Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ Vande rootachtighe koe, die tot eenen Sondoffer bereyt wert. Ende hoe vande asschen een water der reyningen ende ontsondinghen soude ghemaeckt worden.

1

⁺ ENde de HEEre sprack met Mose ende Aaron, segghende:

+ A vers 1

2

Dese sede sal een Wet zijn, dat de HEEre geboden heeft, ende gheseyt: Segt den kinderen Israels, dat si tot v brenghen een rootachtige koe, sonder smette, die gheen

[p. 57v]

ghebreck en heeft, ende daer noch gheen iock op en heeft gheweest.

3

Ende geeftse den Priester Eleazar,^* die salse wtbrenghen voor den Legher, ende aldaer voor hem laten slaen.

* Heb. 13.b.11.

4

Ende Eleazar de Priester,^* sal van haren bloede met sinen vingher nemen, ende sprengent terstont seuenmael tegen de Hutte des ghetuychenis.

* Exo. 29.b.12.

5

^† Ende de koe voor hem laten verbernen, beyde haer vel ende vleesch, daer toe haer bloet met haren meste.

† Leuit. 4.b.11.

6

Ende de Priester sal Cederen hout, ysope, ende Roset roode wolle nemen, ende op de bernende koe worpen,

7

Ende sal zijn cleederen wasschen, ende zijn Lijf met water baden, ende daer nae inden Legher gaen, ende onreyn zijn totten Auont.

8

⁺ Ende diese verbrant heeft, sal ooc zijn cleederen met water wasschen, ende zijn Lijf int water baden, ende onreyn zijn totten Auont.

+ B vers 8

9

^† Ende een reyn Man sal de asschen vander Koe op rapen, ende schuddense buyten den Leger, in een suyuer plaetse, dat si aldaer bewaert worde, voor de Menichte der kinderen Israels, tot een besprengwater, want het is een Sondoffer.

† Heb. 9.b.13.

20[10]

Ende de selue, die de asschen vander koe op gheraept heeft, sal zijn Cleederen wasschen, ende onreyn zijn totten Auont. Dit sal een eewich recht zijn den kinderen Israels, ende den vreemdelinghen die onder v woonen.

11

^* Soo wie nv erghens eenen dooden mensch aenroert, die sal seuen dagen onreyn zijn.

* Num. 31.c.19. Agge. 2.b.14. Eccl. 35.a.8.

12

Die sal hem hier mede ontsondighen, ten derden daghe, ende ten seuensten daghe, so wort hy reyn. Ende en ontsondicht hy hem niet ten derden dage, ende ten seuensten daghe, so en sal hy niet reyn worden.

13

Maer als yemant eenigen dooden mensch aenroert, ende hem niet ontsondigen en wilt, die ontreynicht de Wooninghe des HEEren, ende alsulcken siele sal wtgheroeyt worden wt Israel, om dat dat Sprengwater ouer hem niet ghesprengt en is. So is hy onreyn, also langhe als hy hem daer af niet en laet reynighen.

14

⁺ Dit is de Wet. Als een Mensche in de Hutte sterft. Wie dat in de Hutte gaet, ende al wat in de Hutte is, sal seuen dagen onreyn zijn.

+ C vers 14

15

Ende alle open gereetschap, dat gheen decksel noch bant en heeft, is onreyn.

16

Oock wie dat op den velde eenen verslaghenen metten sweerde aenroert, oft eenen dooden, oft eens menschen been, oft graf, die is seuen daghen onreyn.

17

So sullen si dan nemen voor den onreynen, vanden asschen van desen verbranden Sondoffer, ende vlietende water daer op gieten in een vat,

18

Ende een suyuer man sal^† ysope nemen, ende int water steken, ende de Hutte besprengen, ende alle de ghereetschap, ende alle sielen, die daer inne zijn. Also oock den ghenen, die eens dooden been, oft een verslaghene, oft dooden, oft graft angeroert heeft.

† Psal. 51.b.9.

19

⁺ Maer die reyne, sal den onreynen ten derden daghe, ende ten seuensten daghe besprenghen, ende hem ten seuensten dage ontsondighen. Ende sal zijn cleederen wasschen, ende hem int water baden, soo wort hy des Auonts reyn.

+ D vers 19

20

Maer soo wie onreyn zijn sal, ende hem niet ontsondighen en wilt, diens siele sal wtgeroeyt worden wter Menichten. Want hy heeft dat heylichdom des HEEren ontreynicht, ende en is met den Besprengwater niet besprengt, daerom is hy onreyn.

21

Ende dit sal hen een eewich recht zijn. Ende dese die metten Besprengwater besprengt heeft, sal zijne cleederen ooc wasschen. Ende wie dat besprengwater aenroert, die sal onreyn zijn totten Auont.

22

^† Ende al dat hy aenroert, sal onreyn worden. Ende soo wat siele dat hy aenroeren sal, sal onreyn zijn totten Auont.

† Leuit. 17.d.15