Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

¶ Van dat officie ende dienst Aarons, der Priesteren ende Leuiten. Ende wat haer in haren dienst toebehoort.

1

⁺ ENde de HEEre sprack tot Aaron: Ghy ende uwe sonen, ende ws Vaders huys met v, sult de misdaet des Heylichdoms dragen: Ende ghy, ende uwe soonen met v, sult de misdaet ws Priesterdoms dragen.

+ A vers 1

2

Maer uwe broederen vanden stamme^* Leui ws Vaders, suldy tot v nemen, dat si by v zijn, ende v dienen.^† Maer ghy ende uwe soonen met v, voor de Hutte des getuychenis. Ende si sullen uwen dienst, ende den dienst van de gantsche Hutte wachten,

* Num. 3.a.6.

† Deut. 18.a.5.

3

Doch tot de ghereetschap des Heylichdoms, ende totten Altaer, en sullen si

[p. 57r]

niet genaken, dat niet beyde si, ende ghy en sterft:

4

Maer si sullen by v zijn, dat si den dienst waernemen in der Hutten des getuychenis, in alle officie der Hutten. Ende gheen vreemde en sal tot v genaken.

5

Daerom wacht nv den dienst des heylichdoms ende den dienst des Altaers, dat voort niet meer eenighe toornighe gramschap en come, ouer de kinderen Israels.

6

⁺ Want siet, ick hebbe de Leuiten uwe broederen genomen vanden kinderen Israels, ende v gegeuen, den HEEre tot eenen gheschencke, dat si de officie hanteren in der Hutten des getuychenis.

+ B vers 6

7

Mer ghy, ende uwe Soonen met v, sult uwe Priesterdom wachten, dat ghy dient in alderley hanteringe des Altaers ende binnen achter den voorhanck. Want v Priesterdom geue ick v tot een officie, voor een ghifte. Als een vreemde daer toe gaet, die sal steruen.

8

Ende de HEEre seyde tot Aaron: Siet, ick hebbe v ghegheuen mijn Hefoffer, van alle dat de kinderen Israels heyligen, voor v Priesterlijck officie, ende uwe soonen, tot een eewich recht.

9

Dat suldy hebben vanden Alderheylichsten, dat si offeren. Alle haer ghiften, met alle haer Spijsoffer, ende met alle haren Sondoffer, ende met alle haren Schultoffer, dat si my geuen, dat sal v, ende uwen soonen, dat alderheylichste zijn.

10

In de Alderheylichste plaetse suldijt eten. Wat manlijc is, sal daer af eten: Want het sal v Heylich zijn.

11

^+† Ick heb oock dat Hefoffer haerder ghiften aen alle Beweechofferen der kinderen Israels, v ende uwen soonen, ende uwen dochteren ghegeuen met v, tot een eewich recht. Wie reyn is in uwen huyse, die sal daer af eten.

+ C vers 11

† Leui. 7.d.34.

12

Alle de beste olie ende alle besten most, ende Coren haerder yerstelinghen, die si den HEEre geuen, heb ick v ghegheuen.

13

De yerste vruchten, van alle dat in haren lande is, dat si den HEEre brenghen, sal v zijn. Wie reyn is in dijnen huyse, sal daer af eten.

14

Alle dat verbannen in Israel, sal v zijn.^† Alle

† Exo. 34.c.19.

15

Dat zijn moeder breeckt, onder alle vleesch, dat si den HEEre brengen, het si Mensch oft Vee, sal uwe zijn. Alsoo nochtans, dat ghy de yerste menschen vrucht sult laten lossen, ende de yerste vrucht van een onreyn Vee, oock laten lossen.

16

Maer si sullent lossen, alst een maent out is, ende ghy sullet te lossen gheuen om ghelt, om vijf sikels, nae den Sikel des Heylichdoms,^† die ghelt twintich Gera.

† Exo. 30.b.13. Leui. 27.d.25. Ezec. 45.b.12 Nu. 3.g.47.

17

Maer de yerste vrucht van eenen Osse, oft Lamme, oft gheyte, en suldy niet te lossen gheuen: Want si zijn heylich. Haer bloet suldy sprenghen opten Altaer, ende haer vel suldy ontsteken, tot eenen Offer des sueten ruecx, den HEEre.

18

Haer vleesch sal v zijn, ghelijck als oock de Beweechboorst, ende de rechte schouder v is.

19

Alle Hefofferen, die de kinderen Israels heylighen den HEEre, heb ick v ghegeuen, ende uwen soonen, ende uwen dochteren met v, tot eenen eewighen rechte. Dat sal v een onuerganckelijck verbont zijn, eewich voor den HEEre, v ende uwen sade met v.

20

⁺ Ende de HEEre sprack tot Aaron: Ghy en sult in haren lande niet besitten, ooc geen deel onder hen hebben:^* Want ick ben v deel, ende v erfgoet onder de kinderen Israels.

+ D vers 20

* Deut. 18.a.2. Eze. 44.d.28 Iosu. 13.b.14.d.33.

21

Maer den kinderen Leui hebbe ick alle thienden ghegheuen in Israel, tot een erfgoet, voor haer officie, dat si my doen, inder Hutten des getuychenis.

22

Dat nv voortaen de kinderen Israels niet en ghenaken der Hutten des ghetuychenis, om sonde op hen te brenghen, ende te steruen.

23

Maer de Leuiten sullen dat officie hanteren inder Hutten des ghetuychenis, ende si sullen der gheenre misdaet draghen, tot een eewich recht, by uwen nacomelingen.^† Ende si en sullen onder de kinderen Israels, gheen erfgoet besitten.

† Iosu. 13.b.14. Act. 4.d.34.

24

Want de thienden vanden kinderen Israels, die si den HEEre Heffen, heb ick den Leuiten tot een erfgoet gegeuen. Daerom heb ick tot hen geseyt, dat si onder de kinderen Israels gheen erfgoet besitten en sullen.

25

Ende de HEEre sprack met Mose, segghende:

26

Seght den Leuiten, ende spreect tot hen: Als ghy de thiende neemt vanden kinderen Israels, die ick v van hen ghegeuen heb, tot uwen erfgoede, so suldy daer af een Hefoffer den HEEre doen, dat is de thiende vanden thienden.

27

Ende sult alsulcken v Hefoffer achten, als gaefdy Coren wten schueren, ende volheyt wt der Wijnpersen.

28

⁺ Alsoo suldy oock dat Hefoffer den HEEre gheuen, van allen uwen thienden, die ghy neemt van den kinderen Israels, dat ghy alsulcken Hefoffer des HEEren, den Priester Aaron gheeft.

+ E vers 28

29

Van al dat v ghegheuen wort, suldy den HEEre, alderley Hefoffer gheuen, van alle [den] besten, dat daer af gheheylicht wort.

30

Ende spreeckt tot hen: Als ghy alsoo dat^† beste daer af Heft, soo salt den Leuiten gherekent worden, ghelijck een incomen der schueren, ende ghelijck een incomen der wijnpersen.

† Vetste

31

Ende moget eten in alle steden, ghy, ende uwe kinderen. Want het is uwen loon, voor uwen dienst, inder Hutten des ghetuychenis.

32

Soo en suldy daer aen gheen sonde op v brenghen, als ghy dat beste daer af Heft, ende niet ontwijen dat gheheylichde der kinderen Israels, ende niet steruen.