Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Hoe Aaron ende zijne soonen yerst den offer voor de sonde gebruyct hebben. Ende dat vier van Godt gesonden, die dat brantoffer verteert heeft.

1

⁺ ENde opten achsten dach liet Mose Aaron ende zijn sonen, ende de Ouders in Israel roepen, ende sprack tot Aaron:

+ A vers 1

2

Neemt tot v een ionck calf tot een sondoffer, ende eenen Ram tot eenen Brandtoffer, beyde sonder smette, ende brengtse voor den HEEre.

3

Ende spreect metten kinderen Israels, seggende: Neemt eenen gheyten bock tot eenen sondoffer: Ende een calf, ende een schaep beyde een iaer out, ende onbesmet, tot eenen Brantoffer:

4

Ende eenen Osse, ende eenen Ram, tot een Danckoffer, dat wy voor den HEEre offeren: Ende een Spijsoffer met olie gemengt. Want heden sal v de HEEre openbaren.

5

⁺ Ende si namen al wat Mose gheboden hadde, voor de duere der Hutten des getuychenis, ende de gheheele Menichte tradt daer toe, ende stont voor den HEEre.

+ B vers 5

6

Doen sprack Mose: Dat ist dat de HEEre geboden heeft, dat ghy doen sult, soo sal v des HEEren heerlicheyt openbaren.

7

Ende Mose sprack tot Aaron:^† Treet totten Altaer, ende maeckt uwe

† Heb. 5.a.4. 7.d.26.

[p. 40r]

Sondoffer, ende v Brantoffer, ende versoent v, ende dat volck: Daer nae maeckt des volcx offer, ende versoentse oock, also de HEEre gheboden heeft.

8

Ende Aaron tradt totten Altaer,^* ende sloech dat calf tot sinen sondoffer.

* Leuit. 4.c.13.

9

Ende zijn sonen brachten dat bloet tot hem, ende hy stack sinen vingher int bloet, ende stipte daermede op de hoornen des Altaers, ende goot dat bloet aenden bodem des Altaers:

10

Maer dat vet ende de nieren, ende dat net van de leuere aen den sondoffer, ontstac hy opten Altaer. Also de HEEre Mose beuolen hadde.

11

Ende dat vleesch ende dat vel^* verbernde hy met vier buyten den Legher.

* Heb. 13.b.11.

12

⁺ Daer nae sloech hy dat brantoffer, ende Aarons sonen brochten dat bloet tot hem, ende hy sprengdet alom opten Altaer.

+ C vers 12

13

Ende si brochten dat brantoffer tot hem in stucken ende dat hooft, ende hy ontstact opten Altaer,

14

Ende hy wiesch dat ingewant, ende de schenckelen, ende ontstackt bouen op den brandtoffer, opten Altaer.

15

Daer na^† bracht hy daer des volcx offer, ende nam den bock, dat sondoffer des volcx,

† Leui. 4.a.4.

16

Ende sloech hem, ende maecte een sondoffer daer wt, gelijck dat voorste, ende bracht daer dat Brantoffer, ende dedet soot behoort.

17

^† Ende bracht daer den Spijsoffer, ende nam zijn hant vol, ende ontstact opten Altaer, sonder des morgens Brantoffer.

† Leuit. 2.a.1.

18

⁺ Daer nae sloech hy den Osse, ende den Ram tot eenen Dancoffer des volcx:

+ D vers 18

19

Ende zijn sonen brachten hem dat bloet, dat sprengde hy opten Altaer alom. Maer dat vet vanden Osse, ende vanden Ram, den steert, ende dat vet aen dat ingewant, ende de nieren, ende dat net om de Leuer,

20

Alsulcken vet leyden si op de borst, ende ontstaken dat vet opten Altaer:

21

^† Maer de borst ende de rechte schouder beweechde Aaron tot een Beweginghe voor den HEEre, soo de HEEre Mose gheboden hadde.

† Leuit. 7.d.31.

22

Ende Aaron hief zijn hant op totten volcke ende gebenedijdese, ende clam neder doen hy dat Sondoffer, Brantoffer, ende Dancoffer volbracht hadde.

23

Ende Mose ende Aaron gingen in de Hutte des getuychenis, ende als si weder wt gingen gebenedijden si dat volc. Doen openbaerde de heerlicheyt des HEEren al den volcke.

24

^† Want dat vier quam wt vanden HEEre, ende verteerde opten Altaer dat Brandtoffer, ende dat vet. Doen alle dat volck dat sach, verblijden si hen seer, ende vielen op haer aensicht.

† 2.Mac. 2.b.10 2.Par. 7.a.1. 3.Re. 18.e.38.