Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Van Spijsofferen met bloemen vanden mele, ende menigherley ghebac, onghesuert.

1

⁺ ALs een siele den HEEre een^† Spijsoffer doen wil, so salt van Semelmeel zijn, ende hy sal olie daer op gieten, ende Wieroock daer op leggen,

+ A vers 1

† Leuit. 6.b.7. Num. 15.a.4.

2

Ende dat also totten Priester brengen, Aarons sonen. Dan sal de Priester zijn handt vol nemen vanden seluen Semelmele, ende olie, met al den Wieroock ende ontsteken tot eender ghedachtenisse opten Altaer. Dat is een vier tot eenen soeten rueck den HEEre.

3

Mer datter^† ouerblijft vanden Spijsoffer, sal Aarons zijn, ende zijnder sonen. Dat sal dat Alderheylichste zijn van het vieren des HEEren.

† Leuit. 10.d.12

4

⁺ Maer wil hy een Spijsoffer doen van dat ghebacken is inden ouen, so neme hy van Semelmeel koecken, ongesuert, met olie gemengt, Ende ongesuerde vladen met olie bestreken.

+ B vers 4

5

Maer is uwe Spijsoffer, yet van ghebacken inder pannen, soo salt van onghesuerden Semelmeel met olie ghemengt zijn,

6

Ende sullet in stucken deylen, Ende olie daer op gieten, soo ist een Spijsoffer.

7

Mer is uwe Spijsoffer yet opten Rooster gheroost, so suldijt van Semelmeel met olie maken. Ende ghy sult dat Spijsoffer, dat ghy van sulckerley maken wilt den HEEre, tot den Priester brenghen, die salt totten Altaer brenghen,

8

Ende des seluen Spijsoffers Heffen tot een ghedachtenisse, ende ontsteken opten Altaer.

9

Dat is een vier tot eenen soeten rueck den HEEre.

10

⁺ Met datter ouerblijft, sal Aarons ende zijnder sonen zijn: Dat sal dat Alderheylichste zijn van het vieren des HEEren.

+ C vers 10

11

Alle Spijsoffer die ghy den HEEre offeren wilt, suldy sonder suerdeech maken.

12

Want gheen suerdeech, noch honich en sal daer onder, den HEEre, tot een vier ontsteken worden. Maer tot den offer der eerstelingen, suldijse den HEEre offeren. Maer op gheenen Altaer en sullen si comen tot eenen soeten ruecke.

13

⁺ Alle v Spijsoffer^† suldy souten. Ende uwe Spijsoffer en sal nemmermeer sonder sout des verbonts ws Gods zijn, want in alle uwe offeren suldy sout offeren.

+ D vers 13

† Mat. 5.b.13. Mar. 9.c.49. Colos. 4.a.5.

14

Mer wildy een Spijsoffer den HEEre doen, vanden eersten vruchten, so suldy de nyewelinghen aen den viere dorre maecken, ende cleyn stooten, ende alsoo suldy den Spijsoffer uwer eerster vruchten offeren,

15

Ende ghy sult daer olie op doen, ende Wieroock daer op legghen, soo ist een Spijsoffer.

16

Ende de Priester sal van dat ghestooten, ende vander olien, met al den Wieroock ontsteken, tot een gedachtenis. Dat is een vier den Heere.