Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Hier wordt den sonen Leui ende Aarons haren dienst beschreuen ende gheordineert.

1

⁺ DIt is dat gheslachte Mose ende Aaron, als de HEERE met Mose sprac, in dien tijde opten berch Sinai,

+ A vers 1

2

Ende dit zijn de Namen van Aarons sonen.^† De eerste gheboren was Nadab, daer na Abihu, Eleasar ende Ithamar.

† Leuit. 10.a.1. Nu. 26.g.61.

3

Dat zijn de Namen van Aarons sonen,^* die tot Priesters ghesalft waren, ende haer handen geuult totten Priesterdom.

* Leuit. 8.b.12.

4

^* Maer Nadab ende Abihu storuen voor den HEEre, doe si vreemt vier offerden voor den HEEre, inder woestijnen Sinai, ende en hadden gheen sonen. Maer Eleazar ende Ithamar ghebruyckten dat Priesterschap, onder haren vader Aaron.

* Leuit. 10.a.1.

5

Ende de HEEre sprack met Mose, segghende:

6

^* Brengt den stamme Leui herwaerts, ende steltse voor den Priester Aaron, dat si hem dienen,

* Num. 16.b.9. 18.a.2.

7

Ende zijnder ende der gantscher Menichten^† Wacht houden, voor de Hutte des getuychenis, ende dienen inden dienst der Wooninghe,

† 1.par. 10.d.24

8

Ende wachten alle de gereetschap der Hutten des ghetuychenis, ende de bewaringhe der kinderen Israels, te dienen inden dienst der Wooninghe.

9

⁺ Ende sult de Leuiten, Aaron ende sinen sonen toe ordineren tot eender ghiften vanden kinderen Israels.

+ B vers 9

10

Maer Aaron ende sine sonen suldy setten dat si haers Priesterdoms waer nemen.^† Maer in dien een Vreemde daer toe gaet, die sal steruen.

† Num. 3.f.38. 16.e.31.

11

Ende de HEERE sprack met Mose, segghende:

12

^* Siet, ick heb de Leuiten genomen onder de kinderen Israels, voor alle eerste gheboorten, die de Moeder breken, onder den kinderen Israels. Also dat de Leuiten sullen mijn zijn:

* Num. 3.f.41. 8.b.16.

13

^† Want de eerste gheboorten zijn mijn, van dier tijt,^* dat ick alle eerste gheboorten sloech in Egipten lant, doe heylichde ick my alle eerste gheboorten in Israel, vanden menschen aen, totten vee toe, dat si mijn zijn sullen, ick de HEEre.

† Exod. 13.a.2.

* Exod. 12.e.29.

14

⁺ Ende de HEEre sprac in de woestijne Sinai, met Mose seggende:

+ C vers 14

15

Telt de kinderen Leui nae haerder vaderen huysen ende geslachten: Al wat manlijck is, van eender maent out ende daer ouer.

16

Alsoo teldese Mose, na den woorde des HEEren, soo hy gheboden hadde.

17

Ende dit waren de kinderen Leui met namen,^* Gerson, Kahath, Merari.

* Exod. 6.c.14.

18

Maer de namen van Gersons kinderen in haren geslachten, waren, Libni ende Simei.

19

De kinderen Kahath, in haren gheslachte, waren Amram, Iezehar, Hebron, ende Vsiel.

20

Merari kinderen in haren gheslachte, waren Maheli ende Musi. Dit zijn de

[p. 50r]

gheslachten Leui, nae haerder vaderen huysen.

21

⁺ Dit zijn de gheslachten van Gerson: De Libniten ende Semeiten,

+ D vers 21

22

Der seluer somme wert by ghetal gheuonden, seuen duysent ende vijf hondert, al wat manlijck was, een maent out, ende daer ouer.

23

Ende dat selue geslachte der Gersoniten sal sinen Legher maken achter de Wooninghe tegen den Westen.

24

Haer ouerste sy Eliasaph Laels soon:

25

Ende si sullen wachten aen de Hutte des ghetuychenis, namelijck de Wooninge, ende de Hutte, ende haer decsel, ende dat Laken in de duere der hutten des getuychenis,

26

Dat omhancsel aenden Voorhof, ende dat Laken in de duere des Voorhofs, al dat alom de Wooninghe, ende al om den Altaer gaet, ende zijn zeelen, ende al wat tot sinen dienste behoort.

27

Dit zijn Kahats gheslachten: De Amramiten, de Iezehariten, de Hebroniten, ende de Vsieliten,

28

Wat manlijc was, een maent out ende daer ouer, by den ghetale acht duysent ende ses hondert, die de wachte des Heylichdoms waer nemen,

29

Ende sullen haren Legher maken aen de side der Wooninghe, tegen de zuytside.

30

⁺ Haer ouerste sy Elizaphan Vsiels Soon.

+ E vers 30

31

Ende si sullen wachten de Arcke, de Tafel, den Candelaer, den Altaer, ende alle de gereetschap des Heylichdoms, daer si aen dienen, ende dat Laken, ende wat tot sinen dienst behoort.

32

Maer de ouerste bouen alle ouersten der Leuiten, sal Eleazar zijn, Aarons soon des Priesters, ouer de ghene, die daer gecoren zijn te bewaren der Hutte des Heylichdoms.

33

Dit zijn Merari gheslachten: De Maheliten, ende Musiten,

34

Die inden ghetale waren ses duysent ende twee hondert al wat manlijck was, een maent out ende daer ouer.

35

Haer Ouerste sy Suriel Abihails soon, ende sullen haren Leger maken aen de zijde der Wooninge, tegen den Noorden.

36

Ende haer officie sal zijn te bewaren de berderen, ende rijchelen, ende Columnen, ende voeten der Wooninghe, ende alle zijn ghereetschap, ende sinen dienst.

37

Daer toe ooc de Columnen alom vanden Voorhof, met den voeten, ende nagelen, ende zeelen.

38

⁺ Maer voor de Wooninghe, ende voor de Hutte des ghetuychenis teghen den Oosten, sullen Mose ende Aaron, ende sine sonen haren Legher maken, dat si dat heylichdom wachten, ende de kinderen Israels.^* Als een vreemdelinck daer toe gaet, die sal steruen.

+ F vers 38

* Nu. 3.b.10. 31.c.16. 26.g.61.

39

Alle dat getal der Leuiten, die Mose ende Aaron telden, nae haren gheslachten, na dat woort des HEEren, enckel knechtkens,^* een maent oudt ende daer ouer, was tweentwintich duysent.

* Nu. 26.g.62.

40

Ende de HEEre sprack tot Mose: Telt alle de eerste gheboorten, wat manlijck is onder den kinderen Israels, een maent out ende daer ouer, ende neemt dat ghetal haerder namen.

41

Ende de Leuiten,^* suldy my den HEEre wt nemen, voor alle de eerste geboorten der kinderen Israels, ende der Leuiten vee, voor alle eerste gheboorten onder dat vee der kinderen Israels.

* Num. 3.b.12.

42

Ende Mose telde, soo hem de HEEre gheboden hadde, alle eerste gheboorten onder den kinderen Israels,

43

Ende men vant inden ghetale der Namen alder eerste gheboorten, wat manlijck was, een maent out ende daer ouer, inder sommen, tweentwintich duysent, twee hondert ende drientseuentich.

44

⁺ Ende de HEEre sprack met Mose, segghende:

+ G vers 44

45

Neemt de Leuiten, voor alle eerste gheboorten, onder den kinderen Israels, ende dat vee der Leuiten voor haer vee, dat de Leuiten mijn des HEEren zijn.

46

Maer dat los ghelt, vanden twee hondert drientseuentich eerste gheboorten der kinderen Israels, die daer ouer zijn, bouen dat ghetal der Leuiten,

47

^* Suldy vijf sikel nemen van elcken hoofde, nae den sikel des Heylichdoms^† (twintich Gera doet eenen Sikel.)

* Leuit. 27.a.6.

† Exod. 30.b.13. Leuit. 27.d.25 Eze. 45.b.12. Num. 18.c.16.

48

Ende sult dat selue ghelt dat daer ouer is, ouer haer getal, Aaron ende sine sonen gheuen.

49

Doe nam Mose dat los ghelt, datter ouer was, bouen der Leuiten ghetal,

50

Vande eerste gheboorten der kinderen Israels, duysent drie hondert ende vijfentsestich Sikel, nae den Sikel des Heylichdoms.

51

Ende gaft Aaron ende sine sonen, nae den woorde des HEEren, so de HEERE Mose gheboden hadde.