Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Van het Paeschfeest. Ende hoe de onreyne dat houden sullen, vander wolcken bouen der Hutten.

1

⁺ ENde de HEEre sprack met Mose inde woestijne Sinai, inden tweeden iare, nae dat si wt Egypten lant getrocken waren, in de yerste maent, ende sprac:

+ A vers 1

2

^† Laet de kinderen Israels Paesschen houden tzijnder tijt,

† Exod. 12.a.3. Leui. 23.b.15. Nu. 28.c.16. Deut. 16.a.1. Ezec. 45.c.21.

3

Inden veerthiensten dage van deser maent, ontrent den Auont. Tzijnder tijt sullen zijt houden, nae alle zijn wet ende recht.

4

Ende Mose sprack met den kinderen Israels, dat si dat Passah houden souden.

5

Ende si hielden Passah, inden veerthiensten dage vander yerster maent tsauonts, in de woestijne Sinai. De kinderen Israels dedent, also de HEEre Mose gheboden hadde.

6

Doen waren daer sommighe mannen onreyn, van eenen dooden mensche, dat si niet en consten Passah ghehouden in dien daghe. Die quamen voor Mose ende Aaron inden seluen daghe,

7

Ende spraken tot hem: Wy zijn onreyn van eenen dooden mensche, waerom souden wy minder zijn, dat wy niet brengen en moghen onse giften den HEEre, tzijnder tijt, onder de kinderen Israels?

8

Mose sprack tot hen: Staet stille, ick wil hooren wat v de HEEre ghebiet.

9

⁺ Ende de HEEre sprack met Mose, seggende:

+ B vers 9

10

Seght den kinderen Israels ende spreeckt: Als yemant onreyn van eenen dooden, oft verre van v ouer tvelt is, oft onder uwe vrienden,^* die sal dan noch den HEEre Passah houden.

* 2.Par. 30.a.2.

11

Maer doch inder tweeder maent, inden veerthiensten daghe des Auonts, Ende salt met ongesuerden broode ende met sout eten.

12

Ende en sullender niet af ouer laten totten morghen,^† oock gheen been daer aen breken, ende sullent al nae de manier vanden Passah houden.

† Exo. 12.g.46 Ioan. 19.d.36

13

Maer wie reyn ende niet ouer tvelt en is, ende latet staen den Passah te houden, diens siel sal wtgeroyt worden van sinen volcke, om dat hy zijn gaue niet gebracht en heeft tzijnder tijt den HEEre. Hy sal zijn sonde draghen.

14

Ende als een vreemdelinck by v woont, die sal oock den HEEre Passah houden, ende salt houden nader Wet ende recht des Passah. Dese wet sal v ghelijck zijn, soo wel den vreemdelinck als den Landtbesitter.

15

^+* Ende in dien dage doen de wooninge opgerecht wert,^† bedectese een wolcke op de Hutte des ghetuychenis, ende van tsauonts totten morghen was ouer de wooninghe een ghedaente des viers.

+ C vers 15

* Exo. 40.c.17.

† 3.Re. 8.b.10 Ezech. 9.a.3.

16

Also gebuerdet altijt, datse de wolcke [des daechs] bedeckte, ende de gedaente des viers inder nacht.

17

Ende als haer de Wolcke ophief vander Hutten, so togen de kinderen Israels. Ende ter plaetsen, daer de wolcke staende bleef, daer maeckten de kinderen Israels haren Leger.

18

Nae den woorde des HEEren, trocken de kinderen Israels, ende nae sinen woorde maeckten si haren Legher. Also lange als de wolcke op de wooninghe bleef, so lange laghen si stille:

19

Ende als de wolcke veel dagen op de wooninge bleef, so wachten de kinderen Israels, op de wachte des HEEren, ende si en toghen niet.

20

⁺ Ende wanneert quam dat de wolcke op de wooninghe was, eenich getal van daghen, so maeckten si haren Leger, nae dat woort des HEEren, ende trocken nae den woorde des HEEren,

+ D vers 20

21

Als de wolcke daer was, van tsauonts totten morghen, ende haer dan verhief, so trocken si. Oft wanneer si haer verhief, des daechs oft des nachts, so reysden si ooc.

22

Maer als si twee daghen, oft een maent, oft somtijts wat langher op de wooninghe bleef, soo laghen de kinderen Israels, ende en reysden niet, ende als si haer dan verhief, soo trocken si.

23

Want nae des HEEren mondt, lagen si, ende nae des HEEren mondt toghen si, dat si op des HEEren wacht wachten, nae des HEEren woort, door Mose.