Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvij. Capittel.

¶ Van gheloften, ende dat vry Iaer.

1

⁺ ENde de HEEre sprack met Mose, segghende:

+ A vers 1

2

Spreect metten kinderen Israels, ende segt tot hen: Als yemandt den HEEre een bysonder gheloofte doet, dat hy zijn Lijf schattet.

3

Soo sal dat de schattinghe zijn: Eens mans Name twintich Iaer out, tot in dat tsestichte Iaer, suldy schatten op vijftich silueren Sikel, nae den Sikel des Heylichdoms.

4

Eens wijfs name, op dertich Sikel.

5

Van vijf iaer tot op twintich iaren, so suldy hem schatten op twintich Sikel, alst eens mans name is. Maer een wijf op thien Sikel.

6

Van een maent aen, totten vijf iaren toe, soo suldy hem schatten op vijf silueren Sikel, alst eens mans Name is. Maer een wijf, op drie silueren Sikel.

7

Maer is hy tsestich Iaer out, oft daer ouer, soo suldy hem schatten op vijfthien Sikel, alst eens mans Name is. Maer een wijf op thien Sikel.

8

Maer is hy te arm tot sulcker schattinghen, so sal hy hem voor den Priester setten, ende de Priester sal hem schatten. Maer hy sal hem schatten, daer nae als zijn handt, diens die ghelooft heeft, verweruen can.

9

⁺ Maer ist een Vee datmen den HEEre offeren mach: Al watmen den HEEre gheeft, is heylich,

+ B vers 9

10

Men en sals niet wisselen noch manghelen, een goet om een quaet, oft een quaet om een goet. Mer wisselet yemant een Vee om dat ander, soo sullense beyde den HEERE heylich zijn.

11

Maer is dat dier onreyn, datment den HEEre niet offeren en mach, so salment voor den Priester stellen,

12

Ende de Priester salt scatten, oft goet oft quaet is, ende het sal by des Priesters schatten blijuen.

13

Maer wilt yemant lossen, die sal den vijfsten [deel] bouen de schattinghe gheuen.

14

Als yemandt zijn huys heylicht, dattet den HEERE heylich sy, dat sal de Priester scatten oft goet oft quaet sy. Ende daer nae dattet de Priester schattet, soo salt blijuen.

15

Ende oft de ghene, diet gheheylicht heeft, lossen wilt, soo sal hy den vijfsten deel ghelts, ouer dattet gheschat is, daer op geuen, so salt zijn worden.

16

⁺ Als yemandt een stuck ackers den HEEre heylicht van sinen erfgoede, soo sal hy geschat worden, daer na als hy draghet. Draecht hy een Homor gersten, soo sal hy vijftich Sikel siluers ghelden.

+ C vers 16

17

Maer heylicht hy sinen Acker vanden Luytiaer aen, soo sal hy na zijnder weerden ghelden.

18

Maer heeft hy hem gheheylicht nae den Luytiaer, soo sal hem de Priester rekenen, nae de ouer Iaren, totten Luydtiaer toe, ende daer nae minder schatten.

19

Maer wilt de ghene, die hem geheylicht heeft, den Acker lossen, so sal hy den vijfstendeel gelts, ouer dat hy gheschat is, daer op gheuen, so sal hy zijn worden.

20

Maer en wilt hijs niet lossen, maer vercoopten eenen anderen, soo en sal hy hem niet meer lossen.

21

Maer den seluen Acker, als hy inden Luydtiaer los wt gaet, sal den HEEre Heylich zijn, ghelijck eenen verbanden Acker, ende sal des Priesters erfgoet zijn.

22

⁺ Maer als yemant den HEEre eenen Acker heylicht, die hy ghecocht heeft, ende zijn erfgoet niet en is,

+ D vers 22

23

Soo sal hem de Priester rekenen, wat hy ghelt, totten Luytiaer toe, ende hy sal inden seluen daghe, alsulcke schattinghe gheuen, dattet

[p. 48v]

den HEEre Heylich sy.

24

Maer inden Luytiare, sal hy weder comen aenden seluen, van dien hy hem ghecocht heeft, dat hy zijn erfgoet inden Lande sy.

25

Alle weerderinghe sal gheschien, nae den Sikel des Heylichdoms.^† Maer eenen sikel maect twintich Gera.

† Exod. 30.b.13. Num. 3.b.47 Eze. 45.b.12.

26

^* De eerste gheboorte onder dat Vee, die anders den HEEre toebehoort, en sal niemant den HEEre heyligen, het sy eenen Os oft schaep, wandt het is des HEEren.

* Deut. 15.c.19

27

Maer is aenden vee yet onreyns, soo salment lossen, nae zijnder weerden, ende daer ouer geuen den vijfsten [deel.] Mer en wilt hijs niet lossen, so salment vercoopen na zijnder weerden.

28

Men en sal niet verbannens vercoopen noch lossen, dat yemant den HEEre verbannet, van allen dat zijn goet is, het sy mensch, vee, oft erfacker. Want alle dat verbannen, is dat Alderheylichste den HEEre.

29

⁺ Men en sal ooc gheenen verbannen mensche lossen, maer hy sal de doot steruen.

+ E vers 29

30

Alle thiende inden Lande, beyde vanden sade des Lants, ende van vruchten der boomen, zijn des HEEren, ende sullen den HEEre Heylich zijn.

31

Maer wilt yemandt zijn thiende lossen, die sal tvijfste daer bouen gheuen.

32

Ende alle thiende van Runderen, ende Schapen, ende wat onder de Roede gaet, dat is een heylighe thiende den HEEre.

33

Men en sal niet vraghen, oft goet oft quaet sy, men sals oock niet wisselen. Maer wisselet yemant, so salt Heylich zijn, ende niet ghelost worden.

34

Dit zijn de Geboden, die de HEEre Mosi gheboot aenden kinderen Israels, opten Berch Sinai.

¶ Eynde des derden Boecx Mose.