Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Vande Melaetscheyt, ende hoemen metten Lazarigen handelen sal.

1

⁺ ENde de HEEre sprack met Mose ende Aaron, seggende:

+ A vers 1

2

Als een mensche aen de huyt zijns vleeschs yet opuaert, of schorft, oft etterwit wordet, als oft Lazarie worden wilde aen de huyt zijns vleeschs, so salmen hem totten Priester Aaron brenghen, oft tot zijne Sonen, eenen onder den Priesteren.

3

Ende wanneer de Priester dat Teecken aen de huyt des vleeschs siet, dat de hayren in wit verandert zijn, ende^* dat aensien aen de plaetse dieper is, dan de ander huyt zijns vleesch, soo ist ghewisselijck de Melaetsheyt. Daerom sal hem de Priester besien ende voor onreyn oordeelen.

* De gedaente.

4

Mer wanneer yets yet etterwits is aen de huyt zijns vleeschs, ende doch dat aensien niet dieper en is dan de ander huyt des vleeschs, ende de hayren niet in wit verandert en zijn,^* so sal de Priester den seluen besluyten seuen dagen,

* Num. 12.b.14

5

⁺ Ende ten seuensten daghe besien. Ist dat dat teecken blijft so hijt te voren gesien heeft, ende en heuet niet voorder gheten aen de huyt, soo sal hem de Priester noch eens seuen daghen besluyten.

+ B vers 5

6

Ende als hy hem ten tweeden mael ten seuensten daghe besiet, ende vint dat dat teecken verdwenen is, ende niet voorder geten en heeft aen de huyt, so sal hy hem reyn ordeelen, want het is^† grillicheyt. Ende hy sal zijn cleederen wasscen, so is hy reyn.

† Ruydicheyt Crauwagie.

7

Maer als de grillicheyt voorder eet in de huyt, na dien dat hy vanden Priester besien ende reyn ghesproken is, ende wordt nv anderwerf vanden Priester besien.

8

Als dan de Priester daer siet, dat de grillicheyt voorder geten heeft in de huyt so sal hy hem onreyn ordeelen, want het is ghewisselijck Melaetsheyt.

9

Wanneer een teecken der Lazarien aenden mensche zijn sal, dien salmen totten Priester brengen.

10

Als de selue siet ende vint, dat daer wit op gecomen is aen de huyt, ende de hayren int wit verandert, ende rou vleesch in de sweringe is,

11

So is sekerlijck een oude Lazarie in de huyt zijns vlees. Daerom sal hem de Priester onreyn ordeelen, ende niet besluyten, want hy is alreede onreyn.

12

Maer als de lazarie bloeyt in de huyt, ende bedect alle de huyt, van dat hooft aen totten voeten, alle dat ghene dat de Priester voor ooghen sien mach.

13

⁺ Als dan de Priester besiet ende vint, dat de Lazarie al dat vleesch bedect heeft, so sal hy den seluen reyn ordeelen, dewijle het alle aen hem in wit verandert is, wandt hy is reyn.

+ C vers 13

14

Maer is daer rou vleesch inden dage, als hy besien wort, soo is hy onreyn.

15

Ende als de Priester dat rou vleesch besiet, so sal hy hem onreyn ordeelen, want hy is onreyn, ende tis gewisselijc Lazarie.

16

Mer verkeert hem dat rou vleesch weder, ende veranderet hem in wit so sal hy totten Priester comen.

17

Ende als de Priester besiet ende vint, dat dat teecken is in wit verandert, soo sal hy hem reyn ordeelen, want hy is reyn.

18

Als in yemants vleesch aen de huyt eenen sweer wort ende weder heelt,

19

Ende daerna aen de selue plaetse wat wits opuaert, of rootachtich etterwit wort so sal hy vanden Priester besien worden.

20

Als dan de Priester siet, dat dat aensien neerder is dan de ander huyt, ende dat hayr in dat witte verandert, so sal hy hem onreyn ordeelen, want daer is sekerlijck een lazarich teecken wt den swere worden.

21

Maer siet de Priester, ende vint dat de hayren niet wit en zijn, ende niet neerder, dan de ander huyt, ende is wat verdwenen, soo sal hy hem seuen dagen besluyten,

22

Etet voorder in de huyt, so sal hy hem onreyn ordeelen, want het is sekerlijck een litteecken der Lazarien.

23

Maer blijft dat etterwit also staende, ende en etet niet voorder so ist de schrabbe vanden sweere, ende de Priester sal hem reyn ordeelen.

24

⁺ Wanneer hem yemant aen de huyt byden viere verbrande, ende dat brant teecken rootachtich oft wit is,

+ D vers 24

25

Ende de Priester hem besiet, ende vint, dat dat hayr in wit verandert aen dat brantteecken, ende dat aensien dieper dan de ander huyt, soo is ghewisselijck Lazarie wt

[p. 41v]

dat brantteecken gheworden.

26

Daerom sal hem de Priester onreyn ordeelen, want het is een lazarich litteecken. Maer siet de Priester ende vint, dat dat hayr aen het brandteecken niet in wit en verandert, ende niet neerder en is, dan de ander huyt, ende is daer toe verdwenen, so sal hy hem seuen daghen besluyten,

27

Ende ten seuensten daghe sal hy hem besien, heuet voorder geten aende huyt, so sal hy hem onreyn ordeelen, want het is lazarie.

28

Maer ist blijuen staende aent brandtteecken, ende niet voorder gheten aen de huyt, ende is daertoe wat verdwenen, so ist een sweeringhe des brantteeckens, ende de Priester sal hem reyn ordeelen, want het is een schramme des brandtteeckens.

29

⁺ Wanneer een Man oft wijf op thooft oft aenden baert schorft wort,

+ E vers 29

30

Ende de Priester dat teecken besiet, ende vint, dat dat aensien dieper is, dan de ander huyt, ende dat hayr aldaer gulden ende dunne, so sal hy hem onreyn ordeelen: Want het is een lazarige schorftheyt des hoofts oft des baerts.

31

Maer siet de Priester, dat de schorftheyt niet dieper aen te sien en is, dan de huyt, ende dat hayr niet vael en is, so sal hy den seluen seuen dagen besluyten.

32

Ende als hy hem ten seuensten daghe besiet, ende vint, dat de schorftheyt niet voorder gheten en heeft, ende datter gheen gulden haer en is, ende dat aensien des schorftheyts niet dieper en is dan de ander huyt,

33

So sal hy hem bescheeren, doch dat hy de schorftheyt niet en beschere. Ende de Priester sal hem noch eens seuen dagen besluyten.

34

Ende als hy hem ten seuenden daghe besiet, ende vint dat de schorftheyt niet voorder in de huyt geten en heeft, ende dat aensien en is niet dieper dan de ander huyt, so sal hem de Priester reyn spreken. Ende hy sal zijn cleederen wasschen, want hy is reyn.

35

Maer eedt de schorftheyt voorder aen de huyt, na dien dat hy reyn gesproken is,

36

Ende de Priester besiet hem, ende vint dat de schorftheyt also voorder geten heeft aen de huyt, soo en sal hy niet meer daer na vraghen, oft de hayren gulden zijn, want hy is onreyn.

37

Maer is voor ooghen de schorftheyt stil staende ghebleuen, ende isser vael haer daer op ghegaen, so is de schorftheyt heel, ende hy reyn. Daerom sal hem de Priester reyn spreken.

38

⁺ Als eenen Man oft eenen Wijue aen de huyt haers vleesch wat etterwit is,

+ F vers 38

39

Ende de Priester siet aldaer, dat dat etterwit wat verdwijnt, dat is een witte schorftheyt, in der huyt op gegaen, ende hy is reyn.

40

Als eenen Man de hoofthayren wt vallen, dat hy calu wordt, die is reyn.

41

Vallen sy hem voor aent hooft wt, so ist een glatheyt, ende hy is reyn.

42

Maer wort aen de glatheyt, oft daer hy calu is, een wit oft rootachtich teeken, so is hem lazarie aen de blootheit oft aent calu hooft op gegaen.

43

Daerom sal hem de Priester besien, ende als hy vint dat wit oft rootachtich teecken op geloopen aen zijn blootheyt oft caluwe hooft, dat hy siet gelijck anders de lazarie aen der huyt,

44

So is hy lazarich ende onreyn. Ende de Priester sal hem onreyn spreken, om sulcken teeckens wille, op zijn hooft.

45

⁺ Wie nv lazarich is, diens cleederen sullen verschuert zijn, ende dat hooft bloot, ende de lippen bewimpelt, ende sal allensins onreyn ghenaemt worden.

+ G vers 45

46

Ende so langhe^† als dat teecken aen hem is, sal hy onreyn zijn, alleen woonen, ende zijn wooninge sal buyten den Legher zijn.

† Num. 5.a.2. 4.Reg. 15.a.5

47

Als aen een cleedt een teecken der lazarien zijn sal, het sy wullen oft lijnen,

48

Aenden wtslach oft inslach, tsy lijnen oft wullen, oft aen een vel, oft aen yet dat van vellen gemaect wort.

49

Ende als dat teecken bleec of rootachtich is, aent cleet oft aent velle, of aen wtslach, oft aen inslach, oft aen eenigerley dinc dat van vellen gemaect is, dat is sekerlijc een teecken der lazarien,

50

Daerom salt de Priester besien. Ende als hy dat teecken siet, so sal hijt seuen dagen in sluyten.

51

Ende als hy ten seuensten dage siet, dat dat teecken voorder gheten heeft aen dat cleedt, aenden wtslach, ende aenden inslach, aent vel oft aen alle datmen van vellen maect, so ist een etende teecken der lazarien, ende is onreyn,

52

Ende sal dat cleet verbernen, oft den wtslach, oft den inslach, het sy wullen oft lijnen, oft eenich velwerck, daer alsulcken teecken in is. Want het is een teecken der lazarien, ende salt met viere verbernen.

53

⁺ Maer ist dat de Priester sien sal, dat dat teecken niet voorder gheten en heeft, aent cleet oft aenden wtslach, oft aenden inslach, oft aen alderley velwerck,

+ H vers 53

54

So sal hy ghebieden, datmen dat wassche, daer dat teecken in is, ende salt in sluyten ander seuen daghen.

55

Ende als de Priester sien sal, na dien dat teecken ghewasschen is, dat dat teecken niet verandert en is voor zijnen ooghen, ende oock niet voorder gheten en heeft, soo ist onreyn, ende salt met viere verbernen, want het is diep inwaerts gheten, ende heeftet beschauet.

56

Mer als de Priester siet dat dat teecken verdwenen is, na dattet ghewasschen is, soo sal hijt af schueren, vanden cleede, vanden velle, vanden wtslach, oft vanden inslach.

57

Maer wordet noch ghesien, aent cleedt, aenden wtslach, aenden inslach, oft aen alderley velwerck, so ist een placke, ende salt met viere verbernen, daer sulck teecken in is.

58

Mer dat cleet, oft wtslach, oft inslach, oft alderley velwerck dat ghewasschen is, ende dat teecken achter gelaten heeft, salmen noch eens wasschen, soo ist reyn.

59

Dat is de wet ouer de teeckenen der lazarien, aen de cleederen, oft sy wullen zijn oft lijnen, aenden wtslach oft aenden inslach, ende aen alderley velwerck, reyn oft onreyn te spreken.