Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Wie dat wten Legher verdreuen sal worden. Ende vanden ghebode der zeloerschap des mans tegen sinen wijue.

1

⁺ ENde de HEEre sprack met Mose, segghende:

+ A vers 1

2

Ghebiet den kinderen Israels,^* dat si wt den Legher brenghen alle lazarige, ende alle die etteruloet hebben, ende die aen dooden onreyn worden zijn.

* Leui. 13.g.46

3

Beyde mannen ende wijuen sullen si buyten brengen voor den Leger, dat si haren Legher niet en veronreynighen, daer ick onder hen in woone.

4

Ende de kinderen Israels deden also, ende brachtense buyten voor den Legher, so de HEEre tot Mose gesproken hadde.

5

Ende de HEEre sprack met Mose, segghende:

6

Segt den kinderen Israels, ende spreect tot hen: Als een Man oft wijf yewers een sonde teghen eenen mensche doet, ende hem aen den HEEre daer mede besondicht, so heeft die siele een schult op haer.

7

^† Ende si sullen haer sonde bekennen, die si ghedaen hebben, ende sullen haer scult versoenen met de hooftsomme, ende dat vijfste deel daer bouen, daer toe doen, ende den ghenen gheuen, aen den welcken si haer beschuldicht hebben.

† Leuit. 5.c.23.

8

Maer en is daer niemant tegenwoordich, diemen de schult betalen soude, soo salment den HEEre geuen, voor den Priester, noch bouen den Ram der versoeninghen, daer hy mede versoent wort.

9

Desghelijc sal alle Heffinghe, van alle dat de kinderen Israels heylighen, ende den Priester offeren, sine zijn.

10

Ende wie yet heylicht, sal ooc sine zijn. Ende wie yet den Priester gheeft, sal oock sine zijn.

11

⁺ Ende de HEEre sprack met Mose, segghende: Segt den kinderen Israels, ende spreect tot hen:

+ B vers 11

12

^† Als erghens eens mans wijf verliepe, ende haer aen hem besondichde,

† Deut. 22.b.13.

13

Ende haer yemant vleesschelijck besliepe, ende tworde doch den man verborgen voor sinen oogen, ende wert bedect, dat si onreyn worden is, ende en canse niet ouertuygen, want si en is daer niet in beuonden.

14

Ende de^* Iuergheest ontsteect hem, dat hi om zijn wijf ijuert, sy sy onreyn oft niet onreyn.

* zeloersen geest

15

Soo sal hyse totten Priester brenghen, ende eenen Offer brenghen voor haer, den thienden Epha ghersten meels, ende en sal daer gheen olie op ghieten, noch wieroock daer op legghen. Want het is eenen Iueroffer, ende eenen Wroechoffer, dat de misdaet wroecht.

16

⁺ Dus salse de Priester brenghen, ende voor den HEEre stellen,

+ C vers 16

17

Ende vanden Heylighen^* water nemen in een Aerden vat, ende stof vanden vloer der Wooninghe int water doen.

* Num. 19.

18

Ende sal dat wijf voor den HEEre stellen, ende haer hooft ontdecken, ende dat Wroechoffer, dat welcke eenen Iueroffer is, op haer hant legghen. Ende de Priester sal in zijn hant bitter veruloect water hebben,

19

Ende sal dat wijf besweeren, ende tot haer seggen: En heeft v gheen man beslapen, ende en sydy van uwen man niet gheloopen, dat ghy v niet ontreynicht en hebt, soo en sullen v dese bittere veruloecte wateren niet schaden.

20

Maer sidy van uwen Man gheloopen, dat ghy onreyn zijt, ende heeft v yemant beslapen, buyten uwen man.

21

So sal de Priester dat wijf besweeren, met alsulcken vloeck, ende sal tot haer seggen: De HEEre sette v tot eenen vloeck, ende tot een vermaledijdinge onder uwen volcke, dat de HEEre v dgye vervuylen, ende uwen Buyck swillen late.

22

Soo gae nv dat veruloeckte water in v Lijf, dat uwen buyck swille, ende v dgye vervuyle. Ende dat wijf sal segghen: Amen, Amen.

23

⁺ Aldus sal de Priester desen vloeck op een cedelken schrijuen, ende met den bitteren water afwasschen,

+ D vers 23

24

Ende sal den wijue vanden bitteren veruloecten water te drincken gheuen. Ende als dat veruloecte bittere water in haer gegaen is,

25

So sal de Priester van haerder hant dat Iueroffer nemen, ende tot eenen Spijsoffer voor den HEEre Beweghen, ende opten Altaer offeren,

26

Te weten, hy sal een hant vol vanden Spijsoffer nemen tot haren Wroechoffer, ende opten Altaer ontsteken,

27

Ende daer nae den wijue dat water te drincken gheuen. Ende als si dat water ghedroncken heeft, is si onreyn, ende heeftse haer besondicht aen haren man: Soo sal dat veruloect water in haer gaen, ende haer bitter zijn, dat haer den buyck swillen, ende de dgye veruuylen sal: Ende dat wijf sal eenen vloeck zijn onder haren volcke.

28

Maer en is alsulcken wijf niet verontreynicht, maer reyn, soo en salt haer nyet schaden, dat si can bevrucht worden.

29

Dat is de Iuerwet, als een wijf van haren man loopt, ende onreyn wort:

30

Oft als eenen man den Iuergheest ontsteect, dat hy om zijn wijf ijuert:

31

Dat hyse stelle voor den HEEre, ende de Priester met haer doe, al nae dese wet. Ende de man sal ontschuldich zijn van deser misdaet, maer dat wijf sal haer misdaet draghen.