Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Hier wort den sone Kahath, Gerson, ende Merari haren dienst ende officie bestelt.

1

⁺ ENde de HEEre sprac met Mose ende Aaron, seggende:

+ A vers 1

2

Neemt de somme der kinderen Kahath, wt den kinderen Leui, nae haren gheslachten ende vaderen huysen,

3

Van^† dertich iaren aen ende daer ouer, tot in dat vijftichste iaer, alle die totten heyr bequaem zijn, dat si de wercken doen inder Hutten des getuychenis.

† 1.Par. 24.a.2

4

Maer dat sal dat officie der kinderen Kahath in de Hutte des ghetuychenis zijn, dat dat Alderheylichste is.

5

^* Als dat heyr op breect, soo sal Aaron ende sine sonen daer in gaen, ende dat voorhancsel af nemen, ende de Arcke des ghetuychenis daer in winden,

* Num. 10.b.12.

6

Ende daer op decken dat decksel van Dasch vellen, ende bouen daer op een gheheel ghelu cleet spreyden, ende zijn boomen daer toe legghen.

7

Ende ouer de Thoon tafel oock een gheel cleet spreyden, ende daer op setten, de Schotelen, Lepelen, Schalen ende Cannen, om wt ende in te ghieten, ende dat daghelijcx broot sal daer op liggen,

8

Ende sullen daer ouer spreyden een Rosetroot cleet, ende dat selue bedecken met eenen decksel van Dasch vellen, ende zijn hantboomen daer by legghen.

9

Ende sullen een gheel cleet nemen, ende daer in winden den Candelaer des lichts, ende zijn Lampen, met sinen snutters, ende blus hoornen, ende alle olie vaten, die totten officie behooren.

10

Ende sullen daerom een decsel doen van Dasch

[p. 50v]

vellen, ende sullense op Hantboomen legghen.

11

⁺ Also sullen si oock ouer den gulden Altaer, een gheel cleet spreyden, ende dat selue bedecken, met dat decsel van Dasch vellen, ende zijn hantboomen daer toe doen.

+ B vers 11

12

Alle de ghereetschap, daer si mede handelen inden Heylichdom, sullen sy nemen, ende een gheel cleet daer ouer doen, ende met een decsel van Daschvellen bedecken, ende op hantboomen legghen.

13

Sy sullen de asschen oock vanden Altaer veghen, ende een schaerlaken cleet daer ouer spreyden.

14

Ende alle zijn ghereetschap daer op legghen, daer mede si daer op handelen, coolpannen, crauwels, schuppen, beckens, met alle de ghereetschap des Altaers, ende sullen daer ouer spreyden een decksel van Daschvellen, ende zijn hantboomen daer toe legghen.

15

Als nv Aaron ende zijn sonen dat also ghedaen hebben, ende dat Heylichdom ende al zijn ghereetschap ghedeckt hebben, als dat heyr op breect. Daer nae sullen^† Kahats kinderen daer in gaen, dat zijt dragen,^* ende en sullen dat Heylichdom niet aenroeren, dat si niet en steruen. Dit is Kahats kinderen last, aen de Hutte des getuychenis.

† Num. 7.b.9.

* 2.Reg. 6.b.6.

16

Ende Eleazar Aaron des Priesters soon, sal dat officie hebben, dat hy ordinere de olie om te lichten, ende de specerije totten ruecwerck, ende dat daghelijcks Spijsoffer, ende de salfolie. Dat hy beschicke de gheheele Wooninghe, ende al wat daer in is, inden Heylichdom ende sine ghereetschap.

17

⁺ Ende de HEEre sprack met Mose ende met Aaron, seggende:

+ C vers 17

18

Ghy en sult den stamme des gheslachts der Kahathiten, hen niet laten verderuen onder den Leuiten.

19

Maer dat suldy met hen doen, dat si leuen ende niet en steruen, ist dat si aenroeren dat Alderheylichste. Aaron ende zijn sonen sullen daer in gaen, ende eenen yeghelijcken stellen tot sinen wercke ende last.

20

Maer si en sullen daer niet ingaen, om te besien onbedacht dat Heylichdom, dat si niet en steruen.

21

^* Ende de HEEre sprack met Mose ende Aaron, seggende:

* Num. 8.d.23.

22

Neemt de somme vanden kinderen Gerson ooc, na haerder vaderen huysen ende gheslachte,

23

Van dertich iaren aen ende daer ouer, tot int vijftichste iaer. Ende ordineert alle de ghene die totten Heyr bequaem zijn, dat si een officie hebben, in de Hutte des ghetuychenis.

24

⁺ Maer dat sal des geslachts der Gersoniten officie zijn, dat si handelen ende draghen.

+ D vers 24

25

Sy sullen de tapeten der Wooninge, ende der Hutten des getuychenis dragen, ende zijn decksel, ende dat decsel van Daschvellen, dat daer bouen ouer is, ende dat Laken inder duere der Hutten des ghetuychenis,

26

Ende dat omhancksel des voorhofs, ende dat laken in de duere der poorten aenden voorhof, dwelcke om de Wooninge, ende al om den Altaer gaet, ende haer zeelen, ende alle de ghereetschap van haerder officien, ende al dat tot haren officie behoort.

27

Na dat woort van Aaron ende sine sonen, sal dat Officie der kinderen Gerson gaen, al wat si draghen ende handelen sullen. Ende ghi sult toe sien, dat sy alle haren last wachten.

28

Dat sal dat officie des geslachts der kinderen der Gersoniten zijn, in de Hutte des getuychenis. Ende haer bewaringe sal onder Ithamars hant, Aarons des Priesters soon zijn.

29

⁺ Merari kinderen, na haren gheslachte ende vaders huyse suldy oock ordineren,

+ E vers 29

30

Van dertich iaren aen ende daer ouer, tot int vijftichste iaer, alle die totten heyr bequaem zijn, dat si een officie hebben in de Hutte des ghetuychenis.

31

Maer op dese lasten sullen si wachten aen alle haer officie in de Hutte des getuychenis. Dat si draghen de berderen der Wooninghe, ende rijchelen, ende columnen, ende voeten,

32

Daer toe de columnen des voorhofs al om, ende voeten, ende naghelen, ende zeelen, met alle haren ghereetschap, nae alle haerder officien. Eenen yeghelijcken suldy zijn deel des last aende ghereetschap te wachten ordineren.

33

Dat si dat officie der gheslachten der kinderen Merari, al dat si handelen sullen inder Hutten des ghetuychenis, onder de hant Ithamars des Priesters, Aarons soons.

34

Ende Mose ende Aaron, metten Hooftlieden der Menichten, telden de kinderen der Kahathithen, nae haren gheslachten ende vaderen huysen,

35

Van dertich iaren ende daer ouer, tot int vijftichste, alle die int Heyr bequaem waren, dat si een officie in de Hutte des getuychenis hadden,

36

Ende de somme was twee duysent, seuenhondert ende vijftich.

37

Dat is de somme des gheslachts der Kahathithen, die alle te beschicken hadden, in de Hutte des ghetuychenis, die Mose ende Aaron telden, na den woorde des HEEren door Mose.

38

⁺ Gersons kinderen werden oock ghetelt, in haren gheslachten ende vaderen huysen,

+ F vers 38

39

Van dertich iaren ende daer ouer, tot int vijftichste, alle die int Heyr bequaem waren, dat si een officie in de Hutte des ghetuychenis hadden,

40

Ende de somme was twee duysent, ses hondert ende dertich.

41

Dat is de somme des gheslachts der kinderen Gerson, die al te beschicken hadden in de Hutte des ghetuychenis, de welcke Mose ende Aaron telden, nae dat woort des HEEren.

42

Merari kinderen werden ooc ghetelt, na haren gheslachten ende vaderen huysen,

43

Van dertich iaren aen ende daer ouer, tot int vijftichste, alle die bequaem int Heyr waren, dat si een officie in de Hutte des ghetuychenis hadden.

44

Ende de somme was drie duysent ende twee hondert.

45

Dat is de somme des gheslachts der kinderen Merari, die Mose ende Aaron telden, nae den woorde des HEEren, door Mose.

46

De somme alder Leuiten, die Mose ende Aaron met den Hooftlieden Israels telden, na haren geslachten ende vaderen huysen,

47

Van dertich iaren ende daer ouer, tot int vijftichste, alle die in gingen om te doen een yeghelijck zijn officie,

[p. 51r]

ende om te draghen den last, in de Hutte des ghetuychenis,

48

Was acht duysent vijf hondert ende tachtentich, die ghetelt werden,

49

Nae den woorde des HEEren door Mose, een yeghelijck tot sinen officie ende last, so de HEEre Mose gheboden hadde.