Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

¶ Datmen te voren alle offerhande totter duere der Wooningen sal brengen. Datmen gheen bloet eten en sal, noch van een beest die van seluen gestoruen is.

1

⁺ ENde de HEEre sprack met Mose, segghende:

+ A vers 1

2

Seght Aaron ende zijn soonen, ende al den kinderen Israels, ende seght tot hen: Dat ist dat de HEEre gheboden heeft:

3

Wie dat wt den huyse Israels eenen Osse, oft Lam, oft gheyte slaet inden Legher, oft buyten voor den Legher,

4

Ende niet voor de duere der Hutten des ghetuychenis en brengt, dattet den HEEre tot eenen offer ghebracht worde, voor de Woninge des HEEren, die sal des bloets schuldich zijn, als de ghene die bloet ghestort heeft. Ende alsulcken mensch sal wtgheroyt werden, wt sinen volcke.

5

⁺ Daerom sullen de kinderen Israels haren offer, die si opten vrijen velde offeren willen, voor den HEEre brenghen, voor de duere der Hutten des ghetuychenis, totten Priester, ende daer haren Danckoffer den HEEre offeren.

+ B vers 5

6

Ende de Priester sal dat bloet opten Altaer des HEEren sprengen, voor de duere der Hutten des ghetuychenis, ende dat vet onsteken tot eenen soeten rueck den HEEre.

7

Ende geensins haren offer voort aen meer, den Veltduyuelen offeren, met den welcken si hoereren. Dat sal hem een eewich recht zijn, by haren nacomelinghen.

8

⁺ Daer om suldy tot hen segghen: Welcke Mensche wt den huyse Israels, oft ooc een Vreemdelinck die onder v is, die eenen Offer oft een Brandtoffer doet,

+ C vers 8

9

Ende en brengt dat niet voor de duere der Hutten des ghetuychenis, dat hijt den HEEre doe, die sal wtgheroeyt worden van sinen volcke.

10

Ende welc mensch, hy si vanden huyse Israels oft een vreemdelinck onder v,^* eenich bloedt eedt, teghen dien wil ick mijn aensicht setten, ende wil hem midden wt zijn volck roeyen.

* Leuit. 7.c.26.

11

Want des Lijfs leuen is inden bloede, ende ick hebt v totten Altaer gegeuen, dat uwe siele daer mede versoent werde. Want dat bloet is de versoeninghe voor dat leuen.

12

Daerom hebbe ick gheseyt den kinderen Israels: Gheene siel en sal onder v bloet eten, oock gheen Vreemdelinck, die onder v woont.

13

Ende welck mensche, hy si vanden huyse Israels, oft een vreemdelinck onder v, die een dier oft vogel vanget inder Iacht, datmen eedt, die sal des seluen bloet storten, ende met Aerden bedecken.

14

⁺ Want des Lijfs leuen is in zijnen bloede, so langhe alst leeft. Ende ick heb den kinderen Israels gheseyt:^† Ghy en sult gheens lichaems bloedt eten, want des lichaems leuen is in zijn bloet. Wie dattet eedt, die sal wtgheroeyt worden.

+ D vers 14

† Gen. 9.a.4. Leuit. 3.c.17. 19.f.27.

15

Ende wat siele, een aes, oft dat vanden wilde verschuert is, eedt, hy sy een Landtbesitter oft Vreemdelinck, die sal zijn cleedt wasschen, ende hem met water baden, ende onreyn zijn totten auont, so is hy reyn.

16

In dien hy zijn cleederen niet wasschen noch hem niet baden en sal, so sal hy zijne misdaet dragen.