Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

¶ Dat den stamme Leui ende dat Priesterdom Aarons gecoren zijn vanden HEEre, wert bediet door dat groeyen des stocks.

1

⁺ ENde de HEEre sprack met Mose, segghende:

+ A vers 1

2

Seght den kinderen Israels, ende neemt van hem twelf^* stocken, van elcken Vorst, van zijns vaders huys, eenen, ende schrijft eens yegelijcx Naem op sinen stock.

* Stecken.

3

Maer Aarons naem suldy schrijuen op den stock Leui. Want voor elck hooft haerder Vaders huys, sal eenen stock wesen.

4

Ende legtse in de Hutte des getuychenis, voor dat ghetuychenis, daer ick v betuyghe.

5

Ende den welcken ic kiesen sal, diens stock sal groeyen, dat ick de murmuratie der kinderen Israels, die si tegen v murmureren, stille.

6

Mose sprac metten kinderen Israels. Ende alle haer Vorsten gauen hem twelf stocken, een yeghelijck Vorst eenen stock, nae den huyse haerder vaderen. Ende Aarons stock was oock onder haer stocken.

7

Ende Mose leyde de stocken voor den HEEre, in de Hutte des getuychenis.

8

⁺ Maer des morgens, als Mose inde Hutte des getuychenis ghinck,^* vant hy Aarons stock, vanden huyse Leui groen, ende gebloeyt opgegaen, ende Amandelen draghende.

+ B vers 8

* Heb. 9.a.4.

9

Ende Mose droech alle de stocken wt vanden HEEre, voor alle de kinderen Israels, dat zijt sagen. Ende een yeghelijck nam sinen stock.

10

Maer de HEEre sprack tot Mose: Draecht Aarons stock weder voor dat getuychenis, dat hy bewaert worde, tot een teeken, den onghehoorsamen kinderen, dat haer Morren van my op houde, op dat si niet en steruen.

11

Mose dedet so hem de HEEre gheboden hadde.

12

Ende de kinderen Israels spraken tot Mose: Siet, wy verderuen: Wy worden alle verdaen, ende gaen te niet.

13

Wie dat totter Wooninge des HEEren genaeckt, die sterft. Sullen wy dan al gheheel vergaen?