Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxj. Capittel.

¶ Hoe dat de Priesters reyn ende onbesmet zijn sullen, Ende hoe si behooren te leuen, ende haer nerghens mede en ontsuyueren.

1

⁺⁺ ENde de HEEre sprack tot Mose: Segt den Priesteren Aarons sonen, ende spreeckt tot hen: Een Priester en sal hem aen geenen dooden zijns volcx veronreynighen,

+ A vers 1

+ Ezech. 44.d.

2

Behaluen aen sinen Bloet vrient die hem aen den naesten toe behoort. Als aen zijn moeder, aen zijn Vader, aen zijn sone, aen zijn dochter, aen zijn broeder,

3

Ende aen zijn suster, die noch een maecht ende noch by hem is, ende gheens mans wijf geweest en is, aen deser mach hy hem verontreynigen.

4

Anders en sal hy hem niet verontreynigen, erghens aen eenen die hem aengaet onder sinen volcke, dat hy hem ontheylighe.

5

Hy en sal ooc geen^† platten maken op zijn hooft, noch sinen baert afscheeren, ende aen haren lichaem gheen teeken snijden.

† Cruynen. Leui. 19.f.28 Num. 6.a.5. Eze. 44.c.20.

6

Sy sullen haren Gode heylich zijn, ende niet ontheyligen den naem haers Gods, want si offeren des HEEren offer, dat broot haers Gods. Daerom sullen si Heylichdom zijn.

7

^+* Sy en sullen gheen Hoeren nemen, noch gheen gheschoffierde, noch die van haren man verstooten is, want hy is heylich sinen Gode.

+ B vers 7

* Osee. 1.a.2. 1.Tim. 3.a.2.

8

Daerom sult ghi hem Heylich houden, want hy offert dat broot zijns Gods. Hy sal v Heylich zijn. Want ick ben heylich, de HEEre die v heylicht.

9

Als eens Priesters dochter beghint te hoereren die salmen met vier verbranden. Want si heeft haren vader ghescheynt.

10

Soo wie dat hooghe Priester is, onder sine broederen, op diens hooft dat de salfolie ghegoten ende zijn hant gheuult is, dat hem aenghedaen worden de cleederen, die en sal zijn hooft niet ontdecken, ende zijn cleederen niet doorsnijden,

11

Ende en sal tot gheenen^† dooden comen, ende en sal hem noch ouer Vader noch ouer Moeder verontreynighen.

† Luc. 9.f.60.

12

Hy en sal wt den Heylichdom niet gaen, dat hi niet en ontheylighe dat Heylichdom zijns Gods. Want de heylighe Croone, de salfolie zijns Gods is op hem. Ick ben de HEEre.

13

^+* Een maecht sal hy te wijue nemen,

+ C vers 13

* Eze. 44.d.21. Mala. 2.b.11.

14

Maer gheen Weduwe, noch verstooten, noch gheschoffierde, noch Hoere. Maer een maecht van sinen volcke, sal hy tot eenen wijue nemen,

15

Op dat hy zijn saet niet en ontheylighe onder sinen volcke. Want ick ben de HEEre die hem heylicht.

16

Ende de HEEre sprack met Mose, segghende:

17

Spreect met Aaron, ende segt: Als aen yemande van uwen sade in v gheslachte een ghebreck is, die en sal niet hier toe treden, dat hy dat broot zijns Godts offere.

18

^† Want niemandt, aen dien een ghebreck is, sal hier toe treden, hy sy blint, lam, met een seltsame nuese, met eenen onghewoonlijcken lede,

† 2.Reg. 5.b.8.

19

Oft die aen eenen voet oft hant ghebreckelijck is,

20

Oft ghebult is, oft een vel

[p. 45v]

ouer de oogen heeft, oft scheel is, oft grillich, oft schorft, oft die gheschuert is.

21

⁺ So wie dat nv van Aarons des Priesters sade een ghebreck aen hem heeft, die en sal niet hier toe treden om te offeren den offer des HEEren, want hy heeft een ghebreck. Daerom en sal hy totten broode zijns Gods niet genaken, dat hijt offere,

+ D vers 21

22

Nochtans sal hy vanden brooden zijns Gods eten, beyde vanden heylighen, ende vanden Alderheylichsten.

23

Maer totten voorhancsel en sal hi doch niet comen, noch totten Altaer niet gaen, dewijle dat ghebreck aen hem is, dat hy niet en ontheylighe mijn Heylichdom. Want ick ben de HEEre diese heylicht.

24

Ende Mose seyde sulcx tot Aaron ende sinen sonen, ende tot allen kinderen Israels.