Den Bibel, Inhoudende dat Oude ende Nieuwe Testament (Biestkensbijbel)

[p. 46r]

¶ Dat .xxiij. Capittel.

¶ Vande vierdaghen ende hooghe feestdaghen, als den Sabbath, Paesschen, Pinxten, Louertenten.

1

⁺ ENde de HEEre sprack met Mose, seggende:

+ A vers 1

2

Segt den kinderen Israels, ende spreect tot hen: Dit zijn de feesten des HEEren, die ghy heylich ende mijn feesten heeten sult daer ghy te samen coemt.

3

^† Ses daghen suldy arbeyden, maer den seuensten dach, is den grooten heylighen Sabbath daer ghy te samen coemt. Geen arbeyt en suldy daer in doen, want het is den Sabbath des HEEren in allen uwen Wooninghen.

† Exod. 23.b.12. Deut. 5.b.13.

4

Maer dit zijn de feesten des HEEren, die ghy heylighe feesten heeten sult, daer ghy te samen coemt.

5

Den^† veerthiensten dach der eerster maent, tusschen den auont is des HEEren Paesschen.

† Exod. 12.c.17. Num. 28.c.16. Eze. 45.c.21.

6

Ende inden vijfthienden vander seluer maent, is de feeste der onghesuerder brooden des HEEren.

Dan suldy seuen dagen onghesuert broot eten.

7

⁺ Den eersten dach, sal heylich onder v heeten, daer ghy te samen coemt. Soo en suldy gheen dienstwerck doen,

+ B vers 7

8

Ende den HEEre offeren, seuen daghen. Den seuensten dach sal oock heylich heeten, daer ghy te samen coemt. Daer in en suldy oock geen dienstwerck doen.

9

Ende de HEEre sprack met Mose, segghende:

10

Segt den kinderen Israels, ende spreect tot hen: Als ghy int lant coemt,^* dat ick v gheuen sal, ende sult oogsten, so suldy eenen schoof der eerstelinghen des oogsts totten Priester brenghen,

* Num. 15.b.18.

11

Soo sal dien schoof beweecht worden voor den HEEre, dat het van v aenghenaem sy. Maer sulcx sal de Priester doen, Des anderen daechs nae den Sabbath.

12

Ende sult inden dage als uwen schoof beweecht wort, een Brantoffer den HEEre doen, van eenen lamme dat sonder smette, ende iarich sy,

13

⁺ Met den Spijsoffer, twee thiende Semelmeels met olie ghemengt, tot eenen offer den HEEre, eens soeten ruecx. Daer toe oock Dranckoffer, een vierendeel van een Hin wijns.

+ C vers 13

14

Ende ghi en sult^† gheen nieu broot, noch koecken, noch Coren te voren eten, tot opten dach als ghy uwen God offer brengt. Dat sal een recht zijn uwen nacomelinghen, waer dat ghy woont.

† Iosue. 5.c.12.

15

^* Daer nae suldy tellen vanden anderen daghe des Sabbaths, doen ghy de beweechschoouen bracht, seuen gantsce Sabbathen,

* Deut. 16.b.9.

16

Tot des anderen daechs des seuenden Sabbaths, te weten, vijftich daghen suldy tellen, ende nieuwe Spijsoffer den HEEre offeren,

17

Ende wt allen uwen wooninghen suldijt offeren, te weten, twee beweechbrooden, van twee thiende Semelmeels ghesuert ende ghebacken, tot eerstelinghen den HEEre.

18

Ende ghy sult daer oock brengen met uwe broot,^* seuen iarighe lammeren sonder smette, ende eenen ionghen osse, ende twee Rammen, dat sal des HEEren Brantoffer, Spijsoffer, ende Dranckoffer zijn. Dat is een offer eens soeten ruecks den HEEre.

* Num. 28.d.23

19

⁺ Daer toe suldy maken eenen gheyten bock, tot eenen Sondoffer, ende twee iarighe lammeren, tot eenen Dancoffer.

+ D vers 19

20

Ende de Priester salt beweghen met dat broodt der eerstelinghen voor den HEEre tot den twee lammeren, ende sal den HEEre heylich, ende des Priesters zijn.

21

Ende sult desen dach wtroepen, want hy sal onder v heylich heeten, daer ghy te samen coemt: Gheen dienstwerc en suldy doen. Een eewich recht sal dat zijn, by uwen naecomelinghen, waer dat ghy woont.

22

^* Maer als ghy v lant oogst, so en suldijt niet geheelijck op den velde insnijden, oock niet altemael soo nauwe op oogsten, maer sullet den armen ende vreemdelingen laten. Ick ben de HEEre uwe Godt.

* Leuit. 19.c.9. Deu. 24.d.19

23

Ende de HEEre sprack met Mose, segghende:

24

Spreeckt met den kinderen Israels, ende segt:^† Inden eersten daghe der seuender maent, suldy den heylighen Sabbath der blasingen houden, daer ghi te samen coemt,

† Num. 29.a.1.

25

Soo en suldy gheen dienstwerck doen, ende sult den HEEre offeren.

26

⁺ Ende de HEEre sprack met Mose, seggende:

+ E vers 26

27

^* Den thienden dach van deser seuender maent, is der versoeninghen dach, die sal by v heylich heeten, dat ghy te samen coemt. Soo suldy uwe lichaem castien, ende den HEEre offeren,

* Leuit. 16.g.29 Num. 29.a.7.

28

Ende en sult gheenen arbeyt doen in desen daghe, want het is den versoendach, dat ghy versoent wort voor den HEEre uwen Gode:

29

Want wie zijn lichaem niet en castijt, in desen daghe, die sal wt sinen volcke gheroeyt worden.

30

Ende soo wie in desen daghe eenich werck doet, die sal ick te niete doen wt sine volcke.

31

Daerom en suldy gheenen arbeyt doen. Dat sal een eewich recht zijn uwen nacomelingen, waer dat ghi woont.

32

Het is uwen grooten Sabbath, dat ghy uwen lichamen castijt, inden neghensten daghe deser maent, tsauonts suldy desen Sabbath houden, vanden eenen Auont totten anderen.

33

⁺ Ende de HEEre sprack met Mose, segghende:

+ F vers 33

34

Spreeckt metten kinderen Israels ende segt:^† Inden vijfthienden dage van deser seuender maent, is de feeste der Louerhutten, seuen dagen den HEEre.

† Num. 29.b.12 3.Esd. 5.e.49 2.Mach. 1.b.5

35

Den eersten dach sal heylich heeten, dat ghy te samen coemt. Gheen dienstbaerheyt en suldy doen.

36

Seuen daghen suldy den HEEre offeren. Den achtsten dach sal oock heylich heeten, dat ghy te samen coemt, ende sult uwen offer den HEEre doen: Want het is der vergaderinghen dach, gheen dienstwerck en suldy doen.

37

Dat zijn de Feesten des HEEren, die ghy voor heylich sult houden, dat ghi te samen coemt, ende den HEEre offer doet: Brantoffer, Spijsoffer, Danckoffer, ende ander offer, een yeghelijck na sinen dage,

38

Behaluen wat den Sabbath des HEEren, ende v gauen, ende gheloften

[p. 46v]

ende vrywillighe gauen zijn, die ghy den HEEre gheeft.

39

⁺ Soo suldy nv inden vijfthienden daghe der seuender maent, als ghi dat incomen vanden lande, inghebracht hebt, dat feest des HEEren houden, seuen daghen lanck.

+ G vers 39

40

Ten eersten daghe ist Sabbath, ende ten achsten daghe ist ooc Sabbath. Ende ghy sult ten eersten dage vruchten nemen van schoone boomen, palmen rijseren, ende meyen van dichte boomen ende beecwilghen, ende seuen daghen vrolijck zijn voor den HEEre uwen Godt,

41

Ende sult den HEEre also des iaers dat feest houden seuen daghen. Dat sal een eewich recht zijn by uwen nacomelinghen, dat si in de seuenste maent also vieren.

42

Seuen daghen suldy in de Louerhutten woonen. Wie datter een Lantbesitter is in Israel, die sal in de Louerhutten woonen,

43

Op dat v nacomelinghen weten, hoe ic de kinderen Israels in Hutten heb laten woonen, doen icse wt Egipten lant leyde. Ick ben de HEEre uwe God.

44

Ende Mose seyde den kinderen Israels, sulcke feesten des HEEren.