Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Van Brantofferen ende ander offeren. Oock wat de Priester offeren sal inden daghe zijnder saluinghe.

1

⁺ ENde de HEEre sprack met Mose, segghende:

+ A vers 1

2

Ghebiet Aaron ende sinen sonen, ende segt: Dit is de Wet des Brandtoffers. Den^* Brantoffer sal bernen opten Altaer, alle den nacht, tot aenden morgen. Maer des Altaers vier sal alleen daer op bernen.

* Exod. 29.g.38

3

Ende de Priester sal sinen lijnen rock aentrecken, ende de lijnen broeck aen zijn lijf. Ende sal de asschen afnemen, die dat vier des Brantoffers opten Altaer ghemaeckt heeft, ende salse neffens den Altaer schudden.

4

Ende sal zijn cleederen daer nae wt doen, ende ander cleederen aen doen, ende de asschen wt draghen buyten den legher, aen een reyn stede.

5

Dat vier opten Altaer sal bernen, ende nemmermeer verblusschen. De Priester sal alle morghen hout daer op ontsteken, ende daer bouen op den Brandtoffer bereyden, ende dat vet des Danckoffers daer op ontsteken.

6

Eewich sal dat vier opten Altaer bernen, ende nemmermeer verblusschen.

7

⁺ Ende dat is de Wet des^* spijsoffers, dat Aarons sonen offeren sullen voor den HEERE opten Altaer.

+ B vers 7

* Leuit. 2.a.2. Num. 15.a.4.

8

Daer sal een heffen zijn hant vol Semelmeels, vanden Spijsoffer ende vander olien, ende alle den Wierooc die op dat Spijsoffer leyt, ende salt ontsteken opten Altaer tot eenen soeten ruec, een gedachtenisse den HEEre.

9

Maer dat daer ouer is, sullen Aaron ende zijn sonen verteren, ende salt onghesuert eten, in de heylighe stede, inden voorhof der Hutten des getuychenis.

10

Sy en sullen niet met suerdeech backen, want het is haer deel dat ick hen gegheuen hebbe van mijnen offer. Het sal hen dat Alderheylichste zijn, ghelijck als den Sondoffer ende Schultoffer.

11

Wat mannelijck is onder de kinderen Aarons, sullent eten. Dat sy een eewich recht uwen nacomelinghen, vanden offeren des HEEren. Niemant en salse aenroeren, hy en sy ghewijt.

12

⁺ Ende de HEEre sprack met Mose, segghende:

+ C vers 12

13

Dat sal Aarons ende zijnder sonen offer zijn, dat si den HEEre offeren sullen, inden dage zijnder saluingen. Dat thiende deel Ephi van Semelmeel, tot een dagelijcx Spijsoffer, die een helft des morghens, ende de ander helft des Auonts.

14

Inder pannen met olie suldijt maken, ende gheroost in brenghen. Ende in stucken ghebacken suldy sulcx offeren tot eenen soeten ruecke den HEEre.

15

Ende de Priester die onder zijn sonen, in zijn plaetse gesalft wort, sal sulcx doen. Dat is een eewich recht den HEEre. Het sal al verbernt worden.

16

Want alle dat spijsoffer eens Priesters, sal gants verbernt ende niet gheten worden.

17

⁺ Ende de HEEre sprack met Mose, segghende:

+ D vers 17

18

Segt Aaron ende zijn sonen, ende spreect: Dit is de Wet des Sondoffers. Inder stede, daer ghy dat Brantoffer slaet, suldy ooc dat Sondoffer slaen voor den HEEre, dat is dat Alderheylichste.

19

^† De Priester die dat Sondoffer offert, salt eten in de heylighe plaetse, inden voorhof der Hutten des ghetuychenis.

† Osee. 4.b.8.

20

Niemant en sal zijn vleesch aenroeren, hy en sy dan gheheylicht. Ende so wie van sinen bloede een cleet besprengt, die sal dat besprengde stuck wasschen in de heylighe plaetse.

21

^† Ende den aerden pot daert in gekooct is, salmen breken: Mer ist eenen metalen pot, so salmen hem scueren, ende met water spoelen.

† Leuit. 11.e.33. 15.b.12.

22

Wat manlijck is onder de Priesters, sullen daer af eten. Want het is dat Alderheylichste.

23

Maer alle dat Sondoffer, daer dat bloet af ghebrocht wort inde Hutte des ghetuychenis, om te versoenen inden heylighen, ende salmen niet eten, maer met vier verbranden.