Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ In dit Capittel zijn menigerley geboden ende Insettinghen.

1

⁺ ENde de HEEre sprack met Mose, segghende:

+ A vers 1

2

Spreect met den kinderen Israels, ende seght tot hen:^† Ghy sult Heylich zijn, want ick ben Heylich, de HEEre uwe Godt.

† Leui. 11.f.44 20.a.7. 1.Pet. 1.c.16.

3

Een yegelijck vreese zijn Moeder ende Vader. Houdt mijn vierdagen, want ic ben de HEEre uwe Godt.

4

Ghy en sult v niet totten Afgoden keeren, ende en sult v gheen ghegoten goden maken, want ick ben de HEEre uwe Godt.

5

⁺ Ende als ghy den HEEre wilt Dancoffer doen, soo sult ghy offeren, dat hem behagen can.

+ B vers 5

6

^† Maer ghy sultet in dien seluen dage eten, als ghijt offert, ende ten tweeden dage. Maer watter ouer blijft tot op den derden dage, salmen met viere verbranden.

† Leui. 7.b.16.

7

Maer ist datter yemandt inden derden daghe af eet, so is hy eenen grouwel, ende en sal gheen genade vinden.

8

Ende die selue eter, sal zijn misdaet dragen, dat hy dat Heylichdom des HEEren ontheylicht, ende alsulcken siele sal wtgheroeyt worden van haren volcke.

9

^+† Als ghy v landt oogst, so en suldijt niet aenden eynden al omme afsnijden, oock niet altemael so nauwe op vergaderen.

+ C vers 9

† Leui. 23.d.22. Deu. 24.d.19

10

Also en suldy ooc uwen wijngaert niet so nauwe lesen, noch de afgheuallen besijen oplesen: Mer den Aermen ende vreemdelingen suldijt laten, want ic ben de HEEre uwe Godt.

11

Ghy en sult niet stelen, noch lieghen, noch die eene en sal met den anderen niet valschelijck handelen.

12

^* Ghy en sult niet valschelijc sweren by mijnen Naem, ende ontheyligen den Naem ws Godts, want ick ben de HEEre.

* Exod. 20.b.7. Mat. 5.d.33.

13

Ghy en sult uwen naesten niet onrecht doen, noch beroouen.^† Des dachlooners loon en sal niet by v blijuen totten morghen.

† Deut. 24.b.15 Tob. 4.c.15.

14

⁺ Ghy en sult den Doouen niet vloecken.^† Ghy en sult voor den blinden niet setten, daer hy hem aen stoote, want ghy sult v voor uwen Godt vreesen, want ick ben de HEEre.

+ D vers 14

† Deut. 27.c.18.

15

^* Ghy en sult niet onrecht handelen inden rechte, ende en sult niet voortrecken den cleynen, noch den grooten eeren.

* Deut. 17.a.2.

[p. 44v]

Maer ghy sult uwen naesten rechtueerdelijck rechten.

16

Ghy en sult gheen^† achterclapper onder uwen volcke zijn. Ghy en sult oock niet staen teghen ws Naesten bloedt. Want ick ben de HEEre.

† Prou. 18.b.8. 26.c.22.

17

^* Ghy en sult uwen Broeder niet haten in v herte. Maer ghy sult uwen Naesten straffen, op dat ghy niet om zijnen twille schult draghen en moet.

* Eccl. 19.b.15. Mat. 18.b.15.

18

^† Ghy en sult niet wraeckgierich zijn, oock niet toorne behouden, tegen de kinderen ws volcx.

† Mat. 5.c.22.

19

^* Ghy sult uwen naesten lief hebben, gelijc v seluen, want ick ben de HEEre.

* Mat. 5.e.43. Mat. 22.d.38. Rom. 13.b.9.

20

Mijn Settinghen suldy houden, dat ghy uwe Vee, niet en laet te doen hebben met alderley aert van dieren.^† Ende uwe velt niet en besaeyt met menigerley saet.^‡ Ende geen cleet aen v en come, dat met wolle, ende lijnen ghemengt is.

† Deut. 22.b.9.

‡ Deu. 22.b.11.

21

Als een man by eenen wijue leyt, ende beslaeptse, die een Lijfeyghen dienstmaecht, ende vanden man versmaet is,^* nochtans niet verlost, noch vrijheyt vercregen en heeft, dat sal gestraft worden. Maer si en sullen niet steruen, want si en is niet vrij geweest.

* Exod. 21.a.1.

22

Maer hy sal voor zijn schult, den HEEre voor de duere der Hutten des getuychenis, eenen Ram tot eenen Schultoffer brenghen:

23

Ende de Priester sal hem versoenen met de Schultoffer, voor den HEEre, ouer de sonde die hy ghedaen heeft.^† So sal hem Godt ghenadich zijn ouer zijn sonde die hy ghedaen heeft.

† Heb. 10.a.4.

24

⁺ Als ghy int lant coemt, ende alderley Boomen plant, daermen af eet. So suldy der seluer voorhuyt besnijden, ende haren vruchten. Drie iaer suldijse onbesneden achten, dat ghijse niet en eet:

+ F vers 24

25

Maer inden vierden iare sullen haer vruchten heylich ende ghepresen zijn den HEEre.

26

Maer inden vijfsten iare suldy de vruchten eten, ende vergaderense, Want ick ben de HEEre uwe Godt.

27

^* Ghy en sult niet met bloede eten.

Ghy^† en sult niet opter vogelen gheschrey achten, noch daghen verkiesen.

* Leuit. 3.c.17. 17.d.14.

† Deu. 18.b.10

28

Ghy^‡ en sult uwe hayr aent hooft niet rontom afsnijden, noch uwen baert gheheel afscheren.

‡ Leuit. 21.a.5 Num. 6.a.5. Deut. 24.a.1. Eze. 44.e.20

29

Ghy en sult geen teecken om eens dooden willen aen uwen lichaem schueren, noch letteren aen v houwen, want ick ben de HEEre.

30

Ghy en sult v dochter niet houden tot hoererie, dat dat landt gheen hoererie en doe, ende worde vol lasters.

31

⁺ Hout mijn vyerdaghen, ende vreest v voor mijn Heylichdom, want ick ben de HEEre.

+ G vers 31

32

^* Ghy en sult v niet keeren totten waerseggeren, ende en vraecht niet vanden teeckenbedieders, dat ghy niet aen hen veronreynicht en wort. Want ick ben de HEEre uwe Godt.

* 1.Re. 28.b.7.

33

Voor een^† grijs hooft suldy op staen,^* ende de ouders eeren. Want ghy sult v vreesen voor uwen Godt. Want ick ben de HEEre.

† Eccl. 8.a.7.

* 2.Tim. 5.a.1.

34

Als een^† vreemdelinck by v, in uwen lande woonen sal, dien en suldy niet versmaden.

† Exod. 22.c.22.

35

Hy sal by v woonen ghelijck een Landtbesitter onder v, ende sult hem liefhebben ghelijck v seluen, want ghy zijt oock vreemdelinghen gheweest in Egypten landt. Ick ben de HEEre uwe Godt.

36

Ghy^† en sult niet onghelijck handelen aenden Rechte, metter ellen, met gewichte, met Mate:

† Deut. 25.c.13. Eze. 45.b.10.

37

Rechte waghe, recht pont, een recht Schepel, een rechte Canne sal by v zijn. Want ick ben de HEEre uwe Godt, die v wt Egypten landt gheleyt heeft,

38

Dat ghy alle mijn settingen ende alle mijn rechten hout ende doet. Want ick ben de HEEre.