Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxij. Capittel.

¶ Van Balak der Moabiten Coninc. Ende van Balaam de waerseggher.

1

⁺ ENde als^* Balak, Siphor soon sach al dat ghene dat Israel gedaen hadde den Amoriten,

+ A vers 1

* Iosu. 24.b.9.

2

Ende dat de Moabiten seer vreesden voor dit volck, dat so groot was, ende dat den Moabiten grouwelde voor den kinderen Israels,

3

Ende spraken totten Oudtsten der Midianiten: Nv sal desen hoop op knagen, al watter rontom ons is, ghelijck eenen Os cruyt op den velde afknaecht. Ende Balak Siphor soon, was in dien tijde Coninck der Moabiten.

4

Ende hy sandt^† boden wt tot Bileam Beors soon, tot Pethor, die woonde aent water inden Lande der kinderen zijns volcx, dat si hem roepen souden, ende liet hem segghen: Siet, daer is een volck wt Egypten ghetrocken, dat bedect dat aensicht der Aerden, ende leyt teghen my.

† Nu. 31.b.8. 2.Pet. 2.c.15.

5

⁺ Daer om coemt nv ende veruloeckt my dat volc, want het is my te machtich, oft ickt slaen mochte, ende wt den Lande verdrijuen. Want ick weet, wien dat ghy^† gebenedijt, die is ghebenedijt, ende wien ghy^* vermaledijt, die is vermaledijt.

+ B vers 5

† Segent.

* Veruloeckt.

6

Ende de Ouders der Moabiten gingen wech met den Ouders der Midianiten, ende hadden den loon des waersegghers in haren handen, ende ginghen tot Bileam in, ende seyden hem Balacs woort.

7

Ende hy sprack tot hen: Blijft hier te nacht, so wil ic v seggen, so my de HEEre segghen sal. Aldus bleuen de Vorsten der Moabiten by Bileam.

8

Ende Godt quam tot Bileam, ende sprack: Wie zijn de Lieden, die by v zijn?

9

Bileam sprack tot Godt: Balak Siphor soon der Moabiten Coninck, heeft tot my ghesonden:

10

Siet, een volck isser wt Egypten ghetrocken, ende bedect dat aensicht der Aerden, daerom coemt nv, ende vermaledijt hen, oft ick met hen strijden mochte, ende verdrijuense.

11

Maer Godt sprack tot Bileam: En gaet niet met hen, noch en veruloect dat volc niet, want het is gebenedijt.

12

⁺ Doen stont Bileam des morghens op, ende sprack tot Balacks Vorsten: Gaet henen in v lant, want de HEEre en wilts niet ghehengen, dat ick met v trecke.

+ C vers 12

13

Ende de Vorsten der Moabiten maecten hen op, quamen tot Balak, ende spraken: Bileam weyghert hem met ons te trecken.

14

Doe sant Balak noch grooter ende heerlijcker Vorsten henen dan die waren.

15

Als dese tot Bileam quamen, spraken si tot hem: Also laet v Balak Siphor soon segghen: Lieue, en weyghert v niet tot my te trecken:

16

Want ick wil v hoochlijck eeren, ende wat ghy my segt, dat wil ick doen. Coemt doch ende vermaledijt my dit volck.

17

Bileam antwoorde, ende sprack tot Balaks knechten:^† Al gaef my Balak zijn

† Nu. 24.c.13. 3.Reg. 13.b.8.

[p. 59r]

huys vol siluers ende gouts, so en soude ic doch niet connen ouertreden dat woort mijns HEEren mijns Godts, cleyn oft groot te doen.

18

Daerom blijft ghy toch nv oock hier desen nacht, dat ick weten mach, wat de HEEre voorder met my spreecken sal.

19

Doen quam Godt des nachts tot Bileam, ende sprack tot hem: Sijn de mannen ghecomen om v te roepen, soo maeckt v op, ende treckt met hen. Doch wat ick v segghen sal, dat suldy doen.

20

⁺ Doe stont Bileam des morghens op, ende sadelde zijn Ezelinne, ende trock metten Vorsten der Moabiten henen.

+ D vers 20

21

Maer Godts toren wert gram, om dat hy wech trock. Ende de Engel des HEEren tradt inden weghe, om hem te wederstaen. Maer hy reet op zijn Ezelinne, ende twee Iongers waren met hem.

22

Ende de Ezelinne sach den Engel des HEEren inden weghe staen, ende een bloot sweert in zijn hant. Ende de Ezelinne weec wten weghe ende ghinck opten velde. Mer Bileam sloechse, dat si inden weghe soude gaen.

23

Doen tradt de Enghel des HEEren inden wech, by den wijnberch, daer op beyde siden wanden waren.

24

Ende doen de Ezelinne den Enghel des HEEren sach, drongse haer aen de wandt, ende clemde Bileams voet aender wandt. Ende hy sloechse noch meer.

25

Doen ghinck de Engel des HEEren voorder, ende tradt aen eenen enghen hoeck, daer gheenen wech en was te wijcken, noch ter rechter noch ter slincker handt.

26

Ende doen de Ezelinne den Enghel des HEEren sach, vielse op haer knien, onder Bileam. Doen vergramde den toorne Bileam, ende sloech de Ezelinne metten stocke.

27

⁺ Doen dede de HEEre der Ezelinnen den mont op,^* ende si sprack tot Bileam: Wat heb ick v ghedaen, dat ghy my nv driemael hebt geslagen?

+ E vers 27

* 2.Pet. 2.c.16. Iuda. 1.b.11.

28

Bileam sprack totter Ezelinnen: Om dat ghy my bespot hebt, Och dat ick nv een sweerdt inder handt hadde, ick woude v verworghen.

29

De Ezelinne sprack tot Bileam: En ben ick niet v Ezelinne, daer ghy op ghereden hebt tot uwer tijt, tot op desen daghen? Plach ick oock v oyt also te doen? Hy sprack: Neen.

30

Doen opende de HEEre Bileam de oogen, dat hy den Engel des HEEren sach inden wege staen, ende een bloot sweert in zijn handt, ende neychde, ende buckte met sinen aensichte.

31

Ende de Engel des HEEren sprack tot hem: Waerom hebdy uwe Ezelinne nv driemael geslagen? Siet ick ben wtgegaen, om v te wederstaen, want den wech is voor my verkeert.

32

Ende de Ezelinne heeft my gesien ende driemael voor my geweken. Ende en hadse voor my niet gheweken, so woude ick v nv oock verworcht, ende de Ezelinne leuendich behouden hebben.

33

⁺ Doen sprack Bileam totten Engel des HEEren: Ick heb gesondicht, want ic en hebts niet gheweten, dat ghy my teghenstont inden weghe, Ende nv, in dien v niet en behaecht, so wil ick wederom keeren.

+ F vers 33

34

De Enghel des HEEren sprack tot hem: Trect wech metten mannen. Maer ghy en sult anders niet spreken, dan dat ick v segghen sal. Also track Bileam met Balacks Vorsten henen.

35

Doen Balak hoorde, dat Bileam quam trock hy wt hem teghen in de stadt der Moabiten, die daer leyt aen de palen Arnon, de welcke aen dat wterste vanden palen leyt,

36

Ende sprac tot hem: En heb ick tot v niet gesonden, ende v laten roepen? Waerom en sidy dan tot my niet gecomen? Meyndy dat ick v niet en soude connen gheeren?

37

Bileam antwoorde hem: Siet ick ben tot v gecomen:^† maer hoe can ick yet anders gespreken, dan dat my Godt inden mondt gheeft: dat moet ick spreken.

† Num. 23.c.13.

38

Aldus trock Bileam met Balak, ende quamen inde straten der stadt.

39

Ende Balak offerde Runderen ende schapen, ende santse nae Bileam, ende nae de Vorsten die by hem waren.