Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Vande Wet der Nazareen, ende haerder ordineringhe. Van de Segheninge der kinderen Israels.

1

⁺ ENde de HEEre sprack met Mose, segghende:

+ A vers 1

2

Spreect totten kinderen Israels, ende segt tot hen: Als een man oft een wijf een sonderlinge gheloofte doet, den HEEre hem te onthouden,

3

Die sal hem van^† Wijn ende stercken dranck onthouden. Wijnedick oft stercken drancs edick en sal hy oock niet drincken, oock niet wat wt Wijnbesien ghemaect wort. Hy en sal versche noch drooghe Wijnbesien eten,

† Iudic. 13.a.4. Amo. 2.c.12.

4

Also langhe als zijn ghelofte duert. Ooc en sal hy niet eten, datmen vanden Wijnstock maeckt, noch wijnkeernen, noch basten.

[p. 51v]

5

^+* Alsoo lange als den tijt sulcker zijnder gheloften duert, en sal geen Schaers op zijn hooft comen, tot dat den tijt wt is, die hy den HEEre ghelooft heeft: Want hy is heylich. Ende sal dat hayr op zijn hooft laten vry wassen.

+ B vers 5

* Leuit. 21.a.5.

6

Alle den tijt ouer, die hy den HEEre ghelouet heeft, en sal hy tot gheenen dooden gaen.

7

Hy en sal hem oock niet verontreynigen, aen die doot zijns vaders, zijns moeders, zijns broeders oft zijns susters. Want de ghelofte zijns Gods is op zijn hooft.

8

Ende alle den tijt zijnder gheloften, sal hy den HEEre heylich zijn.

9

Ende oft yemant voor hem, onuersiens haestelijck sterft, soo sal dat hooft zijnder gheloften onreyn worden.^† Daerom sal hy zijn hooft bescheeren inden daghe zijnder Reyninghen, dat is inden seuensten daghe.

† Act. 18.b.18. 21.c.24.

10

Ende ten achsten daghe, sal hy twee Tortelduyuen brenghen, oft twee ionghe duyuen totten Priester, voor de duere der Hutten des ghetuychenis.

11

Ende de Priester sal de eene tot eenen Sondoffer, ende de ander tot eenen Brantoffer maken, ende hem versoenen. Om dat hy hem aen eenen dooden besondicht heeft, ende alsoo zijn hooft inden seluen daghe heylighen,

12

Dat hy den HEEre, den tijt zijnder gheloften voort wt houde. Ende sal een iarich Lam brenghen tot eenen Schultoffer. Maer de voorleden daghen sullen te niet blijuen, daerom dat zijn ghelofte verontreynicht is.

13

⁺ Dit is de Wet des Verloueden: Als den tijt zijnder gheloften wt is, so salmen hem brenghen voor de duere der Hutten des ghetuychenis.

+ C vers 13

14

Ende hy sal brenghen sinen offer den HEEre, een iarich Lam sonder smette tot eenen Brantoffer, ende een iarich schaep, sonder smette, tot eenen Sondoffer, ende eenen Ram onbesmet, tot eenen Dancoffer,

15

Ende eenen corf met onghesuerde coecken, van Semelmeel met olie ghemengt, ende onghesuerde vladen met olie bestreken, ende haer Spijsoffer ende Drancoffer.

16

Ende de Priester salt voor den HEEre brenghen, ende sal zijn Sondoffer ende zijn Brantoffer maken.

17

Ende den Ram sal hy totten Dancoffer maken, den HEEre, met den corue des ongesuerden broots. Ende sal oock zijn Spijsoffer ende Dranckoffer maken.

18

Ende sal den Verloueden dat hooft zijnder gheloften scheeren, voor de duere der Hutten des ghetuychenis. Ende sal dat hoofthayr zijnder gheloften nemen, ende opt vier worpen, dat onder dat Dancoffer is.

19

⁺ Ende sal de gecoocte schouder nemen vanden Ram, ende eenen onghesuerden koeck wt den corf, ende een onghesuerde vlade, ende salt den Verloueden op zijn handen legghen, nae dien dat hy zijn ghelofte af gheschoren heeft.

+ D vers 19

20

Ende salt voor den HEEre Beweghen. Dat is heylich den Priester metter Beweechborst, ende de Hefschouder. Daer nae mach de Verlouede wijn drincken.

21

Dat is de wet des Verloueden, die zijn offer den HEEre ghelooft, van weghen zijnder gheloften, buyten dat gene, dat hy anders vermach. Soo hy ghelooft heeft, sal hy doen nae de Wet zijnder Ghelooften.

22

Ende de HEEre sprack met Mose, segghende:

23

Segt Aaron ende sine sonen, ende spreeckt: Alsoo suldy segghen

24

Tot den kinderen Israels, als ghyse ghebenedijt.

25

^* De HEEre ghebenedije v, ende behoede v.

De Heere late zijn aensicht lichten ouer v, ende sy v ghenadich.

* Eccl. 36.b.17. Psal. 115.b.12. 128.a.5.

26

De HEEre heffe zijn aensicht ouer v, ende gheue v vrede. Want ghy sult mijnen Naem op de kinderen Israels leggen, dat ickse ghebenedije.