Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvj. Capittel.

¶ Dat volck wort weder ghetelt ende ghemonstert wat strijtbaer is.

1

⁺ ENde de HEEre sprack tot Mose, ende Eleazar, des Priesters Aarons soon:

+ A vers 1

2

^† Neemt de somme der gantscher Menichten der kinderen Israels, van twintich iaren, ende daer ouer, nae haerder Vaderen huysen, alle die int Heyr trecken moghen in Israel.

† Exo. 30.b.12. Num. 1.a.2.

3

Ende Mose sprack met hen, tsamen met Eleazar den Priester, int velt der Moabiten aen de Iordaen teghen Iericho,

4

Die twintich Iaer oudt waren, ende daer ouer, so de HEEre Mose geboden had, ende de kinderen Israels, die wt Egypten ghetrocken waren.

5

Ruben de yersteghebooren Israels.^† Maer Rubens kinderen waren, Hanoch, vanden welcken dat geslachte der Hanochiten coemt: Pallu, van den welcken dat gheslacht der Palluiten coemt:

† Gen. 46.b.8.

6

Hesron, van welcken dat geslacht der Hezroniten coemt: Charmi, van welcken dat gheslacht der Charmiten coemt:

7

Dit zijn de gheslachten van Ruben. Ende haer ghetal was drieenveertich duysent, seuen hondert, ende dertich.

8

⁺ Maer Pallu kinderen, waren Eliab.

+ B vers 8

9

Ende Eliabs kinderen, waren Nemuel ende Dathan, ende Abiram.^* Dat is de Dathan ende de Abiram, die vermaerste inder Menichten, die hen tegen Mose ende Aaron verhieuen, in de Rotte Korach doen si tegen den HEEre opstonden.

* Num. 16.a.1.

10

Ende de Aerde haren mondt op dede, ende verslindese met Korach, doen de Rotte sterf, doen dat vyer twee hondert ende vijftich mannen verslinde, ende werden een teeken.

11

Maer Korahs kinderen en storuen niet.

12

Symeons kinderen in haren^* gheslachten, waren Nemuel, daer af coemt dat gheslachte der Nemueliten: Iamin, daer af coemt dat geslachte der Iaminiten: Iachin, daer af coemt dat gheslachte der Iacheniten:

* 1.Par. 5.a.1.

13

Serah, daer af coemt dat gheslacht der Serahiten: Saul, daer af coemt dat gheslacht der Sauliten,

[p. 60v]

14

Dat zijn de gheslachten van Simeon tweentwintich duysent ende twee hondert.

15

Gad kinderen in haren gheslachten, waren Siphon, daer af coemt dat gheslachte der Siphoniten: Haggi, daer af coemt dat gheslachte der Haggiten: Suni, daer af coemt dat gheslachte der Suniten:

16

Osni, daer af coemt dat geslachte der Osniten: Eri, daer af coemt dat geslacht der Eriten:

17

Arod, daer af coemt dat gheslacht der Aroditen: Ariel, daer af coemt dat gheslachte der Arieliten.

18

Dat zijn de gheslachten der kinderen Gad, inden ghetale, veertich duysent ende vijf hondert.

19

⁺ Iuda kinderen^† Ger ende Onan, de welcke beyde storuen int lant Canaan.

+ C vers 19

† Gen. 38.a.3.

20

Maer de kinderen Iuda in haren geslachten, waren, Sela, daer af coemt dat gheslachte der Selaniten: Perez, daer af coemt dat geslacht der Pereziten: Serah, daer af coemt dat geslachte der Serahiten.

21

Maer Perez kinderen, waren Hezron, daer af coemt dat gheslachte der Hezroniten: Hamuel, daer af coemt dat geslachte der Hamueliten.

22

Dat zijn de gheslachten Iuda, inden getale sessentseuentich duysent ende vijf hondert.

23

Isaschars kinderen in haren geslachten, waren, Thola, daer af coemt dat geslachte der Tholaiten: Phuwa, daer af coemt dat geslachte der Phuaiten:

24

Iasub, daer af coemt dat gheslachte der Iasubiten: Simron, daer af coemt dat gheslachte der Simroniten.

25

Dat zijn Isaschars gheslachten, inden getale vierentsestich duysent drie hondert.

26

Sebulon kinderen in haren gheslachten, waren Sared, daer af coemt dat geslachte der Sarditen: Elon, daer af coemt dat gheslachte der Eloniten: Iahelel, daer af coemt dat geslachte der Iaheliten.

27

Dat zijn Sebulons gheslachten in haren ghetale tsestich duysent, ende vijfhondert.

28

⁺ Iosephs kinderen in haren gheslachten, waren Manasse ende Ephraim.

+ D vers 28

29

^† Maer de kinderen Manasse, waren Machir, daer af coemt dat geslachte der Machiriten. Machir wan oock Gilead, daer af coemt dat gheslachte der Giliaditen.

† Iosu. 17.a.1.

30

Ende dit zijn Gileads kinderen: Hieser, daer af coemt dat geslachte der Hieseriten: Helek, daer af coemt dat geslachte der Helekiten:

31

Asriel, daer af coemt dat gheslachte der Asrieliten: Sichem, daer af coemt dat geslacht der Sichimiten:

32

Smida, daer af coemt dat geslacht der Smiditen: Hepher, daer af coemt dat gheslachte der Hepheriten.

33

^† Maer Selaphehad was Hephers soon, ende hadde gheen soonen, maer dochteren, die hieten: Mahela, Noa, Hagla, Milca ende Thirza,

† Num. 27.a.1. 1.Par. 8.b.15.

34

Dat zijn Manasses geslachten in haren getale tweenvijftich duysent ende seuen hondert.

35

Ephraims kinderen in haren geslachten, waren, Suthelah, daer af coemt dat geslachte der Suthelahiten: Becher, daer af coemt dat gheslachte der Becheriten, Thahan, daer af coemt dat geslachte der Thahaniten.

36

Maer Suthelah kinderen, waren, Eram, daer af coemt dat gheslachte der kinderen Eraniten.

37

Dat zijn de gheslachten der kinderen Ephraim in haren ghetale tweendertich duysent, ende vijf hondert. Dat zijn Iosephs kinderen in haren gheslachten.

38

⁺ BenIamins kinderen in haren geslachten waren, Bela, daer af coemt dat geslachte der Belaiten: Asbel, daer af coemt dat geslachte der Asbeliten: Ahiram, daer af coemt dat gheslachte der Ahiramiten:

+ E vers 38

39

Supham, daer af coemt dat geslachte der Suphamiten: Hulpham, daer af coemt dat gheslachte der Huphamiten.

40

Ende Bela kinderen, waren, Ard, ende Naeman, daer af coemt dat gheslachte der Arditen, ende Naemaniten.

41

Dat zijn BenIamins kinderen in haren gheslachten, inden getale vijfenveertich duysent, ende ses hondert.

42

De kinderen Dan in haren gheslachten, waren Suhan, daer af coemt dat geslachte der Suhaniten. Dat zijn die gheslachten Dan, in haren geslachten,

43

Ende waeren alle te samen inden ghetale vierentsestich duysent ende vier hondert.

44

Asser kinderen in haren gheslachten, waren, Iemna, daer af coemt dat geslachte der Iemniten: Ieswi, daer af coemt dat gheslachte der Ieswiten: Bria, daer af coemt dat geslachte der Brijten.

45

Maer Bria kinderen waren Heber, daer af coemt dat gheslachte der Hebriten: Melchiel, daer af coemt dat geslacht der Melchieliten.

46

Ende Assers dochter hiet Serah.

47

Dat zijn de gheslachten der kinderen Asser in haren ghetale dryenvijftich duysent, ende vier hondert.

48

⁺ Napthali kinderen in haren geslachten, waren, Iaheziel, daer af coemt dat geslacht der Iahezieliten: Guni daer af coemt dat gheslacht der Guniten:

+ F vers 48

49

Iezer, daer af coemt dat gheslachte der Iezeriten: Sillem, daer af coemt dat gheslachte der Sillemiten.

50

Dat zijn de gheslachten van Naphtali, in haren ghetale, vijfenveertich duysent, ende vierhondert.

51

Dat is de somme vanden kinderen Israels,^* ses mael hondert duysent, een duysent, seuen hondert, ende dertich.

* Eccl. 16.b.11.

52

Ende de HEEre sprack met Mose, seggende:

53

Desen suldy dat lant wt deylen, tot een erfgoet, nae den getale der namen.

54

^† Veelen, sult ghy vele tot een erfgoet gheuen, ende weynighen, weynich. Eenen yeghelijcken salmen gheuen, nae haren getale.

† Num. 32.f.33. Iosu. 11.d.23.

55

^* Doch men sal dat landt door dat Lot deylen. Nae den namen der stammen haerder vaderen, sullen si dat erue nemen.

* Nu. 33.f.54. 36.a.2.

56

Want nae den lote suldy haer erue wt deylen, tusschen den velen ende weynighen.

57

Ende dat is de somme der Leuiten in haren geslachten: Gerson, daer af coemt dat gheslachte der Gersoniten: Kahath, daer af coemt dat gheslacht der Kahathiten: Merari, daer af coemt dat gheslacht der Merariten.

58

Dat zijn de gheslachten Leui: Dat gheslachte der Libniten, Dat geslachte der Hebroniten, Dat

[p. 61r]

gheslachte der Maheliten, dat gheslachte der Musiten, Dat gheslachte der Korahiten.

Kahath wan Amran.

59

⁺ Ende^* Amrans wijf hiet Iochebed, een dochter Leui, die hem geboren wert in Egipten. Ende si baerde den Amram, Aron ende Mose, ende MirIam haer suster:

+ B vers 59

* Exod. 6.d.20.

60

Maer^† den Aaron wert gheboren, Nadab, Abihu, Eleazar ende Ithamar.

† Leuit. 10.a.1. Num. 3.a.4.

61

Maer Nadab ende Abihu storuen, als si vreemt vier offerden voor den HEEre.

62

Ende haer somme was drientwintich duysent, allemans namen van eender maent ende daer ouer. Want si en werden niet ghetelt onder de kinderen Israels: Want men en gaf hen gheen erue onder de kinderen Israels.

63

^* Dat is de somme der kinderen Israels, die Mose ende Eleazar de Priester telden inder Moabiten velt, aen de Iordane teghen Iericho.

* Num. 1.f.44

64

Onder welcken gheen en was van dier sommen, doen Mose ende Aaron de Priester, de kinderen Israels telden in de woestijne Synai.

65

Want de HEEre hadde hen gheseyt,^* si souden den doot steruen in de woestijne, ende niemant en bleef daer ouer, sonder Caleb Iephunne soon, ende Iosua Nuns soon.

* Nu. 14.d.29.