Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Bileam wort bestelt dat volc Gods te veruolghen.

1

⁺ ENde des morgens nam Balak Bileam, ende leyde hem wech, op de hoochte Baals, dat hy van daer sien conde, tot aen dat eynde des volcx.

+ A vers 1

2

Ende Bileam sprac tot Balack: Bouwet my hier seuen Altaren, ende besorcht my hier seuen Ossen, ende seuen Rammen.

3

Balack dede soo hem Bileam seyde. Ende beyde Balack ende Bileam offerden op elcken Altaer, eenen Osse, ende eenen Ram.

4

Ende Bileam sprac tot Balack: Gaet by uwen Brantoffer,^* ick wil wech gaen, oft my by auontueren de HEEre ghemoete, dat ick v segghe, wat hy my condt doet. Ende ghinck haestelijck wech.

* Num. 23.c.16.

5

Ende Godt ghemoete Bileam. Maer hy sprack tot hem: Seuen Altaren heb ick bereyt, ende op elcken Altaer, eenen Osse, ende eenen Ram gheoffert.

6

Maer de HEEre ghaf Bileam dat woort inden mont, ende sprack: Gaet weder henen tot Balack, ende seght also.

7

Ende als hy weder tot hem quam, siet, doen stont hy by sinen Brandtoffer, met alle de Vorsten der Moabiten.

8

⁺ Doen hief hy op zijn spruecke,^* ende seyde: Balak der Moabiten Coninc heeft my wt Syrien laten halen, vanden gheberchte tegen den opganck: Coemt,^† vermaledijt my Iacob: Coemt schelt Israel.

+ B vers 8

* Nu. 22.a.4.

† veruloeckt.

9

Hoe sal ick vermaledien, den welcken Godt niet en vermaledijt? Hoe sal ick schelden, den welcken de HEEre niet en schelt?

10

Want van de hooghe stenrootse sie ick hem wel, ende vanden Hueuelen aensie ick hem. Siet, dat volck sal alleen woonen, ende onder de Heydenen niet gherekent worden.

11

Wie can tellen dat stof Iacob, ende dat getal des vierendeels Israels? Mijn siele moet steruen den doot der rechtuaerdighen, ende mijn eynde worde, ghelijck deser eynde.

[p. 59v]

12

⁺ Doen sprack Balak tot Bileam: Wat doet ghy nv by my? Ick heb v laten halen, Om mijn Vianden te vermaledijden ende siet, ghy ghebenedijtse.

+ C vers 12

13

Hy antwoorde,^* ende sprack: Moet ick dat niet houden ende spreken, dat my de HEEre inden mondt gheeft?

* Nu. 22.f.37.

14

Balak sprack tot hem: Coemt doch met my, aen een ander plaetse, van welcke ghy zijn eynde siet, ende doch niet gants en siet, ende vermaledijt my hem aldaer.

15

Ende hy leyde hem op een vrije pleyne, op de hoochte Pisga, ende timmerde seuen Altaren, ende offerde op elcken Altaer eenen Osse, ende eenen Ram.

16

Ende sprack tot Balak: Treet also by uwen Brandtoffer,^* ick wil ghinder wachten.

* Nu. 23.a.4.

17

Ende de HEEre gemoette Bileam, ende gaf hem twoort in sinen mondt, ende sprack: Gaet weder tot Balak, ende spreect alsoo.

18

Ende als hy weder tot hem quam, siet, doen stont hy by sinen Brandtoffer metten Vorsten der Moabiten. Ende Balak sprack tot hem: Wat heeft de HEEre gheseyt?

19

Ende hy hief op zijn spruecke, ende sprack: Staet op Balak, ende hoort, vaet ter ooren wat ick segghe, ghy Siphors soon.

20

^† Godt en is niet een mensche, dat hy lieghe, noch eens menschen kint, dat hem yets yet berouwe. Soude hy yets yet seggen, ende niet doen? Soude hy yets yet spreken, ende niet houden?

† 1.Cor. 1.a.8. 10.b.13.

21

Siet, om te gebenedien ben ick hier gebracht, ick gebenedije, ende en cans niet gekeeren.

22

⁺ Men en siet geen moeyte in Iacob, ende geenen arbeyt in Israel. De HEEre zijn Godt is by hem, ende dat trompetten des Conincx onder hem.

+ D vers 22

23

Godt heeftse wt Egypten gheleyt,^* zijn vrijmoedicheyt is als eens^† Eenhorens.

* Nu. 24.b.8.

† Iob. 39.b.12

24

Want daer en is gheen toouenaer in Iacob, ende gheen waersegger in Israel. Tzijnder tijt salmen van Iacob segghen, ende van Israel, wat wonderwercken Godt doet. Siet,

25

Dat volc sal opstaen als een ionge^† Leeuwinne, ende sal hem verheffen als eenen Leeu. Het en sal hem niet legghen, tot dattet den roof verslinde, ende dat bloet der verslaghenen drincke.

† Gen. 49.b.9. Nu. 24.b.9.

26

Doen sprack Balak tot Bileam: Ghy en sult hem noch vloecken noch segenen.

27

Bileam antwoorde, seggende tot Balak: En heb ick v niet geseyt, dat, al wat de HEEre spreken sal, dat sal ick doen?

28

Balak sprack tot hem, coemt doch, ick wil v aen eenen anderen hoeck brengen, oft by auontueren Gode behaghe, dat ghyse my aldaer vermaledijt.

29

Ende hy leyde hem op de hoochte des Berchs Peor, die teghen de woestijne siet.

30

Ende Bileam sprack tot Balak: Bouwet my hier seuen Altaren, ende bereyt my seuen Ossen ende seuen Rammen.

31

Balak dede alsoo, als Bileam seyde. Ende offerde op elcken Altaer, eenen Osse, ende eenen Ram.