Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Vanden offer, van dat vette ende tbloet, ende vander saluinghe des Priesters.

1

⁺ ENde dit is de wet des Scultoffers, ende dat is dat Alderheylichste.

+ A vers 1

2

Inde plaetse, daermen dat Brantoffer slaet, salmen oock dat Schultoffer slaen, ende zijn bloet al om op den Altaer sprenghen:

3

Ende alle zijn vet salmen offeren. Den steert, ende dat vet aent ingewant,

4

De twee nieren, metten vette dat daer aen is aen de lendenen, ende dat vette om de leuere, aen de nieren afgescuert.

5

Ende de Priester salt opten Altaer

[p. 39r]

ontsteken, tot een vier des HEEren, dat is een Schultoffer.

6

Wat manlijck is onder de Priesters, sullen dat eten in de heylighe plaetse, want het is dat Alderheylichste.

7

Als dat Sondoffer, also sal oock dat Schultoffer zijn. Alle beyder, sal eenderhande Wet zijn, ende sal den Priester toebehooren, die daer door versoent.

8

De Priester die yemants Brandtoffer offert, die sal des selfs Brantoffers vel hebben,

9

Dat hy geoffert heeft. Ende alle dat Spijsoffer dat inden ouen, oft opten rooster, oft inder pannen gebacken is, sal de Priester hebben, die dat offert.

10

Ende alle Spijsoffer dat met olie ghemengt, oft drooghe is, sullen alle Aarons kinderen hebben, die een ghelijck de ander.

11

⁺ Ende dit is de wet des Dancoffers, datmen den HEEre offert:

+ B vers 11

12

Willen si een^† Lofoffer doen, so sullen si ongesuerde koecken offeren met olie gemengt, ende onghesuerde vladen met olie bestreken, ende gerootste Semelkoecken met olie ghemengt.

† Psa. 116.b.17

13

Maer si sullen sulcken offer doen op eenen koecke, van gesuerden broode, tot eenen Lofoffer zijns Dancoffers.

14

Ende sal een van allen den HEEre tot een Heffinge offeren, ende sal des Presters zijn, die dat bloet des Danckoffers sprengt.

15

Ende dat vleesch des Lofoffers in sinen Danckoffer, sal inden seluen daghe ghegeten worden, dat het gheoffert is, ende niet ouergelaten worden tot aenden Morghen.

16

Ende het si een ghelouet oft vrijwillich offer, so salt^* inden seluen daghe dattet gheoffert is, gheten worden:

* Leuit. 19.b.6.

17

Maer ofter yet ouer blijft tot inden anderen daghe, so salment doch eten. Maer watter vanden geofferden vleesche ouer blijft tot inden derden daghe, dat sal met vier verbrandt worden.

18

Ende oft yemant inden derden daghe eten sal vanden geofferden vleesche zijns Danckoffers, soo en sal hy niet aenghenaem zijn, diet gheoffert heeft, het en sal hem oock niet toegerekent worden, maer het sal een grouwel zijn.

19

⁺ Ende de siele die daer af eten sal, is eender misdaet schuldich.

Ende dat vleesch dat yet onreyns aenroert, en sal niet gegeten, maer met vyer verbrant worden. Maer wie suyuer is van lichaem, sal van desen vleesche eten.

+ C vers 19

20

Ende so wat siele eten sal vanden vleesche des Danckoffers, dat den HEEre toe behoort, der seluer onreynicheyt si op haer, ende sal van haren volcke wtgheroyt worden.

21

Ende als een siele yet onreyns aenroert, het si een onreyn mensche, Vee, oft wat anders grouwelijc is, ende vanden vleesche des Danckoffers eet, dat den HEEre toebehoort, die sal wtgeroyt worden, van haren volcke.

22

Ende de HEEre sprack met Mose, segghende:

23

Spreeckt metten kinderen Israels, ende seght: Ghy en sult geen vet eten vanden Ossen, lammeren, ende gheyten.

24

Maer dat vet van een Aes, ende wat van een wilt verschuert is, maket v tot alderley nut: Maer ghy en sult het niet eten.

25

Want soo wie dat vet eet vanden Vee, dat den HEEre tot eenen offer ghegeuen is, de selue siele sal wtgeroyt worden van haren volcke.

26

Ghy en sult oock gheen^* bloet eten, noch van Vee, noch van voghelen, waer dat ghy woont.

* Gen. 9.a.4. Leu. 3.c.17. 17 c.14. 19.f.27. Deu. 12.c.23. 1.Re. 14.e.32.

27

So wat siele eenich bloet eten sal, die sal wtgeroyt worden van haren volcke.

28

Ende de HEEre sprack met Mose, segghende:

29

Spreeckt metten kinderen Israels, ende seght: So wie den HEEre zijn Danckoffer doen wil, die sal oock mede brengen, wat tot den Danckoffer, den HEEre toebehoort.

30

⁺ Maer hy salt met zijnder handt daer brenghen tot een offer des HEEren, te weten, dat vet aen de borst, sal hy brengen met de borst, dat si een Beweghinghe worden voor den HEEre.

+ D vers 30

31

Ende de Priester sal dat vet ontsteken opten Altaer. Ende de borst sal Aaron ende zijn soonen hebben.

32

Ende de rechte schouder sullen si den Priester geuen tot een Heffinge, van haren Dancofferen.

33

Ende so wie dat onder Aarons soonen dat bloet der Danckoffer offert, ende dat vet, die sal de rechte schouder tot sinen deel hebben.

34

^† Want de Beweechborst ende de Hefschouderen heb ick ghenomen vanden kinderen Israels, van haren Danckofferen, ende hebse den Priester Aaron ende sinen soonen ghegeuen, tot een eewich recht.

† Num. 18.c.11.

35

Dit is de saluinghe Aarons ende zijnder sonen vanden offeren des HEEren, in dien daghe, als si bescheyden werden Priesters des HEEren te zijne.

36

Doen de HEEre geboot in dien daghe, doen hyse salfde, wat hen van den kinderen Israels soude gegeuen werden, tot een eewich recht, allen haren nacomelingen.

37

Ende dit is de wet des Brantoffers, des Spijsoffers, des Sondoffers, des Schultoffers, der Vuloffer, ende der Danckoffer.

38

Dat de HEEre Mose geboot opten Berch Sinai, inden dage, doen hy hem aen de kinderen Israels geboot den HEEre te offeren haren offer inder woestijnen Sinai.