Den Bibel, Inhoudende dat Oude ende Nieuwe Testament (Biestkensbijbel)

¶ Dat .xl. Capittel.

De HEEre beueelt Mosi de Hutte op te rechten, ende alle dinck te ordineren ende toe te bereyden.

1

⁺ ENde de HEERE sprack met Mose, segghende:

+ A vers 1

2

Ghy sult de Wooninge der Hutten des getuychenis oprechten, inden eersten dage der eerster Maent.

3

Ende ghy sult de Arcke des getuychenis daer inne setten, ende voor de Arcke dat Voorhancsel hanghen.

4

Ende ghy sult de Tafel daer henen brenghen, ende die toe bereyden, ende den Candelaer daer stellen, ende de Lampen daer op setten.

5

Ende den gulden roock Altaer suldy voor de Arcke des ghetuychenis setten, ende dat Laken in de duere der Wooninghe op hanghen.

6

Maer den Altaer des Brantoffers suldy setten buyten voor de duere der Wooninghe der Hutten des ghetuychenis.

7

Ende dat Hantvat tusschen de Hutte des getuychenis, ende den Altaer, ende water daer in ghieten,

8

Ende stellen den Voorhof daer om. Ende dat Laken op hangen in de duere des Voorhofs.

9

^+* Ende ghy sult de salue nemen, ende de Wooninghe, ende al wat daer in is, saluen, ende ghy sultse wijen, met alle haer ghereetschap, op dat sy heylich sy.

+ B vers 9

* Exod. 30.c.23.

10

Ende ghy sult den Brandtoffer Altaer saluen, met alle zijn ghereetschap, ende wijen hem, dat hy dat Alderheylichste sy.

11

Dat Hantvat ende zijnen voet suldy oock saluen ende wijen.

12

^* Ende ghy sult Aaron ende zijne Sonen voor de duere der Hutten des ghetuychenis brengen, ende met water wasschen.

* Exod. 29.a.4

13

Ende Aaron de Heylighe cleederen aen trecken, ende saluen ende wijen hem, dat hy mijn Priester sy.

14

Ende ghy sult zijne sonen daer oock brenghen, ende hen de Enghe Rocken aendoen,

15

Ende saluense ghelijckerwijs dat ghy haren Vader ghesaluet hebt, dat sy mijn Priesters zijn. Ende dese saluinghe sullen sy hebben tot eenen eeuwigen Priesterdom, by haren Nacomelingen.

16

^† Ende Mose dede alle dinck, also als de HEEre hem gheboden hadde.

† Nume. 7.a.1.

17

Aldus wert de Wooninge^* op gherecht inden tweeden Iare, inden eersten dach der eerster maent.

* Nume. 9.c.15.

18

Ende doense Mose oprechte, stelde hy de voeten ende de berderen, ende tijchelen, ende rechte de Columnen op.

19

Ende breydde de Hutte wt totter Wooninge, ende leyde dat decsel der Hutten bouen daer op, so de HEEre hem gheboden hadde.

20

Ende nam dat Ghetuychenis^* ende leydet in de Arcke, ende stack de hantboomen aen de Arcke, ende sette den Ghenaden stoel bouen op de Arcke.

* Exod. 25.a.16

21

Ende bracht de Arcke inde Wooninghe, ende hinck dat voorhancksel voor de Arcke des ghetuychenis, so hem de HEEre gheboden hadde.

22

Ende sette de Tafel in de Hutte des getuychenis inden hoec der Wooninge, Noortwaerts buyten voor dat voorhancsel.

23

Ende hy bereyde^* broot daer op, voor den HEEre, so de HEEre hem gheboden hadde.

* Exod. 25.c.30

24

Ende sette den Candelaer oock daer in teghen de Tafel ouer, in den hoeck der Wooninghe, teghent Suyden.

25

Ende sette Lampen daer op voor den HEEre soo de HEEre, hem gheboden hadde.

26

⁺ Ende hy sette den gulden Altaer daer in, voor dat voorhancsel.

+ D vers 26

27

Ende hy maecte rueck daer op, van goeden rueckwerc, so hem de HEEre gheboden hadde.

28

Ende hinck dat Laken in de duere der Wooninge.

29

Mer den Brantoffer Altaer sette hy voor de duere der Wooninghe der Hutten des ghetuychenis, ende offerde daer op Brantoffer ende Spijsoffer, so hem de HEEre gheboden hadde.

30

^* Ende dat Hantvat stelde hy tusschen de Hutte des getuychenis ende den Altaer, ende goot water daer in om te wasschen.

* Exod. 30.c.17.

31

Ende Mose ende Aaron ende zijn sonen wiesschen haer handen ende voeten daer wt.

32

Want sy moeten hen wasschen, als sy in de Hutte des getuychenis gaen, oft totten Altaer treden, so hen de HEEre gheboden hadde.

33

Ende hy rechte den Voorhof op, om de Wooninghe, ende om den Altaer rontom, ende hinc dat voorhancsel in de poorte des Voorhofs. Also volbrocht Mose alle dat werck.

34

^* Doen bedecte een wolcke de Hutte des ghetuychenis, ende de heerlijcheyt des HEEren veruulde de Wooninghe.

* 3.Reg. 8.b.10. Num. 9.c.15. Ezech. 9.a.3.

35

Ende Mose en conde in de Hutte des getuychenis niet ghegaen, dewijle dat de wolcke daer op bleef, ende de heerlijcheyt des HEEren de Wooninge veruulde.

36

Ende wanner de Wolcke haer op hief van de Wooninghe, so toghen de kinderen Israels, ende soo dickwils reysden sy.

37

Maer wanneer haer de wolcke niet op en hief, soo en toghen sy niet, tot dien daghe toe, datse haer op hief.

38

Want de Wolcke des HEEren was des daechs op de Woninghe, ende des Nachts was sy vierich voor de Oogen van alle den Huyse Israels, also langhe als sy reysden.

¶ Eynde des tweeden Boecx Mose.