Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Vande doot Nadabs ende Abihu, de Priesters wort verboden wijn te drincken. Ende haer deel wert hen bestelt vanden verbernden Bocke.

1

⁺ ENde Aarons soonen^† Nadab ende Abihu namen een yeghelijck zijnen Nap, ende dede vier daer in, ende leyden ruecwerck daer op, ende brochten dat vreemde vier voor den HEEre,^* dat hy hen niet gheboden en hadde.

+ A vers 1

† Leuit. 16.a.1. Nu. 26.g.61.

* Exod. 30.b.9.

2

Doen ghincker een vier wt vanden HEEre, ende verteerdese, dat si storuen voor den HEEre.

3

Doen sprack Mose tot Aaron: Dat ist, dat de HEEre gheseyt heeft: Ick sal geheylicht worden aenden ghenen die my ghenaken, ende voor alle den volcke sal ick heerlijck worden. Ende Aaron sweech stille.

4

⁺ Maer Mose riep Misael ende Elzaphan Vsiels sonen Aarons ooms, ende sprac tot hen: Tredet toe, ende draecht uwe broeders vanden Heylichdom buyten voor den Leger.

+ B vers 4

5

Ende si traden toe, ende droegense buyten met haren lijnen rocken voor den Legher, so Mose gheseyt hadde.

6

Doen sprac Mose tot Aaron, ende sinen sonen: Eleazar ende Ithamar:^† Ghy en sult uwe hooft niet ontdecken, noch uwe cleederen niet schueren, op dat ghy niet en sterft, ende tooren ouer de gantsche Menichte come, laet uwe broederen van alle den huyse Israels weenen ouer desen brandt, die de HEEre gedaen heeft,

† Deut. 14.a.1.

7

Maer ghy en sult niet wtgaen vander dueren der Hutten des ghetuychenis, ghy mocht steruen, want de salfolie des HEEren is op v. Ende si deden so Mose seyde.

8

⁺ Maer de HEEre sprack met Aaron, seggende:

+ C vers 8

9

Ghy ende v sonen met v,^* en sult geenen wijn noch stercken dranc drincken, als ghy in de Hutte des ghetuychenis gaet, op dat ghy niet en sterft. Dat si een eewich recht allen uwen nacomelinghen.

* Eze. 44.d.20 Tit. 1.b.7.

10

Op dat ghy cont onderscheyden, wat heylich ende onheylich, wat reyn ende onreyn is.

11

Ende dat ghy de kinderen Israels, leert al de rechten, die de HEEre tot v ghesproken heeft door Mose.

12

⁺ Ende Mose sprack met Aaron ende met sinen ouergebleuen soonen, Eleazar ende Ithamar:^† Neemt datter ouerghebleuen is, vanden Spijsoffer aenden offer des HEEren, ende etet onghesuert by den Altaer, want het is dat Alderheylichste.

+ D vers 12

† Leuit. 2.a.3.

13

Maer ghy sullet in de heylige plaetse eten, Want dat is v recht, ende uwer sonen recht aenden offer des HEEren, want so ist my geboden:

14

Maer de Beweechborst, ende de Hefschouder sult ghy, ende uwe sonen, ende uwe dochteren met v, eten in de reyne stede. Want alsulcken recht is v, ende uwen kinderen gegeuen aen dat Dancoffer der kinderen Israels.

15

Want de Hefschouder ende de Beweechborst tot den offer des vets, worden inghebrocht dat si tot een Beweginge beweecht worden voor den HEEre. Daerom ist v, ende uwe kinderen tot eenen eewighen rechte, so de HEEre gheboden heeft.

16

⁺ Ende Mose sochte den bock des Sondoffers, ende vanten verbrant, ende hy wert toornich op Eleazar, ende Ithamar Aarons sonen, die noch ouerbleuen waren, ende sprack:

+ E vers 16

17

Waerom en hebdy dat Sondoffer niet gheten, in de heylighe plaetse, want het dat Alderheylichste is, ende hy heuet v ghegeuen, dat ghy de misdaet der Menichte dragen sout, dat ghyse versoent voor den HEEre?

18

Siet, zijn bloet en is niet gecomen in dat Heylichdom, ghy soudet in dat Heylichdom gheten hebben, soo alst my gheboden is.

[p. 40v]

19

Maer Aaron sprack tot Mose: Siet, heden hebben si haer Sondoffer ende haer Brantoffer, voor den HEEre geoffert. Ende het is my alsoo ghegaen, als ghy sien moecht. Ende soude ick heden eten vanden Sondoffer, soude dat den HEEre behaghen?

20

Doen Mose dat hoorde, liet hijt hem ghenoegen.