Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Van Sondoffer des Priesters, voor de gheheele gemeynte, des ouersten oft by eenen bysonderen persoon.

1

⁺ ENde de HEEre sprack met Mose, segghende:

+ A vers 1

2

Spreect metten kinderen Israels, ende segt: Als een siele sondicht, wt onwetenheydt aen eenich ghebot des HEEren, dat si niet doen en soude, te weten,

3

Ist dat een Priester, die ghesalft is, sondicht, dat hy dat volck arghert, die sal voor zijn sonde, die hy gedaen heeft, eenen ionghen Osse brengen, die sonder smette is, den HEEre tot eenen Sondoffer.

4

^† Ende sal den Osse voor de duere der Hutten des getuychenis voor den HEEre brengen, ende zijn hant op des selfs hooft legghen, ende slaen voor den HEEre.

† Leuit. 9.c.15.

5

Ende de Priester die ghesalft is, sal vanden bloede des Ossen nemen, ende in de Hutte des getuychenis brengen.

6

^† Ende sal sinen vingher in dat bloet steken, ende daer mede seuenmael sprenghen voor den HEEre, voor dat voorhancsel des heylighen.

† Leuit. 16.d.19

7

⁺ Ende sal vanden seluen bloede doen op de hoornen des rueck Altaers, die voor den HEEre in de Hutte des getuychenis staet. Ende al dat bloet ghieten aenden bodem des Brantoffers Altaers, die voor der Hutten duere des getuychenis staet.

+ B vers 7

8

Ende al dat vet des Sondoffers sal hy Heffen, te weten, dat vet aent inghewant,

9

De twee nieren, metten vette dat daer aen is aen de lendenen, ende dat net ouer de leuer aen de nieren afgeschuert,

10

Ghelijc als hijt Heft van ossen inden Danckoffer, ende salt ontsteken op des Brantoffers Altaer.

11

^+† Mer dat vel des Ossen met alle den vleessche, met den hoofde ende schenckelen, ende dat ingewant ende dat mest sal hy al wt voeren buyten den leger,

+ C vers 11

† Exo. 29.b.14. Num. 19.a.5.

12

Aen een reyne stede, daermen de asschen scut, ende salt verbernen op hout met vier.

13

^* Wanneert een gantsce Menichte in Israel versien sal, ende de daet voor haren ooghen verborghen waer, dat sy erghens teghen een ghebot des HEEren ghedaen hadden, dat sy niet doen en souden, ende alsoo haer schuldich maeckten,

* Leuit. 9.c.15. Num. 15.a.1.

14

Ende daer nae haer sonden ghewaer werden, die si ghedaen hebben, so sullen si eenen ionghen Osse daer brenghen tot eenen Sondoffer, ende voor de duere der Hutten des ghetuychenis stellen.

15

Ende de ouders vander Menichte sullen haer handen op zijn hooft leggen voor den HEEre, ende den Osse slaen voor den Heere.

16

⁺ Ende de Priester die ghesalft is, sal tbloet vanden Osse in de Hutte des ghetuychenis brenghen,

+ D vers 16

17

Ende met sinen vingher daer in stippen, ende seuenmael sprenghen voor den HEEre, voor dat voorhancsel.

18

Ende sal vanden bloede op de hoornen des Altaers strijcken, die voor den HEERE staet, in de Hutte des ghetuychenis, ende al dat ander bloet aenden bodem des Brantoffers Altaers ghieten, die voor de duere der Hutten des ghetuychenis staet.

19

Maer alle zijn vet sal hy Heffen, ende opten Altaer ontsteken.

20

Ende sal met den Osse doen, soo hy met den Osse des Sondoffers gedaen heeft, ende also salse de Priester versoenen, so wordet hen vergheuen.

21

Ende sal den Osse buyten den legher brenghen, ende verbernen so hy den eersten verbernt heeft. Dat sal dat Sondoffer der Menichten zijn.

22

⁺ Maer wanneer een Vorst sondicht, ende erghens teghen des HEEREN zijns Gods gebot doet, dat hy niet doen en soude, ende versietet dat hy hem sculdich

+ E vers 22

[p. 38r]

maect,

23

Ende zijn sonde gewaer wort, die hy ghedaen heeft, die sal tot eenen offer brenghen eenen gheyten bock sonder smette,

24

Ende zijn handt op des bocks hooft legghen, ende hem slaen, op de stede daermen den Brandtoffer slaet voor den HEEre, dat sy zijn Sondoffer.

25

Soo sal dan de Priester vanden bloede des Sondoffers nemen met sinen vinger, ende op de hoornen des Brantoffers Altaer strijcken, ende dat ander bloet aen den bodem des Brantoffers Altaers gieten.

26

Maer alle zijn vet sal hy opten Altaer ontsteken, ghelijck als dat vet des Danckoffers. Ende alsoo sal de Priester zijn sonden versoenen, soo wordet hem vergheuen.

27

^+* Maer ist dat een siele vanden ghemeynen volcke versiet ende sondicht, dat si erghens teghen een vanden gheboden des HEEren doet, dat si niet doen en soude, ende haer alsoo schuldich maeckt,

+ F vers 27

* Num. 15.c.22.

28

Ende haer sonde ghewaer wordt, die si ghedaen heeft. Die sal totten Brantoffer brenghen een gheyte sonder smette, voor de sonde die si ghedaen heeft,

29

Ende sal haer handt op des Sondoffers hooft legghen, ende slaent aen de stede des Brantoffers.

30

Ende de priester sal vanden bloede met sinen vingher nemen, ende op de hoornen des Brantoffers Altaers strijcken, ende al dat ander bloet aenden bodem des Altaers ghieten.

31

Maer al zijn vet sal hy afdoen, ghelijc hy dat vet des Dancoffers afdoet, ende salt ontsteken opten Altaer, tot eenen soeten rueck den HEEre, ende alsoo salse de Priester versoenen, soo wordet haer vergheuen.

32

⁺ Maer brengt hy een schaep tot eenen Sondoffer, soo brenghe hy dat een^† Sy is sonder smette,

+ G vers 32

† Wijfken.

33

Ende legge zijn hant op des Sondoffers hooft, ende slaetet tot eenen Sondoffer, aen de stede daermen den Brantoffer slaet.

34

Ende de Priester sal vanden bloede nemen met sinen vinger, ende op de hoornen des Brantoffers Altaers strijcken, ende alle dat bloet gieten aenden bodem vanden Altaer.

35

Maer alle zijn vet sal hy afschueren, so hy dat vet vanden lamme des Dancoffers afgheschuert heeft, ende sal dat opten Altaer ontsteken, tot een vier des HEEren, ende alsoo sal de Priester zijn sonde die hy ghedaen heeft, versoenen, so wordet hem vergheuen.