Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

¶ Van menigerley offerhanden, ende hoe veel tot elcken Spijsoffer ende Drancoffer behoort. Hoe een gestraft wert die opten Sabbath hout raepte. Moses doet ghedenckteecken maken aen de cleederen.

1

⁺ ENde de HEEre sprack met Mose, segghende:

+ A vers 1

2

Spreeckt metten kinderen Israels, ende seght tot hen: Als ghy comen sult int Lant uwer Wooninghen, dat ick v gheuen sal,

3

Ende ghij den HEEre offerhande doen wilt, Het si eenen Brandtoffer, oft een offerhande tot een bysonder ghelofte, oft een vrijwillich offer, oft uwe Feestoffer, op dat ghy den HEEre eenen sueten rueck maeckt, vanden Runderen oft vanden Schapen.

4

Wie nv zijn ghifte den HEEre offeren wil, die sal dat^* Spijsoffer doen, een thiende Semelmeels met olie gemengt, van een vierendeel van Hin,

* Leuit. 2.a.1. 6.b.7.

5

Ende Wijn tot Drancoffer, oock van een vierendeel van Hin, totten Brandtoffer, oft anders tot eenen offer, daer een Lam geoffert wort.

6

Maer daer eenen Ram geoffert wort, suldy dat Spijsoffer maken, twee thienden Semelmeels met olie gemengt, van een derdendeel van Hin,

7

Ende wijn tot Dranckoffer, oock van een derdendeel van Hin, dat suldy den HEEre tot eenen sueten rueck offeren.

8

⁺ Maer wildy een Runt tot eenen Brantoffer oft tot een bysonder Geloftoffer, oft tot een Dancoffer den HEEre maken,

+ B vers 8

9

So suldy tot den Runde een Spijsoffer doen, drie thienden Semelmeels, gemengt met olie, van een half Hin,

10

Ende wijn tot Drancoffer, oock een half Hin. Dat is een offer den HEEre, tot eenen sueten rueck.

11

Also suldy doen met eenen Os, met eenen Ram, met een schaep, van Lammeren ende gheyten,

12

Daer nae dat dat ghetal is van desen offeren, daer nae sal oock zijn dat ghetal des Spijsoffers ende des Dranckoffers.

13

So wie dat een Landtbesitter is, die sal sulcx doen, dat hy den HEEre offere eenen offer tot eenen sueten rueck.

14

Ende woont daer een vreemdelinc by v, oft onder v by uwe vrienden, ende wilt hy den HEEre een offer tot eenen sueten rueck doen, die sal doen ghelijck si doen.

15

Der gheheelder Menichten si een settinge, beyde v, ende den vreemdelingen. Een eewighe settinghe sal dat uwen nacomelinghen zijn, dat voor den HEEre de vreemdelinck si ghelijck als ghy.

16

Een Wet, een Recht sal v, ende den vreemdelinck zijn, die by v woont.

17

Ende de HEEre sprack met Mose, segghende:

18

Spreeckt met den kinderen Israels^* ende seght tot hen: Als ghy int lant coemt, daer ick v in brengen sal, dat ghy etet vanden broode des Landts.

* Exod. 23.c.19. Deut. 8.c.10.

19

So suldy den HEEre een Heffinge geuen (te weten) van dat yerstelinck van uwen deege suldy

20

Eenen koeck tot een Heffinghe gheuen.^* Ghelijck de Heffinghe vander schueren,

* Leui. 23.b.10.

21

Alsoo suldy oock den HEEre van uwen deeghe, de yerstelinghen tot een Heffinghe gheuen, by uwen nacomelinghen.

22

^+* Ende als ghy door onwetenheyt, eenich van desen gheboden niet en doet, die de HEEre tot Mose gesproken heeft,

+ C vers 22

* Leuit. 4.f.27.

23

Ende al wat de HEEre v door Mose gheseyt heeft, van dien dage aen, doe hy begost te gebieden tot op uwen nacomelinghen.

24

Als nv de Menichte wat onwetende dede, so sal de geheele Menichte eenen ionghen Os vanden runderen, tot eenen Brantoffer maken, tot eenen sueten rueck den HEEre, met sinen Spijsoffer ende Dranckoffer, soo alst recht is, ende eenen geyten bock tot eenen Sondoffer.

25

Ende de Priester sal alsoo de gantsche Menichte der kinderen Israels versoenen, so salt hem vergheuen zijn, want tis een onwetenheyt.

26

Ende si sullen brenghen alsulcke haer gauen tot een offer den HEEre, ende haer Sondoffer voor den HEEre, van haerder onwetenheyt, so wordet vergheuen der gantscher Menichten der kinderen Israels, daertoe oock den vreemdelinck, die onder v woont, dewijle dat geheele volck is in sulcker onwetenheyt.

27

^† Maer als een siele wt onwetenheyt sondigen sal, die sal een iarige gheyte tot een Sondoffer brengen.

† Leuit. 4.c.13.

28

Ende de Priester sal alsulcke onwetende siele versoenen metten Sondoffer voor de onwetenheyt, voor den HEEre, dat hyse versoene, soo salt haer vergeuen worden.

29

Ende een wet salt zijn dat ghy voor de onwetenheyt doen sult, beyde den Landtbesitter onder den kinderen Israels, ende den vreemdelinck die onder v woont.

30

^* Mer als een siele wt vermetenheyt yet doet, het si een Lantbesitter oft vreemdelinck, die heeft den HEEre gelastert, sodanige siele sal wtgeroyt worden, van haren volcke,

* Heb. 10.c.26.

31

Want si heeft des HEEren woort veracht, ende zijn gheboden laten varen. Sy sal slechts wtgheroyt worden, de schult sal op haer zijn.

32

⁺ Als nv de kinderen Israels in de woestijne waren, vonden si eenen man hout rapen, inden Sabbath dage.

+ D vers 32

33

Ende die hem daer op beuonden hadden, als hy hout raepte, brachten hem tot Mose ende Aaron, ende voor de geheele Menichte,

34

Ende si leyden hem^* geuangen. Want

* Leui. 24.c.12.

[p. 56r]

ten was niet claer wtghedruct, watmen met hem doen soude.

35

Maer de HEEre sprack tot Mose: Die man sal de doot steruen. De gheheele Menichte sal hem steenen buyten den Leger.

36

Doen bracht hem de gheheele Menichte wt voor den Leger, ende steenden hem dat hy sterf, so de HEEre Mose gheboden had.

37

Ende de HEEre sprack tot Mose: Spreect metten kinderen Israels,

38

Ende seght tot hen:^† Dat si hen freengien maken, aen de hoecken van haren cleederen, onder allen uwen nacomelinghen, ende gheelsnoeren op de frengien, aende hoecken maken.

† Deut. 22.b.12.

39

Ende de freengien sullen v daer toe dienen, dat ghyse aensiet ende gedenct aller geboden des HEEren, ende doetse. Dat ghy niet en recht nae ws herten ghepeysen, noch nae uwen oogen niet en hoereert.

40

Daerom suldy gedencken, ende doen alle mijn gheboden, ende heylich zijn uwen Gode.

41

Ick de HEEre v Godt, die v wt Egypten landt geleyt heeft, om dat ick v Godt wesen soude. Ick de HEEre v Godt.