Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

¶ Vande graden der swagerschap ende maechschap. Ende hoe dattet betaemt den Manne metten wijue te vereenighen inden houwelijck, ende hoe niet.

1

⁺ ENde de HEEre sprack met Mose, segghende:

+ A vers 1

2

Spreect met den kinderen Israels ende seght tot hen: Ick ben de HEEre uwe Godt,

3

Ghy en sult niet doen, nae de wercken des Egyptschen Landts, daer ghy inne ghewoont hebt. Oock niet, nae de wercken des landts Canaan, daer ick v in leyden sal. Ghy en sult v nae haren Seden niet houden,

4

^† Maer na mijnen Rechte suldy doen, ende mijn insettingen suldy houden, dat ghy daer in wandelt. Want ick ben de HEEre uwe Godt.

† Ezech. 18.a.5.

5

Daerom suldy mijn insettingen houden, ende mijn Rechten.^* Want de mensche die de selue doet, die sal daer door leuen, want ick ben de HEEre.

* Rom. 10.a.5. Gal. 3.b.12. Ezec. 20.b.11.

[p. 44r]

6

Niemandt en sal hem tot zijnder naester bloedt vriendinne maken, om haer schamelheyt te ontdecken, want ick ben de HEEre.

7

^* Ghy en sult ws Vaders, ende ws Moeders schamelheyt niet ontdecken: Het is uwe Moeder, daerom en suldy haer schamelheyt niet ontdecken.

* Gen. 19.f.33. Ezec. 22.a.10.

8

^† Ghy en sult ws Vaders Wijfs schamelheyt niet ontdecken, want het is ws Vaders schamelheyt.

† 1.Cor. 5.a.1. Deut. 22.d.30. 27.c.20.

9

Ghy en^‡ sult ws susters schamelheyt, die ws Vaders, oft ws Moeders dochter is, die thuys oft buyten gheboren is, niet ontdecken.

‡ Deu. 27.c.23 2.Re. 13.d.14 Leui. 20.c.17.

10

Ghy en sult ws soons dochter, oft uwer dochters dochter schamelheyt niet ontdecken, want het is uwe schamelheyt.

11

⁺ Ghy en sult der dochter ws vaders wijfs, die uwen vader gheboren is, ende v suster is, schamelheyt niet ontdecken.

+ B vers 11

12

Ghy en sult ws vaders^* suster schamelheyt niet ontdecken, want het is ws vaders naeste bloetvriendinne.

* Leui. 20.c.19.

13

Ghy en sult ws moeders susters schamelheyt niet ontdecken, want het is ws moeders naeste bloet vriendinne.

14

Ghy en sult ws vaders broeders schamelheyt niet ontdecken, dat ghy zijn wijf neemt, want si is ws vaders broeders wijf.

15

Ghy^† en sult dijns soons wijfs schamelheyt niet ontdecken, want het is ws soons wijf, daerom en suldy haer schamelheyt niet ontdecken.

† Leui. 20.b.12. Gen. 38.c.18.

16

Ghy en sult^‡ ws Broeders wijfs schamelheyt niet ontdecken, want het is ws broeders schamelheyt.

‡ Mat. 14.a.4 Deut. 25.a.5. Leuit. 20.c.21.

17

Ghy en sult ws wijfs, met haerder dochter schamelheyt niet ontdecken, noch haers soons dochter, oft dochter dochter nemen, om haer schamelheyt te ontdecken, want het is haer naeste bloet vriendinne, ende is een laster.

18

^+* Ghy en sult ooc ws wijfs suster niet nemen neffens haer, haer scamelheit te ontdecken, haer te spijt, al dewijle si noch leeft.

+ C vers 18

* Gen. 29.e.27.

19

^† Ghy en sult niet totten wijue gaen, dewijle dat si haer cranckheyt heeft, in haer onreynicheyt, om haer schamelheyt te ontdecken.

† Leui. 15.d.23. 20.c.18.

20

Ghy^‡ en sult oock niet by ws naesten wijf liggen, om haer te besaden, daer mede dat ghy v aen haer onreynicht.

‡ Eze. 22.b.11. Deut. 22.c.22. 2.Re. 11.a.4.

21

Ghy en sult oock van uwen^* Sade niet geuen, dattet den Molech verbrant worde, dat ghy niet en ontheylicht den Naem ws Godts, want ick ben de HEEre.

* Leui. 20.a.2.

22

^† Ghy en sult niet by eenen Ionghen ligghen, ghelijck by een Wijf, want het is eenen grouwel.

† Rom. 1.d.27. Leui. 20.b.13.

23

Ghy en sult ooc by geen^* dier liggen, dat ghy met hem veronreynicht wordt. Ende gheen wijf en sal met een dier te doene hebben, want het is eenen grouwel.

* Deut. 27.c.22. Leui. 20.b.15.

24

⁺ Ghy en sult v in gheenen van desen verontreynigen. Want in allen desen hebben haer de Heydenen verontreynicht, die ick voor v wech wil wtstooten,

+ D vers 24

25

Ende dat Lant is daer door verontreynicht, ende ic wil haer misdaet, aen haer versoecken dat dat Landt zijn inwoonders wt spouwe.

26

Daerom hout mijne Settingen ende Rechten. Ende en doet niet dese grouwelen, noch de Landtbesitter, noch de vreemdelinck onder v.

27

Want alle alsulcke grouwelen hebben de lieden van desen Lande gedaen, die voor v waren, ende hebben dat Landt verontreynicht,

28

Op dat v dat Landt oock niet wt en spouwe, als ghijt ontreynicht, ghelijckt de Heydenen heeft wtgespogen, die voor v waren.

29

Want die dese grouwelen doen, dier sielen sullen wtgheroyt werden van haren volcke.

30

Daerom hout mijne Settinghen, dat ghy niet en doet nae de grouwelijcke seden, die voor v waren, dat ghy daer niet mede verontreynicht en wort, want ick ben de HEEre uwe Godt.