Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Dat Aaron niet alle tijt en mach int heylichdom gaen. Van de twee bocken, vanden welcken den eenen voor de sonde, ende den anderen tot eenen Brantoffer zijn sal. Vant vasten der seuender maent.

1

⁺ ENde de HEEre sprack met Mose,^† (nae dien dat Aarons twee Sonen gestoruen waren, doen si voor den HEEre offerden) seggende:

+ A vers 1

† Leuit. 10.a.2.

2

Seght uwen broeder Aaron, dat hy niet tot allen tijden in dat inwendige Heylichdom en gae, achter tvoorhancksel voor den Ghenadenstoel, die op de Arcke is, dat hy niet en sterue,^* want ick wil in eender wolcken verschijnen, opten Genadenstoel.

* Exo. 40.d.34 3.Re. 8.b.10.

3

Alleen daer mede sal hy ingaen, met eenen iongen Osse, tot eenen Sondoffer, ende met eenen Ram tot eenen Brantoffer,

4

Ende sal den Heyligen lijnen rock aentrecken, ende een lijnen broecke aen zijn vleesch hebben, ende hem met eenen lijnen gordel gorden, ende den lijnen hoet op hebben. Want dat zijn de heylige cleederen, ende sal zijn vleesch met water baden, ende hy salse aendoen.

5

⁺ Ende sal vander Menichten der kinderen Israels, twee Geyten bocken nemen tot eenen Sondoffer, ende eenen Ram tot eenen Brandtoffer.

+ B vers 5

6

Ende Aaron sal den Osse zijn Sondoffer daer toe brengen,^* ende hem ende zijn huys versoenen.

* Heb. 7.c.26. 9.b.13.

7

Ende daernae de twee bocken nemen, ende voor den HEEre setten, voor de duere der Hutten des getuychenis,

8

Ende sal dat lot worpen ouer de twee bocken, eens bocx lot, den HEEre, ende dander den vrijbock.

9

Ende sal den bock, op den welcken des HEEren lot valt, offeren tot eenen Sondoffer.

10

Maer den bock op den welcken dat lot des vrijen valt, sal hy leuendich voor den HEEre setten, dat hy hem versoene, ende late den vrijbock in de woestijne loopen.

11

Ende also sal hy dan den Osse zijns Sondoffers daer toe brengen, ende hem, ende zijn huys versoenen, ende sal hem slaen.

12

⁺ Ende sal een panne vol gloeyende colen vanden Altaer nemen, die voor den HEEre staet, ende de hant vol gestoten ruecwercx, ende binnen in, achter dat voorhancksel brengen,

+ C vers 12

13

Ende dat ruecwerck opt vier legghen voor den HEEre, dat den neuel vanden ruecwerck den Genadenstoel bedecke, die opt getuychenis is, dat hy niet en sterue.

14

^* Ende hy sal vanden bloede vanden Osse nemen, ende met sinen vinger teghen den Ghenadenstoel sprengen voor aen. Seuenmael sal hy also voor den Genadenstoel met sinen vinger vanden bloede sprengen.

* Leuit. 3.a.2.

15

Daer nae sal hy den bock, des volcx Sondoffer slaen, ende van sinen bloede inbrengen achter dat voorhancksel, ende sal met sinen bloede doen soo hy met des Ossen bloet gedaen heeft, ende daer oock mede sprengen voor tegen den Genadenstoel.

16

Ende sal alsoo versoenen dat Heylichdom, vander onreynicheyt der kinderen Israels, ende van haren ouertredinghen, in allen haren sonden. Alsoo sal hy doen, der Hutten des getuychenis. Want si zijn onreyn die rontomme ligghen.

17

^+* Gheen mensche en sal in de Hutte des getuychenis zijn, als hy daer in gaet om te versoenen inden Heylichdom, tot dat hy wtgaet. Ende sal also versoenen, hem ende zijn huys, ende de geheele Menichte Israels.

+ D vers 17

* Luc. 1.a.6.

18

Ende als hy wtgaet, totten Altaer die voor den HEEre staet, so sal hy hem versoenen, ende sal vanden bloede des Ossen, ende vanden bloede des Bocx nemen, ende op des Altaers hoornen alom strijcken.

19

Ende sal met sinen vinger vanden bloede daer op sprengen seuenmael, ende hem reynigen ende Heyligen, vander onreynicheyt der kinderen Israels.

20

⁺ Ende als hy volbracht heeft dat versoenen des Heylichdoms, ende der Hutten des getuychenis, ende des Altaers, so sal hy den leuenden Bock daer brengen.

+ E vers 20

21

Dan sal Aaron, beyde zijn handen op zijn hooft leggen, ende bekennen op hem al de misdaet der kinderen Israels, ende alle haer ouertredinghen in allen haren sonden. Ende salse den Bock opt hooft leggen, ende hem door eenen Man die voorhanden is, laten loopen in de woestijne.

22

Dat den Bock also al haer misdaet op hem in de wildernis drage, ende laten hem in de woestijne.

23

Ende^† Aaron sal in de Hutte des getuychenis gaen, ende de lijnen cleederen wt trecken, die hy aen trock, doen hy in dat Heylichdom ginck, ende salse aldaer laten.

† Ezech. 43.d.

24

Ende sal zijne vleesch met water

[p. 43v]

baden, inder Heyliger stede, ende zijn eyghen cleederen aen doen, ende wt gaen, ende zijn Brantoffer, ende des volcx Brantoffer maken, ende beyde hem, ende dat volck versoenen,

25

Ende dat vet vanden Sondoffer opten Altaer ontsteken.

26

Maer die ghene die den vrij bock wt gheleyt heeft, die sal zijn cleederen wasschen, ende zijn vleesch met water baden, ende daer nae inden legher comen.

27

Den Osse des Sondoffers, ende den Bock des Sondoffers, ter welcker bloet in dat Heylichdom, om te versoenen gebracht wort, salmen buyten voeren voor den legher, ende met vyere verbranden, beyde haer huyt, vleesch, ende mest.

28

Ende diese verbernt, sal zijn cleederen wasschen, ende zijn vleesch met water baden, ende daer nae inden Legher comen.

29

⁺ Oock sal v dat een eewich recht zijn:^† Inden tienden dage des seuenden maents, suldy uwe Lijf castijen, ende geen werck doen, hy si een Landtbesitter, oft vreemt onder v,

+ F vers 29

† Leui. 23.e.27. Num. 29.a.7.

30

Want in desen dage geschiet uwe versoeninghe, dat ghy ghereynicht wort, van al v sonden wort ghy ghereynicht voor den HEEre.

31

Daerom salt v den grootsten Sabbath zijn, ende ghy sult v Lijf verootmoedigen. Een eewich Recht si dat.

32

Maer alsulcke versoeninghe sal een Priester doen, diemen gesalft, ende diens handt datmen gheuult heeft, tot eenen Priester in zijns vaders stede. Ende sal de lijnen cleederen aen doen, te weten, de Heylige cleederen,

33

Ende sal alsoo versoenen dat heylighe Heylichdom, ende de Hutte des ghetuychenis, ende den Altaer, ende de Priesters, ende al dat volck der Menichten.

34

Dat sal v een eewich Recht zijn, dat ghy de kinderen Israels versoent, van allen haren Sonden,^† inden Iare eens. Ende Mose dede, so hem de HEEre gheboden hadde.

† Exo. 30.b.10. Heb. 9.a.7. Mach. 3.a.8.