Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Van reyninghe der lazarie, Ende wat offer dat hy gheuen sal.

1

⁺ ENde de HEEHE sprack met Mose, ende seyde;

+ A vers 1

2

Dat is de wet ouer

[p. 42r]

den Lazarighen, als hy ghereynicht sal worden.^* Hy sal totten Priester comen,

* Matt. 8.a.4. Mar. 1.d.44 Luc. 5.b.14. 17.b.14.

3

Ende de Priester sal wten Leghere gaen, ende besien, hoe dat teecken der lazarien, aenden Lazarigen heel geworden is.

4

Ende hy sal ghebieden den genen, die te reynighen is, dat hy twee leuende voghelen neme, die daer reyn zijn, ende Cederen hout, ende Rosijnverwige wolle, ende Isope.

5

Ende sal gebieden den eenen Voghel te slaen in een Aerden vat aent vlietende water.

6

Ende sal den leuenden Vogel nemen, met den Cederen hout, Rosijnverwighe wolle, ende Isope, ende in des ghesleghen voghels bloet steken, aent vlietende water,

7

Ende besprenghen den ghenen die vander lazarien te reynighen is, seuenmael: Ende reynige hem also, ende late den leuenden voghel int vrije velt vlieghen.

8

⁺ Maer de ghereynichde sal zijn cleederen wasschen, ende alle zijn hayr af scheren, ende hem met water baden, so is hy reyn. Daer na ga hy in den Legher, doch sal hy buyten zijnder Hutten seuen daghen blijuen.

+ B vers 8

9

Ende inden seuensten daghe sal hy al zijn haer af scheeren, aen dat hooft, aenden baert, aen de wijnbrauwen, dat alle hayren afgheschoren zijn. Ende sal zijn cleederen wasschen, ende zijn vleesch int water baden, so is hy reyn.

10

Ende ten achsten daghe sal hy twee Lammeren nemen sonder smette, ende een iaerich Schaep sonder smette, ende drie thiende Semelmeels, tot eenen Spijsoffer, met olie ghemengt, ende een Log olien.

11

Soo sal de Priester den seluen ghereynichden, ende dese dinghen setten voor den HEEre, voor de duere der Hutten des getuychenis.

12

Ende sal dat een Lam nemen, ende offeren tot eenen Schuldoffer, met den Log olien, ende sal sulcx voor den HEERE beweghen,

13

Ende daer na dat Lam slaen, daermen den Sondoffer ende den Brantoffer slaet, te weten, in de heylighe stede. Want ghelijck als dat Sondtoffer, soo is oock dat Schuldoffer des Priesters, want het is dat Alderheylichste.

14

Ende de Priester sal vanden bloede nemen vanden Schuldoffer, ende den ghereynichden op dat lapken vander rechter ooren strijcken, ende opten duym van zijnder rechter hant, ende opten grooten teen van zijnen rechten voete.

15

⁺ Daer na sal hy de olye wt dat Log nemen, ende op zijn (des Priesters) slincke hant ghieten,

+ C vers 15

16

Ende met zijnen rechten vingher in de olie stippen, die in zijn slincke hant is, ende sprenghen met zijnen vingher de olie seuenmael voor den HEEre.

17

Maer de Olie die daer ouer is in zijn hant, sal hy den ghereynichden op dat lapken van zijnder rechter ooren strijcken, ende opten rechten duym, ende opten grooten teen van zijnen rechten voet, bouen op dat bloet des Schuldtoffers.

18

Maer de olie die daer ouer is in zijn hant, sal hy op des gereynichdens hooft ghieten, ende hem versoenen voor den HEEre,

19

Ende sal dat Sondtoffer maken, ende den gereynichden versoenen om zijns onreynicheyts wille.

20

Ende sal daer na dat Brandtoffer slaen, ende salt opten Altaer offeren met den Spijsoffer, ende hem versoenen, so is hy reyn.

21

⁺ Maer is hy arm^* ende met zijnder hant niet soo veel en verweruet, soo neme hy een lam tot eenen Schuldoffer om te bewegen, ende te versoenen, ende een thienden Semelmeels met olien ghemengt tot een Spijsoffer, ende een Log olien,

+ D vers 21

* Leui. 5.b.7. 8.b.12.

22

Oft twee Tortelduyuen oft twee ionge duyuen, die hy met zijnder hant verweruen can, dat die een sy een Sondoffer, die ander een Brantoffer,

23

Ende brenghense ten achsten dage zijnder reyninghen totten Priestere, voor de duere der Hutten des getuychenis, voor den HEERE.

24

So sal de Priester dat Lam, tot eenen Schultoffer nemen, ende dat Log olien ende salt al bewegen voor den HEEre,

25

Ende dat lam dat Schuldtoffer slaen, ende nemen vanden bloede des selfs Schultoffers ende den ghereynichden strijcken op dat lapken zijnder rechter ooren, ende opten duym zijnder rechter hant, ende opten grooten teen van zijnen rechten voet,

26

Ende de olie in zijn (des Priesters) slincker hant ghieten,

27

Ende met zijnen rechten vinghere, die olie, die in zijn slincke hant is, seuenmael sprenghen voor den HEEre.

28

⁺ Maer de ouerblijuende in zijnder hant sal hy den gereynichden op dat lapken zijnder rechter ooren, ende opten duym zijnder rechter hant, ende opten grooten teen van zijnen rechten voet strijcken, bouen op dat bloet des Schultoffers.

+ E vers 28

29

De olie die daer ouer is in zijnder hant, sal hy den ghereynichden op dat hooft ghieten, om hem te versoenen voor den HEEre.

30

Ende daer na vander eender Tortelduyuen oft ionger duyuen, so zijn hant heeft mogen vercrijgen, eenen Sondoffer,

31

Van de ander eenen Brandtoffer maken, met den Spijsoffer, ende de Priester sal also den gereynichden versoenen voor den HEEre.

32

Dat sy de wet vanden Lazarigen, die met zijnder hant niet verweruen en can, wat tot zijnder reyninghen hoort.

33

⁺ Ende de HEEre sprac met Mose ende Aaron, seggende:

+ F vers 33

34

Als ghy int lant Canaan coemt, dat ick v tot een besittinghe geue, ende sal ergens in een huys uwer besittingen een lazarich teecken geuen.

35

So sal die comen, diens dat huys is, ende den Priester aenseggen ende spreken: My dunct datter een lazarich teecken is aen mijnen huyse.

36

Dan sal de Priester heeten, dat sy dat huys wt ruymen, eer de Priester daer in gaet om dat teecken te besien, op dattet niet al onreyn en worde, datter inden huyse is, daer na sal de Priester daer in gaen om dat huys te besien.

37

Als hy nv dat teecken besiet, ende vint dat daer aen dien wandt des huys gheel oft rootachtige putkens zijn, ende haer aensien neerder, dan anders de wandt is,

38

So sal hy ten huyse ter dueren wtgaen ende dat huys seuen daghen toe sluyten.

[p. 42v]

39

Ende als hy ten seuensten dage weder coemt, ende siet, dat dat teecken voorder geten heeft aen de want des huys,

40

So sal hy de steenen heeten wt breken, daer dat teecken in is, ende buyten voor de Stadt in een onreyn plaetse worpen,

41

Ende dat huys salmen binnen rontom scrabben, ende sullen dat afgeschrabde leem buyten voor de stadt in een onreyn plaetse schudden,

42

Ende ander steenen nemen, ende in haer stede setten, ende ander leem nemen, ende dat huys beworpen.

43

⁺ Als dan dat teecken weder coemt, ende wtbreect aenden huyse, na datmen de steenen ende dat leem wtgetrocken, ende dat huys anders beworpen heeft,

+ G vers 43

44

Soo sal de Priester daer ingaen. Ende als hy siet, dat dat teecken voorder gheten heeft aenden huyse, so ist sekerlijc een verslindende lazarie aenden huyse, ende is onreyn.

45

Daerom salmen dat huys af breken, steen ende hout, ende alle leem aenden huyse, ende sullet buyten vueren voor de Stadt, aen eenen onreynen hoeck.

46

Ende wie in dat huys gaet, also langhe alst toeghesloten is, die is onreyn totten auont.

47

Ende wie daer inne leet, oft daer in eet, die sal zijn cleederen wasschen.

48

Maer ist dat de Priester, als hy daer ingaet, siet, dat dit teecken niet voorder aenden huyse ghegheten en heeft, na dien dat thuys beworpen is, soo sal hijt reyn spreken,

49

Want dat teecken is heel worden. Ende sal tot eenen Sondtoffer voor dat huys nemen twee vogelen, Cederen hout, ende Rosijnverwighe wolle, ende Isope,

50

Ende den eenen voghel slaen in een Aerden vat, aen een vlietende water.

51

Ende sal nemen dat Cederen hout, de rosijnverwighe wolle, den Isope, ende den leuenden voghel, ende in des gheslegen vogels bloet steken, aen dat vlietende water, ende dat huys seuenmael besprenghen.

52

Ende sal also dat huys ontsondighen met den bloede des voghels, met dat vlietende water, metten leuenden vogel, met dat Cederen hout, met ysopen, ende met Rosijnverwighe wolle.

53

Ende sal den leuenden vogel laten buyten voor de Stadt, int vrij velt vliegen, ende dat huys versoenen, soo ist reyn.

54

Dat is de wet ouer alderley teecken der lazarien, ende schorftheyts.

55

Ouer de Lazarie der cleederen, ende der huysen.

56

Ouer de buylen, puysten ende etterwit,

57

Op datmen wete, wanneer yet onreyn oft reyn is. Dat is de wet vander Lazarien.