Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Wat gheoffert sal worden voort valsch sweeren, voor een dwalinghe oft voor een onwetenheyt.

1

⁺ SOndicht een siele,^† hoorende eenen vloeck ende hy des ghetuyghe is, oft heeft hijt ghesien oft gheweten, ende en heuet niet te kennen ghegeuen, die is eender misdaet schuldich.

+ A vers 1

† Leuit. 24.c.11

2

^† Oft als een siele yet onreyns aenroert, het sy een aes van eenen onreynen diere, oft Vee, oft van eenich gewormte, ende en wist niet, die is onreyn, ende heeft haer schuldich ghemaect.

† Agg. 2.b.14. 2.Cor. 6.c.17.

3

Oft als hy een onreyn mensche aenroert, in wat onreynicheyt eenich mensche ontsuyuert mach worden, ende en wistes niet, ende wordet ghewaer, die heeft hem schuldich ghemaect.

4

Oft als een siele sweert, dat haer wten monde ontgaet, quaet oft goet te doen, als dan eenen mensche een sweeren ontgaen mach, eer hijt bedenct, ende wordet ghewaer, die heeft haer aen dier een sculdich ghemaect.

5

⁺ Alst nv coemt, dat hy hem aen dier een schuldich ghemaeckt heeft, ende wordet bekennende dat hy daer aen ghesondicht heeft,

+ B vers 5

6

Soo sal hy voor zijn schult deser siner sonden, die hy ghedaen heeft, den HEEre brenghen, vander Cudden, een schaep oft geyten moeder, tot eenen Sondoffer, soo sal hem de Priester zijn sonde versoenen.

7

^* Maer en vermach hy geen schaep, soo brenghe hy den HEERE voor zijn schult die hy ghedaen heeft, twee Tortelduyuen oft twee Ionghe duyuen, de eene tot eenen Sondoffer, de ander tot eenen Brantoffer,

* Leuit. 12.b.8.

8

Ende brenghese den Priester, die sal deerste bereyden tot eenen Sondoffer, ende haer dat hooft afnijpen achter den necke, ende doch niet af breken,

9

Ende sprenge metten bloede des Sondoffers aenden wandt vanden Altaer, ende laten dat bloet datter ouer is, wtbloeden aenden bodem des Altaers, dat is dat Sondoffer.

10

⁺ Maer de ander sal hy tot een Brantoffer bereyden na sinen rechte. Ende also sal hem de Priester zijn sonde versoenen die hy ghedaen heeft, soo wordet hem vergheuen.

+ C vers 10

11

Maer en vermach hy niet twee tortelduyuen oft twee Ionghe duyuen, soo brenghe hy voor zijn sonde tot eenen offer, Een thiendendeel Ephi Semelmeels tot eenen Sondoffer. Mer hy en sal daer gheen olie op doen, noch Wieroock daer op legghen, want het is een Sondoffer.

12

Ende salt tot den Priester brenghen: Ende de Priester sal daer een handt vol af nemen tot een ghedachtenis, ende ontsteken opten Altaer tot eenen viere den HEEre, dat is een Sondoffer.

13

Ende de Priester sal hem also zijn sonde, die hy ghedaen heeft, versoenen, so wordet hem vergheuen. Ende het sal des Priesters zijn als een Spijsoffer.

14

⁺ Ende de HEEre sprac met Mose, segghende:

+ D vers 14

15

Wanneer een siel haer vergrijpt, dat zijt versiet ende haer besondicht, aen dat ghene dat den HEEre ghewijt is, soo sal si haer Schultoffer den HEEre brenghen, eenen Ram sonder smette vander Cudden, die twee Sikel siluers weert sy,^* nae den Sikel des Heylichdoms,

* Exod. 30.b.13.

16

Tot eenen Schultoffer. Daer toe sal hy weder gheuen dat ghene, daer hy hem aen besondicht heeft, ende dat vijfste deel daer bouen gheuen, ende salt den Priester gheuen, die sal hem versoenen met den Ramme des Schultoffers, soo wordet hem vergheuen.

17

Als een siele sondicht, ende doet ergens teghen een ghebot des HEEren, dat sy niet doen en soude, ende en heeftet niet gheweten, die heeft haer beschuldicht, ende is eender misdaet sculdich.

18

Ende sal bren-

[p. 38v]

ghen eenen Ram vander cudden, sonder smette die eens schultoffers weert is, totten priester: Die sal hem zijn onwetenheyt versoenen, die hy gedaen heeft, ende en wistet niet, so wordet hem vergeuen.

19

⁺ Dat is dat Schultoffer, dat hy den HEEre veruallen is.

+ E vers 19

20

Ende de HEEre sprack met Mose, seggende:

21

Wanneer een siele sondicht, ende haer aen den HEEre vergrijpt, dat hy sinen euen mensche verloochent, dat hy hem beuolen heeft, oft dat hem ter trouwer hant gedaen is, oft dat hy hem met ghewelt ghenomen, oft met onrecht vercreghen heeft,

22

Oft dat verloren is, geuonden heeft, ende verloochent sulcx met eenen valschen eedt, Indient dier een is, daer een mensche tegen sinen naesten sonde in doet.

23

Alst nv ghebuert,^* dat hy also sondicht, ende hem seluen besculdicht, soo sal hy weder gheuen, dat hy met ghewelt ghenomen, oft met onrecht vercreghen heeft, oft dat hem betrout was,

* Num. 5.a.5.

24

Oft dat hy geuonden heeft, oft tgene daer hy den valschen eet om gedaen heeft, dat sal hy al heel weder gheuen, daer toe oock noch dat vijfste deel meer, den ghenen die dat toe behoort heeft, in dien daghe als hy zijn Schultoffer geeft. Maer voor zijn scult sal hy den HEEre totten Priester, eenen onbesmetten Ram vander Cudden brengen, die eenen Schultoffer weert is.

25

So sal hem de Priester versoenen voor den HEEre, so wordet hem vergheuen al wat hy gedaen heeft, daer aen hy hem beschuldicht heeft.