Den Bibel, Inhoudende dat Oude ende Nieuwe Testament (Biestkensbijbel)

Numeri, Dat vierde Boeck Mose.

¶ Dat eerste Capittel.

¶ Hier worden de Kinderen Israels ghetelt, ende ghemonstert nae hare Stammen. Ende alle die totten strijt bequaem zijn. Ende de hooftlieden worden beschreuen. Maer dat gheslachte Leui, wordt totten dienst der Wooninghe gheordineert.

1

⁺ ENde de HEERE sprac met Mose in de woestine Sinai, in de Hutte des getuychenis, opten eersten Dach vander tweeder Maent, inden tweeden Iare, doe sy wt Egipten Lant gegaen waren, seggende:

+ A vers 1

2

^† Neemt de somme der gheheelder Menichten der kinderen Israels, na haren geslachten, ende haerder Vaderen huysen, ende namen. Al wat mannelijck is van hoofde tot hoofde,

† Exod. 30.b.11. Num. 26.a.2.

3

Van twintich iaren aen, ende daer ouer, wat bequaem is om int Heyr te trecken in Israel. Ende sultse tellen nae haren heyren, ghy ende Aaron,

4

Ende sult oock tot v nemen, eenen Hooftman van elcken gheslachte, ouer zijns Vaders huys.

5

Dit zijn de^* Namen der Hooftlieden, die by v staen sullen: Van Ruben sy Elizur Sedeurs sone.

* Nu. 10.b.14.

6

Van Simeon, sy Selumiel SuriSadai soon.

7

Van Iuda, sy Nahesson Aminadabs soon.

8

Van Isaschar, sy Nathaneel Suar sone.

9

Van Sebulon, sy Eliab Helons sone.

10

Van Iosephs kinderen. Van Ephraim, sy Elisama Amihud soon. Van Manasse, sy Gamaliel PedaSur soon.

11

Van BenIamin, sy Abidan Gideons soon.

12

Van Dan, sy Ahieser Ammi Sadai soon.

13

Van Asser sy Pagiel Ochrans Soon.

14

Van Gad, sy Eliasaph Deguels soon.

15

Van Nephthali, sy Ahira Enan sone.

16

Dat zijn de vermaerste der Menichten, de Hooftlieden onder den stammen haerder Vaderen, die daer Hoofden ende Vorsten in Israel waren.

17

⁺ Ende Mose ende Aaron, namense aen soo dat si daer met namen ghenaemt zijn,

+ B vers 17

18

Ende vergaderden ooc de gheheele Menichte, inden eersten dage der tweeder maent, ende rekendense nae haerder gheboorten, na haren gheslachten, ende Vaderen huysen ende namen: Van twintich iaren aen, ende daer ouer, van hooft tot hooft,

19

Soo de HEERE Mose gheboden hadde, ende teldense in de woestijne Sinai.

20

Der kinderen Ruben, Israels eersten soon, nae haerder gheboorte, gheslacht, haerder vaderen huysen, ende namen,

[p. 49r]

van hooft tot hooft, al wat manlijc was, van twintich Iaren ende daer ouer, ende int heyr te trecken bequaem waren,

21

Werden ghetelt totten stamme Ruben, ses en veertich duysent ende vijfhondert.

22

⁺ Van Simeons kinderen, nae haerder gheboorten, gheslachten, vaderen huysen, ghetal ende namen, van hooft tot hooft, wat manlijck was, van twintich Iaren ende daer ouer, ende totten strijde te trecken bequaem was,

+ C vers 22

23

Werden getelt totten stamme Simeons, neghenenvijftich duysent ende drie hondert.

24

Der kinderen Gad nae haerder gheboorten, gheslachte, haerder vaderen huysen, ende namen, van twintich Iaren ende daer ouer, wat int heyr te trecken bequaem was,

25

Werden ghetelt totten stamme Gad, vijfenveertich duysent, seshondert ende vijftich.

26

Der kinderen Iuda, nae haerder gheboorten, gheslachte, haerder vaderen huysen ende namen, van twintich Iaren ende daer ouer, wat int heyr te trecken bequaem was,

27

Werden ghetelt totten stamme Iuda, vierentseuentich duysent, ende seshondert.

28

⁺ Der kinderen Isaschar, nae haerder gheboorten, gheslachten, haerder vaderen huysen ende namen, van twintich iaren ende daer ouer, wat in dat heyr te trecken bequaem was,

+ D vers 28

29

Werden ghetelt totten stamme Isaschar, vierenvijftich duysent, ende vier hondert.

30

Der kinderen Sebulon nae haerder gheboorten, gheslachten, haerder vaderen huysen ende namen, van twintich Iaren ende daer ouer, wat in dat heyr te trecken bequaem was,

31

Werden getelt totten stamme Sebulons seuenenvijftich duysent ende vier hondert.

32

Der kinderen Iosephs, van Ephraim, nae haerder gheboorte, geslachte, haerder vaderen huysen ende namen, van twintich iaren ende daer ouer, wat int heyr te trecken bequaem was,

33

Werden ghetelt tot den stamme Ephraims, veertich duysent ende vijf hondert.

34

⁺ Der kinderen Manasse, nae haerder gheboorten, gheslachte, haerder vaderen huysen ende namen, van twintich Iaren ende daer ouer, wat int heyr te trecken bequaem was,

+ E vers 34

35

Werden ghetelt totten stamme Manasse, tweendertich duysent twee hondert.

36

Der kinderen BenIamin, nae haerder gheboorte, gheslachte, haerder vaderen huysen ende namen, van twintich Iaren ende daer ouer, wat int heyr te trecken bequaem was,

37

Werden ghetelt totten stamme BenIamin, vijfendertich duysent ende vier hondert.

38

Der kinderen Dan, nae haerder gheboorte, gheslachte, haerder vaderen huysen ende namen, van twintich iaren ende daer ouer, wat bequaem was om int heyr te trecken,

39

Werden getelt totten stamme Dan, tweentsestich duysent ende seuen hondert.

40

⁺ Der kinderen Asser, na haerder geboorte, gheslachte, haerder vaderen huysen, ende namen, van twintich iaren ende daer ouer, wat in dat heyr te trecken bequaem was,

+ F vers 40

41

Werden ghetelt totten stamme Asser, eenenveertich duysent ende vijf hondert.

42

Der kinderen Naphthali, na haerder gheboorte, gheslachte, haerder vaderen huysen ende namen, van twintich Iaren ende daer ouer, wat int heyr te trecken bequaem was,

43

Werden ghetelt totten stamme Naphthali, drienvijftich duysent ende vier hondert.

44

Dit zijnse die Mose ende Aaron metten twaelf Vorsten Israels telden, der welcker elck een ouer een huys haerder vaderen was.

45

^+† Ende de somme der kinderen Israels, nae haerder vaderen huysen, van twintich iaren ende daer ouer, wat int heyr te trecken bequaem was onder Israel,

+ G vers 45

† Exod. 12.f.27. Num. 11.c.21.

46

Dier was sesmael hondert duysent, ende drie duysent, vijf hondert ende vijftich.

47

Maer de Leuiten nae haerder vaderen stammen, en werden daer niet mede in ghetelt.

48

Ende de HEEre sprack met Mose, segghende:

49

Den stamme Leui en suldy niet tellen, noch haer somme nemen, onder de kinderen Israels.

50

^† Mer ghy sultse ordineren totter Wooninghe by de ghetuychenis, ende tot alle der ghereetschappen, ende tot alle datter toebehoort. Ende si sullen de Wooninghe draghen, ende alle de ghereetschap, ende sullen in dienste staen, ende haren Legher daerom maken.

† 1.Pa. 24.c.26

51

Ende alsmen reysen sal, soo sullen de Leuiten de Wooninghe af nemen. Maer alsmen dat heyr legheren sal, sullen si de Wooninghe op slaen. Soo wie dat vanden vreemden daer toe gaet, die sal steruen.

52

De kinderen Israels sullen hen legheren, een yeghelijck in sinen Legher, ende by de Baniere zijnder scharen.

53

Maer de Leuiten sullen haren Leger maken om de Wooninghe des getuychenis, op dat daer gheen gramschappe en come ouer de Menichte der kinderen Israels. Daerom sullen de Leuiten de Hutte wachten, aen de Wooninghe des ghetuychenis.

54

Ende de kinderen Israels dedent altemale, so de HEEre Mose gheboden hadde.