Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxv. Capittel.

¶ Tvolck hoereert met de Moabitsche wijuen, ende aenbidt den Baal Peor. De HEERE hietse straffen: Daer vier ende twintich duysent menschen worden ghedoot, Pinehas wt grooter liefde des HEEren doorsteect eenen man ende een wijf in haer sondich werck zijnde.

1

⁺ ENde^* Israel woonde in Sittim. Ende dat volc begonst te hoereren met der Moabiten dochteren,

+ A vers 1

* Nu. 33.e.49.

2

^† De welcke nooden dat volc tot haerder Goden offer. Ende dat volck adt, ende aenbaden hare Goden.

† Exo. 34.b.15. Psa. 106.d.28 Iosu. 22.d.17.

3

Ende Israel hinck hem aen den Baal Peor. Doen wert de HEEre toornich ende gram op Israel,

4

Ende sprack tot Mose: Neemt alle Ouerste des volcx, ende hancxse den HEEre in de sonne, op dat de gramschap des toorens des HEEren van Israel ghekeert worde.

5

Ende Mose sprack totten Rechteren Israels:^† Een yeghelijck verworge zijne lieden, die hen aen den Baal Peor ghehanghen hebben.

† Exo. 32.f.27.

6

⁺ Ende siet een man wt den kinderen Israels quam,^* ende bracht onder sinen broederen een Midianitinne, ende liet Mose toesien, ende alle de Menichte der kinderen Israels, ende die daer weenden, voor de duere der Hutten des getuychenis.

+ B vers 6

* Deut. 23.c.17.

7

^† Als Pinehas Eleazar soon, die Aarons des Priesters soon was, dat sach, stont hy op wter Menichten, ende nam een spiesse in zijn handt,

† 1.Mac. 2.f.54

8

Ende ginck den Israelijtschen man nae, tot in dat Hoer huys, ende doorstackse beyde, den Israelijtschen man, ende dat wijf, door haren buyck. Doen hielt de plaghe op vanden kinderen Israels,

9

^† Ende daer werden gedoot in die plage vierentwintich duysent.

† 1.Cor. 10.a.9.

10

⁺ Ende de HEEre sprack met Mose, segghende:

+ C vers 10

11

Pinehas Eleazars soon, Aarons des^* Priesters soon, heeft mijn gramschap vanden kinderen Israels gekeert, door sinen^† ijuer om my, dat ick in mijnen ijuer de kinderen Israels niet geheel te niete en dede.

* Eccl. 45.e.29. 1.mac. 2.f.54.

† zeloersheyt tot my.

12

Daerom seght:^† Siet, ick gheue hem mijn verbont des vreets,

† Malac. 2.a.5.

13

Ende hy sal hebben, ende zijn saet nae hem, dat verbont eens eewichs Priesterdoms, om dat hy voor zijnen Godt geijuert, ende de kinderen Israels versoent heeft.

14

Maer den Israelijtschen man, die verslaghen wert met de Midianitinne, hiet Simei, Salu soon, een Vorst inden huyse des vaders der Simioniten.

15

Dat Midianijtsche wijf, die ooc verslaghen wert, hiet Casbi Sur dochter, die een Vorst was van een geslachte onder den Midianiten.

16

Ende de HEEre sprack met Mose,^† seggende:

† Num. 31.a.2.

17

Doet den Midianiten schade, ende slaetse, want

18

Sy hebben v schade ghedaen met haren liste, die si v ghestelt hebben, door Peor, ende door haer suster Casbi, de dochter des Vorsts der Midianiten, die verslaghen is inden daghe der plagen, om Peors wille, ende de plaghe daer nae quam.