Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ Hier wort verboden datmen den Afgodt Molech niet gheuen en sal, ende noch meer andere worden hier verboden.

1

⁺ ENde de HEEre sprack met Mose, segghende:

+ A vers 1

2

Seght den kinderen Israels: Wie dat onder den kinderen Israels, oft een vreemdelinck die in Israel woont,^* van sinen sade den Molech gheeft, die sal de doot steruen, dat volck des landts sal hem steenighen.

* Leuit. 18.c.21.

3

Ende ick wil mijn aensicht setten teghen sulcken mensche, ende wil hem wt sinen volcke wtroeyen, om dat hy den Molech van sinen sade ghegheuen, ende mijn Heylichdom veronreynicht, ende mijnen heylighen Naem ontheylicht heeft.

4

Ende indien dat dat volck des landts door de vingheren sien sal, met den mensche die van sinen sade den Molech ghegheuen heeft, dattet hem niet en doode,

5

So wil ick doch mijn aensicht teghen den seluen mensche setten, ende tegen zijn gheslachte, ende wil hem, ende alle die hem nae gehoereert hebben met den Molech, wt haren volcke roeyen.

6

Als een siele haer totten waerseggheren ende teeckenbedieders keeren sal, dat si hen nae hoereert. So wil ick mijn aensicht tegen de selue siele setten, ende wilse wt haren volcke royen.

7

^† Daerom heylicht v, ende weest heylich. Want ick ben heylich de HEEre, uwe Godt,

† Leuit. 19.a.2. Num. 11.d.18. Iosu. 3.a.5.

8

Ende hout mijn settinghen, ende doetse. Want ick ben de HEEre, die v heylicht.

9

^+† Wie dat sinen vader oft zijne moeder vloeckt, die sal de doot steruen, zijn bloedt si op hem, daerom dat hy zijn vader oft moeder gheuloeckt heeft.

+ B vers 9

† Exo. 21.b.17. Pro. 20.c.20.

10

^* Wie dat Ouerspel doet met yemants wijf, die sal de doot steruen, beyde de ouerspeelder, ende de ouerspeelster. Daerom dat hy met zijns naesten wijf, dat houwelijck ghebroken heeft.

* Deut. 22.c.22. Leui. 18.c.20.

11

^† Als yemandt by zijns Vaders wijf slaept, dat hy zijns Vaders schamelheyt ontdeckt heeft, die sullen beyde de doot steruen. Haer bloet si op hen.

† Leuit. 18.a.8. Deut. 27.c.21. 1.Cor. 5.a.1.

12

^† Als yemandt by zijns soons wijf slaept, so sullen si beyde de doot steruen. Want si hebben een schande begaen, haer bloet si op hen.

† Leui. 18.b.15. Gene. 38.c.13.

[p. 45r]

13

^* Als yemant by eenen Iongen slaept, ghelijck by eenen wijue, die hebben eenen grouwel ghedaen, ende sullen beyde de doot steruen. Haer bloet sy op hen.

* Leuit. 18.c.22. Rom. 1.d.27.

14

Als yemant een wijf neemt,^* ende haer Moeder daer toe, die heeft een laster begaen, men sal hem met vier verbernen, ende haer beyde oock, datter gheenen laster en sy onder v.

* Deut. 27.c.24

15

^* Als yemant by een Vee leyt, die sal de doot steruen, ende dat Vee salmen verworghen.

* Leuit. 18.c.23. Deut. 27.c.22. Exod. 22.c.19.

16

Als een wijf haer erghens tot eenighen Vee maeckt, dat si met hem te doen heeft, die suldy dooden, ende dat Vee oock, si sullen de doot steruen. Haer bloet sy op hen.

17

^+* Als yemant zijn Suster neemt, zijns vaders dochter, oft zijnder Moeder dochter, ende haer schamelheyt besiet, ende sy weder sine schamelheyt, dat is een Bloetschande. Die sullen wtgheroeyt worden voor de lieden haers volcx. Want hy heeft zijnder suster schamelheyt ontdect, hy sal zijn misdaet draghen.

+ C vers 17

* Leuit. 18.a.9.

18

^* Als een man by eenen wijue slaept, ter tijt haerder crancheyt, ende ontdect haer schamelheyt, ende ontdect haer fonteyne, ende si ontdect de fonteyne haers bloets. Die sullen beyde wt haren volcke gheroeyt worden.

* Leuit. 15.d.23. 18.c.19.

19

De^† schamelheyt uwer Moeder suster, ende ws Vaders Suster schamelheyt en suldy niet ontdecken. Want aldus danige heuet zijn naeste Bloet vriendinne ontdect, ende si sullen haer schult draghen.

† Leuit. 18.b.12.

20

Als yemant by zijns Vaders broeders wijf slaept, die heeft zijns Ooms schamelheyt ontdect. Sy sullen haer sonden draghen, sonder kinderen sullen si steruen.

21

^† Als yemandt zijns broeders wijf neemt, dat is een schandelijcke daet, si sullen sonder kinderen zijn, om dat hy zijn broeders schamelheyt ontdect heeft.

† Leuit. 18.b.16 Mat. 14.a.4

22

⁺ Soo hout nv alle mijn settinghen, ende rechten, ende doet daer nae, op dat v dat lant niet wt en spouwe,

+ D vers 22

23

Daer ick v in leyde, dat ghy daer in woonen sout. Ende en wandelt niet inde settinghen der Heydenen, die ick voor v wtstooten sal.^† Want sulcx alle hebben si ghedaen, ende ick heb eenen grouwel aen hen ghehadt.

† Deut. 9.a.4.

24

Maer v segge ick, ghy sult ghener lant besitten. Want ick wil v een lant tot eender erffenissen gheuen, daer melck ende honich in vloeyt. Ick ben de HEEre uwe God, die v vanden volcken afghesondert heeft,

25

Dat ghy oock afsonderen sult dat reyne Vee, vanden onreynen, ende onreyne vogelen, vanden reynen, ende uwe sielen niet en veronreynicht aenden Vee, aenden voghelen, ende aen alle dat op Aerden cruypt,^* dat ick v afghesondert heb, dat het onreyn sy,

* Leuit. 11.a.2. Deut. 14.a.4

26

Daerom suldy my heylich zijn, want ick de HEEre ben heylich, die v afgesondert heeft vanden volcken, op dat ghy mijn waert.

27

Als een man oft een wijf, een^* waerseggher, oft teekenbedieder zijn sal, die sal de doot steruen, men salse steenigen. Haer bloet sy op hen.

* Deut. 18.b.11. 1.Reg. 28.b.8.