Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

¶ Van alderley onreyne vloeden, der mannen ende der wijuen.

1

⁺ ENde de HEEre sprack met Mose ende Aaron, seggende:

+ A vers 1

2

Spreect met den kinderen Israels, ende segt tot hen: Als een man aen zijn vleesch eenen vloet heeft, die selfde is onreyn.

3

Maer dan is hy onreyn aen desen vloede, als zijn vleesch vanden vloede ettert oft verstopt is.

4

Alle legher daer hy op leet, ende al daer hy op sidt, sal onreyn wesen.

5

Ende wie zijnen leger aenroert, die sal zijn clee-deren wasschen, ende hem met water baden, ende onreyn zijn totten auont.

6

Ende wie hem set daer hy gheseten heeft, die sal zijn cleederen wasschen, ende hem met water baden, ende onreyn zijn totten auont.

7

Wie zijn vleesch aenroert, die sal zijn cleederen wasschen, ende hem met water baden, ende onreyn zijn totten auont.

8

Als hy zijn speecsel worpt op den ghenen die reyn is, die sal zijn cleederen wasschen, ende hem met water baden, ende onreyn zijn totten auont.

9

⁺ Ende den sadel daer hy op rijt, sal onreyn worden.

+ B vers 9

10

Ende wie ergens yet aenroert, dat onder hem geweest is, die sal onreyn zijn totten auont. Ende wie sulcx draecht, die sal zijn cleederen wasschen, ende hem met water baden, ende onreyn zijn totten auont.

11

Ende wien hy aenroert, ende te voren zijn handen niet en wascht, die sal zijn cleederen wasschen, ende hem met water baden, ende onreyn zijn totten auont.

12

^† Als hy een Aerden vat aenroert, dat salmen breken. Maer dat houten vat salmen met water wasschen.

† Leui. 6.d.21. 11.d.33.

13

Ende als hy reyn wordt van zijnder vloet, so sal hy seuen dagen tellen, na dien hy reyn geworden is, ende zijn cleederen wasschen, ende zijn vleesch met vloyende water baden, so is hy reyn.

14

Ende ten achsten dage sal hy twee Tortelduyuen, oft twee ionghe duyuen nemen, ende voor den HEEre brengen, voor de duere der Hutten des getuychenis, ende den Priester gheuen.

15

Ende de Priester sal vander eender, een Sondoffer, ende vander andere, een Brantoffer maken, ende hem versoenen voor den HEEre, om zijnder vloet wille.

16

⁺ Als eenen Manne inden slaep dat Saet ontgaet, die sal alle zijn vleesch met water baden, ende onreyn zijn totten auont.

+ C vers 16

17

Ende alle dat cleet, ende alle dat vel, dat met sulcken sade beulect is, sal hi wasschen met watere, ende onreyn zijn totten auont.

18

Een wijf, byder welcker een soodanighe leet, die sullen hen met watere baden, ende onreyn zijn totten auont.

19

Als een wijf haers lijfs bloet vloedt heeft, sal sy seuen daghen wech ghedaen worden. Soo wie datse aenroert, die sal onreyn zijn totten auont.

20

Ende al waer sy op leet, soo langhe als sy haren tijdt heeft, sal onreyn zijn. Ende waer sy op sit, sal onreyn zijn.

21

Ende wie haren Leger aenroert, die sal zijn cleederen wasschen, ende hem met water baden, ende onreyn zijn tot den auont.

22

Ende wie ergens wat aenroert, daer sy op gheseten heeft, sal zijn cleederen wasschen, ende hem met water baden, ende onreyn zijn totten auont.

23

^+* Ende als een man by haer leet, ende sy haren tijt crijcht by hem, die sal seuen daghen onreyn zijn.

+ D vers 23

* Leuit. 18.c.19. 20.c.18.

24

Ende den Legher, daer hy op gelegen heeft, sal onreyn zijn.

25

Maer als een wijf haren bloetvloet eenen langhen tijt heeft,^† niet alleen ter gewoonlijcker tijt, maer oock ouer den gewoonlijcken tijt. Soo sal sy onreyn zijn, so langhe als sy vloeyt. Ghelijc als sy ter

† Matt. 9.c.20. Marc. 5.c.25. Luc. 8.e.43.

[p. 43r]

tijt haerder afsonderinghe, so sal sy oock hier onreyn zijn.

26

Alle den legher daer si op leet, al den tijt haers vloets, sal zijn ghelijck dien leger haerder afsonderinge. Ende al waer si op sidt, sal onreyn zijn, gelijck de onreynicheyt haerder afsonderige.

27

Wie van dien wat aenroert, die wort onreyn, ende sal zijn cleederen wasschen, ende hem met water baden, ende onreyn zijn totten auont.

28

⁺ Maer wort si reyn van haerder vloet, so sal si seuen dagen tellen, daer nae sal si reyn zijn,

+ E vers 28

29

Ende ten achsten dage sal si twee Tortelduyuen, oft twee ionge duyuen nemen, ende totten Priester bringen, voor de duere der Hutten des getuychenis.

30

Ende de Priester sal vander eender maken eenen Sondoffer, vander ander, eenen Brantoffer, ende haer versoenen voor den HEEre, ouer den vloet haerder onreynicheyt.

31

Soo sult ghy de kinderen Israels waerschouwen voor haer onsuyuerheyt, dat sy niet en steruen in haer onreynicheyt, als si mijn Wooninghe onreyn maken, die onder v is.

32

Dat is de wet ouer den ghenen, die eenen vloet heeft, ende den ghenen die dat Saet inden slaep ontgaet, dat hy daer af onreyn wort.

33

Ende ouer de ghene, die haren bloet vloedt heeft, ende wie eenen vloet heeft, het si Man oft wijf, ende als een man by eender onreynder leyt.