Den Bibel, Inhoudende dat Oude ende Nieuwe Testament (Biestkensbijbel)

[p. 37v]

¶ Dat .iij. Capittel.

¶ Van Dancoffer, Heyloffer, Vreedoffer, ende dat Vette.

1

⁺ MAer is zijnen offer een Danckoffer van Runderen, het sy een Osse oft een Koey, so sal hi offeren voor den HEEre, dat sonder smette is,

+ A vers 1

2

Ende hy^* sal zijn hant op des selfs hooft leggen, ende slaent voor de duere der Hutten des getuychenis. Ende de Priesters, Aarons sonen, sullen dat bloet sprengen, alom ende om den Altaer.

* Exod. 29.b.10 Leuit. 1.a.4.

3

Ende sal vanden Dancoffer den HEEre offeren (te weten) alle dat vet aent inghewant,

4

Ende de twee nieren, metten vette dat daer aen is, aen de lendenen, ende dat net om de leuer aen de nieren afgheschuert.

5

Ende Aarons sonen sullent ontsteken opten Altaer tot eenen Brantoffer, op dat hout dat opten viere leydt. Dat is een vier tot eenen soeten rueck den Heere.

6

⁺ Maer wil hy den HEERE eenen Dancoffer van cleyn Vee doen, het sy een^† Hy schaep oft een Sy scaep, so salt sonder smette zijn.

+ B vers 6

† Manneken oft Wijfken.

7

Ist een Lammeken, so sal hijt voor den HEEre brengen,

8

Ende sal zijn hant op des selfs hooft legghen, ende slaent voor de duere der Hutten des getuychenis. Ende Aarons sonen sullen zijn bloet alom opten Altaer sprenghen,

9

Ende sal also vanden Dancoffer den HEEre offeren, tot een vier, te weten, zijn vet, den heelen steert vanden rugge afgheschuert, ende al dat vette aent inghewant,

10

Ende de twee nieren, metten vette dat daer aen is aen de lendenen, ende dat net om de leuere, aen de nieren afgeschuert.

11

Ende de Priester salt ontsteken opten Altaer tot eender spijsen des viers den HEEre.

12

⁺ Maer ist dat een gheyte zijn offer is, ende brengt hyse voor den HEERE,

+ C vers 12

13

So sal hy zijn hant op haer hooft legghen, ende slaense voor de Hutte des getuychenis. Ende Aarons sonen sullen dat bloet alom op den Altaer sprengen,

14

Ende sult daer af offeren een offer den HEEre, te weten, dat vet aent ingewant,

15

De twee nieren metten vette dat daer aen is aen de lendenen, ende dat net ouer de leuer aen de nieren afgheschuert.

16

Ende de Priester salt ontsteken opten Altaer totter spijsen des viers, tot eenen soeten rueck.

17

^* Alle dat vet is des HEEren. Dat sy een eewighe sede by uwen nacomelinghen, in alle uwe wooninghen,^* dat ghy gheen vet noch bloet en eet.

* Leuit. 7.c.25.

* Gene. 9.a.4. Leui. 17.d.14 19.f.27.