Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Van Aaron ende zijne sonen, Oock vander wooninghe, wijnge, ende saluinghe.

1

⁺ ENde de HEEre sprack met Mose, seggende:

+ A vers 1

2

Neemt Aaron ende zijne soonen met hem,^* ende haer cleederen, ende de salfolie, ende eenen Osse tot een Sondoffer. Twee Rammen, ende eenen corf met onghesuerden broode.

* Exod. 28.a.2.

3

Ende vergadert de gantsche Menichte voor de duere der Hutten des getuychenis.

4

Mose dede so hem de HEEre geboot, ende vergaderde de Menichte voor de duere der Hutten des ghetuychenis,

5

Ende sprack tot haer: Dit ist, dat de HEEre gheboden heeft te doen.

6

Ende nam Aaron ende zijne soonen, ende wiessche met water.

7

Ende tooch hem den lijnen rock aen, ende gorde hem met den gordel, ende trock hem den ghelen zijden rock aen, ende dede hem den

[p. 39v]

lijfrock aen, ende gorde hem bouen op den lijfrock.

8

⁺ Ende dede hem den borstlap aen, ende in die borstlap LICHT ENDE RECHT.

+ B vers 8

9

Ende sette hem den hoet op zijn hooft, ende settede aenden hoet, bouen aen zijn voorhooft de gulden plate aen de heylighe croone, alsoo de HEEre Mose gheboden hadde.

10

^* Ende Mose nam de salfolie, ende salfde de Wooninghe, ende al wat daer in was, ende wijedet,

* Exod. 30.c.26

11

Ende sprengde daermede seuenmael opten Altaer, ende salfde den Altaer, met alle zijnder gereetschappen. Dat handtuat met sinen voete, dattet ghewijt wert,

12

Ende goot van de salfolie op^† Aarons hooft, ende salfde hem, dat hy gewijt werde.

† Psal. 133.a.2.

13

Ende doen brocht hy oock Aarons soonen, ende trock hen lijnen rocken aen, ende gordese met den gordel, ende bandt hen huyuen op, also hen de HEEre gheboden had.

14

^+‡ Ende liet daer brengen eenen Osse tot eenen Sondoffer: Ende Aaron met sine sonen leyden haer handen op zijn hooft, doen sloechmen hem,

+ C vers 14

‡ Exod. 29.b.10

15

Ende Mose nam vanden bloede, ende stipte daermede op de hoornen des Altaers, rontom met sinen vinger, ende ontsondichde den Altaer, ende goot dat bloet aen den bodem des Altaers, ende wijde hem, dat hy hem versoende,

16

Ende nam al dat vet aent ingewant, dat net om de leuer, ende de twee nieren metten vette daer aen, ende ontstact opten Altaer.

17

^* Maer den Os met zijn vel, vleesch ende mest verbrande hy met vier buyten den leger, also hem de HEEre gheboden had.

* Exo. 29.b.14.

18

^+† Ende bracht eenen Ram tot eenen Brantoffer, ende Aaron met sine sonen leyden haer handen op zijn hooft,

+ D vers 18

† Exod. 29.c.15.

19

Doen sloechmen hem. Ende Mose sprengde vanden bloede opten Altaer alom,

20

Hieu den Ram in stucken, ende ontstac dat hooft, de stucken, ende den romp.

21

Ende wiesch dat ingewant, ende de schenckelen met water, ende ontstack also den geheelen Ram op den Altaer. Dat is een Brantoffer tot eenen soeten rueck, een vier den HEEre, soo hem de HEEre gheboden had.

22

^‡ Oock bracht hy den anderen Ram des Vuloffers, ende Aaron met sine soonen leyden haer handen op zijn hooft,

‡ Exo. 29.c.19.

23

Ende doen sloechmen hem. Ende Mose nam van sinen bloede, ende stipte Aaron daermede op dat lapken van zijn rechter oor, ende op den duym van zijnder rechter hant, ende op den grooten teen van sinen rechteren voet.

24

Ende bracht ooc Aarons soonen, ende stipte met den bloede opt lapken van haer rechter oor, ende opten duym haerder rechter handt, ende opten grooten teen van haren rechteren voet. Ende sprengde dat bloet alom opten Altaer.

25

^+* Ende nam dat vet ende den steert, ende alle dat vet aent inghewant, ende dat net om de leuer, de twee nieren metten vette daer aen, ende de rechte schouder.

+ E vers 25

* Exo. 29.d.22.

26

Daertoe nam hy wt den corf des ongesuerden broots, voor den HEEre, eenen onghesuerden koeck, ende eenen koeck geolijts broots, ende een vlade, ende leydet op dat vet, ende op de rechte schouder.

27

Ende gaf dat al tsamen in de handen Aarons ende zijnder soonen, ende si Beweechdent, tot een Beweginghe, voor den HEEre.

28

Ende namt al weder van haren handen, ende ontstackt opten Altaer, bouen opten Brandtoffer, want tis een Vuloffer, tot eenen soeten rueck, een vier den HEEre.

29

⁺ Ende^† Mose nam de borst, ende Beweechde een Beweginge, voor den HEEre vanden Ramme des Vuloffers, die werdt Mose tot sinen deele, soo hem de HEEre gheboden hadde.

+ F vers 29

† Exo. 29.e.26.

30

Ende Mose nam vande salfolie, ende van dat bloet opten Altaer, ende sprengde op Aaron ende zijn cleederen, op zijn soonen ende op haer cleederen. Ende wijde also Aaron ende zijne cleederen. Sijn soonen ende haer cleederen met hem.

31

Ende sprac tot Aaron ende sinen soonen:^† Cooct dat vleesch voor de duere der Hutten des getuychenis, ende etet aldaer, daer toe ooc dat broot inden korue des Vuloffers, so my geboden is, ende gheseyt, als dattet Aaron ende zijn soonen eten souden.

† Exod. 29.f.31.

32

Watter ouer blijft vanden vleesche, ende vanden broode, dat suldy met vier verbernen.

33

⁺ Ende ghy en sult binnen seuen dagen niet wtgaen vander dueren der Hutten des ghetuychenis, tot dien dage, dat de daghen ws Vuloffers wt zijn. Want seuen dagen zijn v handen gheuult,

+ G vers 33

34

Also dat nv in desen dage gheschiet is. De HEEre heuet gheboden te doen, op dat ghy versoent zijt. Ende sult voor de Hutte des getuychenis dach ende nacht blijuen seuen dagen lanck.

35

Ende sult gaey slaen de wacht des HEEren, dat ghy niet en sterft, want also ist my geboden.

36

Ende Aaron met sinen sonen dedent, al wat de HEEre door Mose gheboden had.