Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvj. Capittel.

¶ Sommighe goede beloften Gods, Indien si sine geboden houden, Ende dreyghinge om grouwelijcken te straffen, waer sy onghehoorsaem zijn ende sine gheboden verachten.

1

⁺ ISt dat^* ghy in mijne settingen wandelen sult, ende mijne gheboden houden, ende doen:

+ A vers 1

* Deut. 28.a.1.

2

So wil ick v regen gheuen tzijnder tijt, ende dat lant sal zijn vrucht geuen, ende de boomen opten velde haer vruchten brengen,

3

Ende den dorschtijt sal dueren, tot datmen den wijngaert leest, ende dat wijngaert lesen sal dueren tot den saeytijt toe. Ende sult broots planteyt hebben,^* ende sult seker in uwen lande woonen.

* 3.Re. 4.b.24

4

Ick wil vrede gheuen in uwen lande,^* dat ghy slapen sult, ende niemandt en sal v verschricken. Ick wil de quade dieren wt uwen lande nemen, ende gheen sweert en sal door v lant gaen.

* Iob. 11.b.19.

5

Ghy^† sult uwe Vianden iagen, ende si sullen voor v henen int sweert vallen.

† Iosue. 23.c.10. Esaie. 30.c.17.

6

Vwer vijue sullen hondert iaghen, ende uwer hondert sullen thien duysent iagen. Wandt v Vianden sullen voor v henen vallen int sweert,

7

Ende ick wil my tot v keeren, ende wil v wassen, ende vermeerderen laten, ende wil mijn verbont v houden.

8

⁺ Ende ghy sult van dat oude eten, ende als dat nieuwe coemt, dat oude laten varen.

+ B vers 8

9

^† Ick wil mijn wooninghe onder v hebben, ende mijn siele en sal v niet verworpen.

† Exo. 29.g.45 2.Cor. 6.c.16.

10

Ende wil onder v wandelen, ende wil uwe God zijn, so sult ghi mijn volc zijn.

11

Want ic ben de HEEre uwe God, die v wt Egipten lant gheleyt heeft, om dat ghy henlieden knechten niet zijn en sout. Ende heb uwe iock ghebroken, ende heb v oprechtelijck laten wandelen.

12

^* Maer ist dat ghy my niet en hoort, ende dese geboden niet alle en doet,

* Deut. 28.b.15. Malac. 2.a.2. Tren. 2.e.17.

13

Ende ist dat ghy mijne insettinghen veracht, ende v siele mijne rechten verworpt, dat ghy niet en doet alle mijn gheboden, ende laet ghy mijn verbont staen.

14

Soo wil ick v oock sulcx doen: Ic wil v versoecken met verschricken: Met gheswel, ende met Cortsen, dat v de aensichten veruallen, ende de Lijuen versmachten. Ghy sult te vergheefs v saet saeyen, ende uwe vianden sullent verslinden.

15

⁺ Ende ick wil mijn aensicht teghen v setten,^† ende sult voor uwe vianden gheslaghen worden, ende die v haten, sullen ouer v heerschappije hebben.^† Ende sult vlieden als v niemant en iaecht.

+ C vers 15

† 4.Re. 17.a.6.

† Prou. 28.a.1.

16

Maer so ghy my bouen dat noch niet en hoort. Soo wil ick dies noch seuenmael te meer maken, om v te straffen, om uwer sonden wille,

17

Op dat ick uwe hooueerdicheyt ende hertneckicheyt breke. Ende wil uwen hemel ghelijck ijser, ende uwe aerde ghelijck metael maken,

18

Ende uwe moeyte ende arbeyt sal verloren zijn, dat uwe landt sinen wasdom niet en gheue, ende de boomen inden landen haer vruchten niet en brenghen.

19

⁺ Ende ist dat ghy teghen my wandelt, ende en wildy my niet hooren, so wil ick dies noch seuenmael meer maken om op v te slaen, om uwer sonden wille.

+ D vers 19

20

Ende wil wilde dieren onder v seynden, die sullen uwe kinderen verslinden, ende uwe Vee verderuen, ende v cleyne van getale maken, ende uwe straten sullen woest worden.

21

Maer ist dat ghy v hier mede noch niet onderwijsen en laet, ende wandelt teghen my.

22

Soo wil ick oock tegen v wandelen, ende wil v noch seuenmael meer slaen, om uwer sonden wille,

23

Ende wil een wraecksweert ouer v brenghen, dat mijn verbont wreken sal.

24

Ende oft ghy v vergadert in uwe steden, soo wil ick doch de pestilentie onder v seynden, ende wil v in uwer vianden handen gheuen.

25

Dan wil ic v den voorraet des broots verderuen, dat thien wijuen v broot in eenen ouen sullen backen, ende uwe broot salmen met ghewichte wt weghen,^† ende als ghy eet, soo en suldy niet versaet worden.

† Hos. 4.b.10. Mich. 6.c.14

26

Maer ist dat ghy my noch daer door niet en hoort, ende teghen my wandelt.

27

Soo wil ick tegen v oock in een toornighe teghentheyt wandelen, ende wil v seuenmael meer straffen om uwer sonden wille.

28

⁺ Dat ghy^† uwer sonen ende dochteren vleesch sult eten.

+ E vers 28

† 4.Reg. 6.f.28

29

Ende wil uwe hooghe Altaren te niete doen, ende uwe beelden wtroeyen. Ende wil uwe lichamen op uwe Afgoden worpen, ende mijn siele sal van v walgen.

30

Ende wil uwe steden woeste maken, ende ws Heylichdoms kercken inworpen, ende en wil uwen soeten rueck niet riecken.

31

Alsoo wil ick dat lant woest maken, dat uwe vianden die daer in woonen hen daer af ontsetten sullen.

32

^† Maer v wil ick onder de Heydenen verstroyen, ende dat sweert wt trecken achter v, dat v lant woest sal zijn, ende uwe steden verstoort.

† 4.Re. 24.c.10 25.a.1.

33

^† Dan sal den lande zijn vieren ghenoeghen, alsoo langhe alst woest leyt, ende ghy inder Vianden lant zijt. Iae dan sal

† 2.Pa. 36.d.21.

[p. 48r]

dat lant vieren, ende hem zijn vieren laten ghenoeghen, soo langhe alst woest leyt.

34

Daerom dattet niet gheuieren en conde doen ghijt sout laten vieren, doen ghy daer in woonde.

35

⁺ Ende de gene die van v ouerblijuen,^† wil ic een weeck versaecht herte maken, in haerder Vianden lant, datse een ruysschende blat iaghen sal. Ende sullen daer af vlieden, als oftse een sweert iaechde, ende vallen daerse niemandt en iaecht,

+ F vers 35

† Iob. 15.c.21.

36

Ende de eene sal ouer den anderen henen vallen, ghelijck als voor den sweerde al en iaechtse niemant. Ende ghy en sult v niet verheffen doruen teghen uwe Vianden,

37

Ende ghy sult onder de Heydenen vergaen, ende uwer Vianden lant sal v verslinden.

38

Maer die van v ouerblijuen, die sullen in haer misdaet versmachten, inder vianden lant, oock sullen si in haerder vaderen misdaet versmachten.

39

Soo sullen si dan bekennen haer misdaet, ende haerder Vaderen misdaet, met welcken si hen aen my besondicht, ende tegen my ghewandelt hebben.

40

Daerom wil ick teghen hen oock wandelen, ende wilse in haerder vianden lant wech drijuen. Soo sal hen emmers haer onbesneden herte verootmoedighen, ende dan sullen si hen de straffe haerder misdaet, wel laten ghenoeghen.

41

^+† Ende ick wil ghedachtich worden mijns verbonts met Iacob, ende mijns verbonts met Isaac, ende mijns verbonts met Abraham.

+ G vers 41

† Deut. 4.e.31.

42

Ende sal dies lants ghedachtich worden, dat van hen verlaten is, ende hen sine vierdaghen laet ghenoeghen, dewijle dattet woest leyt van hen, ende hen de straffe haerder misdaet wel laten ghenoeghen. Daerom dat sy mijn Rechten veracht hebben, ende haer siele van mijnen Settinghen walghinge ghehadt heeft.

43

Oock als si alreede inder vianden lant zijn, soo en heb icse euenwel niet verworpen, ende mi en walcht haerder niet alsoo, dattet met hen wt zijn soude, ende mijn verbont met hen niet meer en soude gelden. Want ic ben de HEEre haren God.

44

Ende wil voor hen aen mijn^† eerste verbont gedencken, doen icse wt Egipten lande leyde, voor de ooghen der Heydenen, dat ick haer Godt ware, Ick de HEEre.

† Exod. 19.a.5.

45

Dit zijn de Settingen, ende Rechten, ende Wetten, die de HEERE tusschen hem, ende den Kinderen Israels ghemaect heeft, opten Berch Sinai, door de hant Mose.