Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiiij. Capittel.

¶ Vanden olie totten lampen ende candelaren, vanden thoonbrooden, van de straffinghe des lasterens, ende vloeckens.

1

⁺ ENde de HEEre sprack met Mose, segghende:

+ A vers 1

2

Ghebiet den kinderen Israels,^† dat si tot v brenghen suyuer gestooten boomolie, om te lichten, die bouen in de lampen daghelijcx ghegoten worde,

† Exod. 27.d.20

3

Buyten voor den voorhanck des ghetuychenis, inder Hutten des ghetuychenis. Ende Aaron salt toe bereyden des Auonts ende des morgens voor den HEEre altijts, dat sy een eewich recht uwen nacomelinghen.

4

Maer hy sal de lampen opten suyueren candelaer stellen, voor den HEEre altijts.

5

⁺ Ende sult Semelmeel nemen, ende twaelf koecken daer van backen, twee thienden sal eenen koec hebben.

+ B vers 5

6

^† Ende sultse legghen op de suyuer tafel, ende dat alsoo, te weten, ses op een Rije voor den HEEre.

† Exod. 25.c.30.

7

Ende sult op de selue legghen reynen Wieroock, dattet Ghedencbroot sy totten viere des HEEren.

8

Alle Sabbath sal hijse voor den HEEre bereyden altijt, vanden kinderen Israels, tot een eewich verbont.

9

Ende sullen Aarons ende zijnder sonen zijn, die sullense eten in die heylige stede, want dat is zijn Alderheylichste, vanden offer des HEEren, tot eenen eewighen rechte.

10

⁺ Maer daer ginc eens Israelijts wijfs soon wt, die eens Egiptischen mans kint was, onder de kinderen Israels, ende wert kijuende inden Legher, met eenen Israelijtschen Man,

+ C vers 10

11

^* Ende lasterde den NAEM [Gods], ende vloecte.^† Doen brochten si hem tot Mose, (maer zijn Moeder hiet Selomith, een dochter Debri, vanden stamme Dan)

* Exod. 20.b.7.

† Leuit. 5.a.1. Num. 15.d.33.

12

Ende leyden hem geuangen, tot dat hen een claer antwoort werdt door den mont des HEEren.

13

Ende de HEEre sprack met Mose, seggende:

14

Brengt den vloecker buyten voor den Legher, ende laet alle de ghene diet gehoort hebben, haer handen op zijn hooft legghen, ende laet hem de gantsche Menichte steenen.

15

Ende segt den kinderen Israels:^† Wie dat sinen God vloect, die sal zijn sonde draghen:

† Mat. 26.g.65

16

Wie des HEEren Naem lastert, die sal de doot steruen, de gheheele Menichte sal hem steenen. Ghelijck de vreemdelinck, soo sal ooc de Lantbesitter zijn: Als hy den Naem lastert soo sal hy steruen.

17

⁺ Soo wie erghens eenen mensche verslaet, die sal de doot steruen.

+ D vers 17

18

Maer wie dat een Vee verslaet, die salt betalen.^† Lijf om Lijf.

† Exod. 21.c.23. Deut. 19.c.21. Iudic. 1.b.7. Mat. 5.e.38.

19

Ende wie sinen naesten verleemt, dien salmen doen soo hy ghedaen heeft:

20

Schade om schade, ooghe om ooghe, tant om tant. Soo hy eenen mensche verleemt heeft, soo salmen hem weder doen.

21

Also, dat so wie een Vee verslaet, die salt betalen, maer wie een mensche verslaet, die sal steruen.

22

Eenderley recht, sal onder v zijn, den Vreemdelingen ghelijck den Lantbesitter, want ick ben de HEEre uwe Godt.

23

Maer Mose seydet den kinderen Israels,^† ende brachten den vloecker wt voor den Legher, ende steenichden hem. Alsoo deden de kinderen Israels, so de HEEre Mose gheboden hadde.

† 3.Reg. 21.b.13. Acto. 7.g.58.