Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiiij. Capittel.

¶ Balaams vermaledijdinghe wort vanden HEEre in een segheninghe ghekeert.

1

⁺ DOen nv Bileam sach, dattet den HEEre behaechde, dat hy Israel gebenedijde, en ginc hy niet henen, ghelijck voormaels nae de Toouenaers, Maer rechte zijn aesicht recht ter woestijnen waerts,

+ A vers 1

2

Hief zijn ooghen op,^* ende sach Israel, hoe si laghen, nae haren stammen. Ende de gheest Godts quam op hem,

* Num. 2. 3.

3

Ende hy hief op zijn spruecke ende sprack: Het seyt Bileam Beors soon: Het seyt de man, wiens oogen geopent zijn:

4

^† Het seyt die hoorder van Godts redenen, die des Almachtighen openbaringhe siet, dien de ooghen gheopent worden, als hy neder knielt.

† Nu. 24.c.15.

5

⁺ Hoe^* fijn sijn uwe Hutten Iacob, ende uwe wooninghen Israel,

+ B vers 5

* Schoon, huepsch. Iere. 30.c.18.

6

Ghelijck als haer de beken wt breyden, gelijck de Houen aent water, gelijck de Hutten, die de HEEre plant, gelijc de Cedren aent water.

7

Daer sal water wt sinen Eemer vloeyen, ende zijn saet sal een groot water worden. Sijn Coninck sal hoogher worden dan^* Agag, ende zijn rijck sal hem verheffen.

* 1.Reg. 15.b.8.

8

Godt heeft hem wt Egypten geleyt.^† Sijn vrijmoedicheyt is ghelijck eens Eenhorens. Hy sal de Heydenen zijn veruolgers verslinden, ende haer gebeente breken, ende met sinen pijlen doorschieten.

† Nu. 23.d.23.

9

Hy is gaen^† liggen als eenen Leeu, ende ghelijck eenen ionghen Leeu: Wie wil hem teghen hen verheffen? Gebenedijt si, die v ghebenedijt: Ende vermaledijt, die v vermaledijt.

† Gen. 49.b.8. Nu. 23.d.25.

10

Doen wert Balak gram op Bileam, ende sloech de handen te samen, ende sprack tot hem: Ick heb v gheroepen, dat ghy mijn vianden vermaledien sout: Ende siet, ghy hebtse nv driemael ghebenedijt.

11

Ende nv keert weder tot uwer stadt. Ick dachte dat ick v eeren soude, maer de HEEre heeft v de eere gekeert.

12

⁺ Bileam antwoorde: En heb ick oock niet tot uwen boden geseyt, die ghy tot my sant, ende gesproken?

+ C vers 12

13

^† Al gaef my Balak zijn huys vol siluers ende gouts, so en conde ick doch niet ouerlijden, ouer dat woort des HEEren, quaet noch goet te doen, nae mijnder herten, maer dat de HEEre spreken soude, dat soude ick oock spreken.

† Nu. 22.c.17.

14

Ende nv siet, als ick tot mijnen volcke trecke, so coemt,^* soo wil ick v raden, wat dit volck uwen volcke doen sal, ter laester tijt.

* Apoc. 2.c.14.

15

^* Ende hy hief op zijn spruecke, ende sprack: Het seyt Bileam Beor soon: Het seyt de man, dien de oogen gheopent zijn:

* Nu. 24.a.3.

16

Het seyt die hoorder van Godts redenen, ende die de kennisse heeft des hoochsten, die de openbaringhen des Almachtigen siet, ende dien zijn sonden gheopent worden, als hy neder knielt.

17

Ick sal hem sien, maer nv niet. Ick sal hem aenschouwen, maer niet van nae by.^† Een sterre sal wt Iacob opgaen, ende een Cepter wt Israel op comen, ende sal verslaen de^* Vorsten der Moabiten, ende verstooren alle kinderen Seth.

† Mat. 2.a.2.

* 2.Reg. 8.a.2.

18

^+† Edom sal hy innemen. Ende Seir sal sinen vianden onderworpen zijn. Maer Israel sal ouerwinninghe hebben.

+ D vers 18

† 2.Re. 8.c.14.

19

Wt Iacob sal de

[p. 60r]

Heerschapper comen, ende te niete doen, wat daer ouer is vanden steden.

20

Ende als hy de Amalekiten sach, hief hy sinen spruec op, ende sprack:^* Amalek de yerste onder den Heydenen.^† Maer ten laetsten suldy heel vergaen.

* Exod. 17.c.8.

† 1.Re. 15.a.7.

21

Ende als hy de Keniten sach, hief hy zijn sprueck op, ende sprac: Vast is uwe wooninghe, ende hebt uwen nest in eenen steen gheleyt:

22

Maer O Kain ghy sult verbrant worden, als v Assur gheuanghen wechleyden sal.

23

Ende hy hief noch eens zijn sprueck op, ende sprack: Och wie sal leuen, als Godt sulcx doen sal?

24

Ende^* Schepen wt Chithun, sullen verderuen den Assur ende Eber. Maer hy sal oock vergaen.

* Dan. 11.e.30.

25

Ende Bileam maeckte hem op, ende trock henen, ende quam weder in zijn stede. Ende Balak trock sinen wech.