Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ MirIam sterft in Kades, Tvolck twist met Mose ende Aaron van gebreck des waters, De Heere gheeft haer water wter steenrootsen. Moses beghert aen Edom dattet volck mach door trecken. Aaron sterft opten berch.

1

⁺ ENde de kinderen Israels quamen met de gheheele Menichte in de^† Woestijne Sin, in de yerste maent. Ende dat volck lach te Kades. Ende MirIam sterf aldaer, ende wert aldaer begrauen.

+ A vers 1

† Nu. 33.d.36. Deut. 1.f.46.

2

Ende de Menichte en had gheen Water, ende vergaderden hen tegen Mose ende Aaron.

3

Ende dat volck hadde twist teghen Mose ende sprack:^† Och hadden wy vergaen, doen onse broeders verghinghen voor den HEEre.

† Num. 16.e.31.

4

Waerom hebdy^* de Menichte des HEEren in dese Woestijne ghebracht, dat wy hier steruen souden met onsen vee?

* Exod. 17.a.3

5

Ende waerom hebdy ons wt Egypten gheleyt, in desen quaden hoeck, daermen niet saeyen en can, daer noch vijghen, noch wijnstock, noch granaet appelen en zijn, oock en isser gheen water te drincken?

6

Mose ende Aaron, ghinghen vander Menichten totter dueren der Hutten des ghetuychenis, ende vielen op haer aensicht.

7

Ende de heerlicheyt des HEEren openbaerde hen. Ende de HEERE sprack met Mose,^* segghende:

* Exod. 17.b.5. 1.Cor. 10.a.4.

8

Neemt den staf, ende vergadert de Menichte, ghy, ende v broeder Aaron, ende spreeckt metten steen, voor haren ooghen, die sal zijn water gheuen. Alsoo suldy hen water wten steen doen comen, ende de Menichte te drincken geuen, ende haer vee.

9

⁺ Doe nam Mose den staf, voor den HEEre, soo hy hem gheboden hadde.

+ B vers 9

10

Ende Mose ende Aaron vergaderden de Menichte voor den steen, ende sprack tot hen: Hoort ghy onghehoorsame: Sullen wy v oock water brenghen wt desen steen?

11

Ende Mose hief zijn hant op,^* ende sloech den steen metten staue tweemael. Doen ghinck daer veel waters wt, soo dat de Menichte dranck, ende haer vee.

* Psa. 78.b.15 1.Cor. 10.a.4. Ps. 105.d.41. Sap. 11.a.4.

12

Maer de HEEre^† sprack tot Mose

† Deut. 1.f.37. 32.g.51. Nu. 27.c.14.

[p. 58r]

ende Aaron: Om dat ghy aen my niet gelooft en hebt, dat ghy my heylichdet voor den kinderen Israels, en suldy dese Menichte niet brengen in dat Landt, dat ick hen gheuen sal.

13

Dat^† is dat Kijfwater, daer de kinderen Israels teghen den HEEre om keuen, ende hy gheheylicht wert aen hen.

† Exo. 17.b.7.

14

^* Ende Mose sandt boden wt Kades tot den Coninck der Edomiten.^† Alsoo laet v, uwe broeder Israel segghen:

* Iudi. 11.c.17.

† Gen. 25.c.25

15

Ghy weet alle de moeyte die ons gebuert is,^* hoe dat onse Vaders neder ghetogen zijn in Egypten, ende wy langen tijt in Egypten ghewoont hebben:

* Gen. 45.a.1.

16

⁺ Ende de Egyptenaren hanteerden ons, ende onse Vaders qualijck. Ende wy riepen totten HEEre, die heeft onse stemme verhoort, ende eenen Engel ghesonden, ende ons wt Egypten gheleyt. Ende siet, Wy zijn te Kades in de stede, aen uwe palen:

+ C vers 16

17

Laet^* ons door v Lant trecken. Wy en willen noch door Ackers noch door wijngaerden gaen, noch gheen water drincken wt den Putten. Wy willen door de^† Heyrstrate reysen, noch ter rechter, noch ter slincker handt wijcken, tot dat wy door uwe palen comen.

* Num. 21.c.22. 1.mac. 5.e.48.

† Lantstrate.

18

Maer de Edomiten spraken tot hen:^* Ghy en sult niet door my trecken, oft ic wil v metten sweerde teghen trecken.

* Ezec. 25.a.12. Abd. 1.b.10. Deut. 2.a.3.

19

De kinderen Israels spraken tot hem: Wy willen op de ghebaende strate trecken: Ende drincken wy van uwen watere, wy ende onse vee, soo willen wijt betalen. Wy en willen niet dan te voet door trecken.

20

^† Ende de Edomiten trocken wt, hen te ghemoet, met machtighen volcke, ende stercke hant.

† Exod. 17.c.8.

21

Also weygerden de Edomiten Israel, ende misgunden door zijn palen te trecken. Ende Israel weeck van hen.

22

⁺ Ende de kinderen Israels braken op^* van Kades, ende quamen met de gheheele Menichte te Hor aent gheberchte.

+ D vers 22

* Nu. 33.d.37.

23

Ende de HEEre sprack met Mose ende Aaron, te Hor aent gheberchte, aen de palen vanden Lande der Edomiten, ende sprack:

24

Laet hem Aaron vergaderen tot sinen volcke: Want hy en sal niet in dat Lant comen, dat ick den kinderen Israels ghegeuen heb, om dat ghy mijnen monde onghehoorsaem gheweest zijt,^* byden Kijfwatere.

* Nu. 20.b.13. Exo. 17.b.17.

25

Maer neemt Aaron, ende sinen soon Eleazar, ende leytse op Hor, int geberchte,

26

Ende trect Aaron zijn cleederen wt, ende trectse Eleazar sinen soone aen. Ende Aaron sal hem aldaer vergaderen, ende steruen.

27

^* Doen dede Mose, so hem de HEEre gheboden hadde, ende clommen op te Hor, int geberchte, voor de gantsche Menichte.

* Deut. 10.b.6. 32.g.50. Num. 33.d.38.

28

Ende Mose trock Aaron zijne cleederen wt, ende trockse Eleazar sinen soon aen. Ende Aaron sterf aldaer bouen opt geberchte.

29

Maer Mose ende Eleazar clommen neder vanden berge. Ende als alle de Menichte sach, dat Aaron wech was, beweenden si hem^* dertich daghen, alle dat huys Israel.

* Deut. 34.b.8.