Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Vande onreynicheyt eender barender vrouwen, van haer onreyninghe ende offeren.

1

⁺ ENde de HEEre sprack met Mose, seggende:

+ A vers 1

2

Spreect met den kinderen Israels ende segt: Wanneer een wijf besadet wordt, ende baert eenen sone. So sal sy seuen daghen onreyn zijn, soo langhe sy haer crancheyt lijdet,

3

Ende inden^† achsten daghe salmen dat vleesch zijns voorhuyts besnijden.

† Gene. 17.b.9.

4

Ende sy sal in huys blijuen, driendertich daghen in dat bloet haerder Reyninghe. Niet Heylichs en sal sy aenroeren, ende totten Heylichdom en sal sy niet comen, tot dat de dagen haerder reyninge wt zijn.

5

Mer baert sy een meysken, soo sal sy twee weken onreyn zijn, so langhe sy haer crancheyt lijdet. Ende sal sesentsestich daghen in huys blijuen, inden bloede haerder Reyninghe.

6

⁺⁺ Ende als de daghen haerder Reyninghe wt zijn, voor den Sone oft voor de Dochter, soo sal sy een iarich Lam brenghen tot eenen Brantoffer, ende een ionghe Duyue oft Tortelduyue tot eenen Sondoffer, den Priester voor de duere der Hutten des getuychenis.

+ B vers 6

+ Luc. 2.d.22.

7

Die salt offeren voor den HEEre ende versoenense, so wortse reyn van haren Bloetganc. Dat is de Wet voor de ghene, die een Knechtken oft een Meysken baert.

8

Maer^* en vermach haer hant gheen schaep, so neme sy twee Tortelduyuen of twee ionghe Duyuen, die een tot eenen Brantoffer, de ander tot een Sondoffer. Soo salse de Priester versoenen dat sy reyn worde.

* Leuit. 5.b.7. 14.d.21.