offert, als uwe weken om zijn, sal v heylich heeten dat ghy te samen coemt, gheen dienstwerck en suldy daer in doen.

27

^† Ende sult den HEEre Brandtoffer doen, tot eenen soeten rueck, Twee ionge Ossen, eenen Ram, seuen iarighe lammeren,

† Leuit. 23.c.18.

28

Met haren Spijsofferen, drie thienden Semelmeels, met olie gemengt, tot eenen Osse, twee thienden totten Ram,

29

Ende een thienden tot elck lam der seuen lammeren,

30

Ende eenen geyten bock, om v te versoenen. Dit suldy doen, behaluen dat daghelijcx Brantoffer, met sinen Spijsoffer: Sonder smette salt zijn, Daer toe haren Drancoffer.