Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvij. Capittel.

¶ Wat de verlaten dochteren beeruen sullen daer gheen soon en is. Iosua wordt in Moses plaetse gheordineert tot eenen hooftman des volcx.

1

⁺ ENde de dochteren^* Selaphehad, des soons Hepher, des soons Gilead, des soons Macher, des soons Manasse, onder de ghessachten Manasse, des soons Ioseph, met namen^† Mahela, Noa, Hagla,

+ A vers 1

* Num. 26.d.33

† Iosu. 17.a.3.

2

Milca ende Thirza, quamen ende traden voor Mose, ende voor Eleazar den Priester, ende voor de Vorsten, ende de gantsche Menichte, voor de duere der Hutten des ghetuychenis, ende spraken:

3

Onse vader is ghestoruen in de woestijne,^* ende en was niet mede onder de Menichte, die hem teghen den HEEre verhieuen, inde Rotte Korah. Maer hi is in zijn sonden ghestoruen, ende en hadde gheen sonen.

* Num. 16.a.1.

4

Waerom soude ons Vaders naem dan onder gaen in sinen gheslachte, al en heeft hy gheenen sone? Gheeft ons oock een goet, onder ons Vaders broederen.

5

Mose bracht haer sake voor den HEEre.

6

Ende de HEEre sprack tot hem:

7

Selaphehads dochteren hebben recht ghesproken.^* Ghy sult haer oock een erfgoet gheuen onder haers vaders broederen, ende ghy sult haers vaders erue tot haer keeren.

* Num. 36.a.2.

8

⁺ Ende segt den kinderen Israels: Als yemant sterft sonder sonen, so suldy zijn erue sinen dochteren toekeeren.

+ B vers 8

9

En heeft hy geen dochteren, so suldijt sinen broederen geuen.

10

En heeft hy gheen broeders, so suldijt sinen Ooms geuen.

11

En heeft hy gheen Ooms, so suldijt sinen naesten vrienden geuen, die hem aengaen, in sinen gheslachte, dat zijt^† aenueerden, dat sal den kinderen Israels een Wet ende een recht zijn, soo de HEEre Mose gheboden heeft.

† Innemen.

12

⁺ Ende de^* HEEre sprac tot Mose: Climt op dat geberchte Abarim, ende besiet dat lant dat ick den kinderen Israels gheuen sal.

+ C vers 12

* Deut. 1.f.37. 3.e.27. 34.a.1. Num. 20.d.12

13

Ende als ghijt ghesien hebt, so suldy v vergaderen tot uwen volcke, ghelijc uwe broeder Aaron vergadert is.

14

De wijle ghy mijnen woorde ongehoorsaem geweest zijt in de woestijne Sin, om dat ghekijf der Menichten, doen ghy my heylighen soudt, door dat water voor hen.^* Dat is dat kijfwater tot Kades in de woestijne Sin.

* Exod. 17.b.7. Num. 20.b.13.

15

Ende Mose sprac metten HEEre segghende:

16

De HEEre, de God ouer alle leuendige vleesch, wille doch eenen man setten ouer de Menichte,

17

Die voor hen wt ende in gae, ende diese wt ende in leyde, dat de Menichte des HEEren niet en sy, als de schapen sonder Herdere.

18

Ende de HEEre sprac tot Mose.^† Neemt Iosua tot v Nuns soon, die een man is, daer den gheest in is, ende legt uwe handen op hem,

† 1.Mac. 2.f.55.

19

⁺ Ende stelt hem voor den Priester Eleazar, ende voor de gantsche Menichte.

+ D vers 19

20

Ende ghebiet hem voor haren ooghen, ende legt uwe heerlijcheyt op hem, dat hem hoore de gantsche Menichte der kinderen Israels.

21

Ende hy sal treden voor den Priester Eleazar, die sal voor hem raet vraghen, door de wijse des LICHTS voor den HEEre. Nae des selfs mont sullen si wt ende in trecken, beyde hy, ende alle de kinderen Israels met hem, ende de gantsche Menichte.

22

Mose dede soo hem de HEEre gheboden hadde, ende nam Iosua, ende stelde hem voor den Priester^* Eleazar, ende voor de gantsche Menichte,

* Actu. 1.d.26. 6.a.6. Deut. 34.c.9.

23

Ende leyde zijn hant op hem, ende gheboot hem, soo de HEEre met Mose ghesproken hadde.