Den Bibel, Inhoudende dat Oude ende Nieuwe Testament (Biestkensbijbel)

[p. 37r]

Leuiticus, Dat derde Boeck Mose.

¶ Dat eerste Capittel.

¶ Van de Ordonancie ende ghebruyck der Brantofferen, het sy Vee oft Voghelen.

1

⁺ ENde de HEERE riep Mose,^† ende sprac met hem vander Hutten des getuychenis, seggende:

+ A vers 1

† Exo. 29.g.42

2

Spreect metten kinderen Israels, ende segt tot hen: Wie onder v den HEEre eenen offer doen wil, die doet van vee, van Runderen, van Schapen.

3

Wil hy een Brantoffer doen van Ossen, so offere hy een^† Hy, die sonder smette sy, voor de duere der Hutten des ghetuychenis, dattet den HEEre aengenaem sy van hem,^†

† Manneken.

† Exod. 29.b.10 Leuit. 3.a.2.

4

Ende legghe zijn hant op des Brantoffers hooft, so salt aengenaem zijn, ende hem versoenen.

5

⁺ Ende hy sal dat ionck Runt slaen voor den HEERE. Ende de Priesters, Aarons sonen, sullen dat bloet toe brengen, ende sprengent rontom op den Altaer, die voor de duere der Hutten des ghetuychenis is.

+ B vers 5

6

Ende de huyt sal vanden Brantoffer af getrocken worden, ende het sal in stucken ghehouden worden.

7

Ende Aarons sonen des Priesters, sullen een vier opten Altaer maken, ende hout daer bouen op leggen,

8

Ende sullen de stucken, te weten, thooft ende dat vette op dat hout leggen, dat opt vier opten Altaer leyt.

9

Maer dat inghewant ende de schenckelen salmen met water wasschen, ende de Priester sal dat al ontsteken op den Altaer tot eenen Brantoffer. Dat is een vier, tot eenen soeten Rueck, den HEEre.

10

⁺ Mer wil hy van Schapen, oft van Geyten eenen Brantoffer doen, so offere hy een Hy, die sonder smette sy,

+ C vers 10

11

Ende sal hem slaen, voor aen den hoeck des Altaers teghent Noorden, voor den HEEre. Ende de Priesteren, Aarons sonen, sullen zijn bloet opten Altaer alom ende om sprenghen,

12

Ende men sal hem in stucken houwen, ende de Priester sal dat hooft ende dat vette op dat hout ende vier, dat op den Altaer is, leggen.

13

Mer dat inghewant ende de schenckelen salmen met water wasschen. Ende de Priester salt al offeren ende ontsteken opten Altaer, tot eenen Brantoffer. Dat is een vier tot eenen soeten Rueck, den HEEre.

14

⁺ Maer wil hy van vogelen den HEEre eenen Brantoffer doen, so doe hijt van Tortelduyuen oft van ionghe duyuen.

+ D vers 14

15

Ende de Priester salt tot den Altaer brenghen, ende hem dat hooft af nijpen, dattet op den Altaer ontsteken worde, ende zijn bloet laten wtbloeyen aenden wandt des Altaers.

16

Ende sinen crop met den plumen salmen neffens den Altaer tegent Oosten op den asscen hoop worpen,

17

Ende sal zijn vlueghelen cloouen, maer niet af breken. Ende alsoo salt de Priester opten Altaer ontsteken, opt hout, op dat vier tot eenen Brantoffer. Dat is een vier tot eenen soeten Rueck den HEEre.