Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxix. Capittel.

¶ Vande Priesterlijcke cleederen, hoe die ghemaect werden.

1

⁺ MAer vander gheelder siden, schaerlaken ende rosetroot^* maecten sy Aarons Officie cleederen, om te dienen int Heylichdom, so de HEERE Mose geboden hadde.

+ A vers 1

* Exod. 28.a.2.

2

Ende hy maecte den lijfrock van goude, gheelder siden, schaerlaken, rosetroot, ende getwernder witter siden.

3

Ende sloech dat gout, ende sneet in draeyen, datment constelijck wercken conde, onder de gheel side, schaerlaken, rosetroot, ende witte side.

4

Ende maecte datmen den Lijfrock op beyde schouderen te samen voechde, ende aen beyde sijden te samen bonde.

5

Ende zijnen gordel was na der seluer const ende werck, van goude, gheelder siden, schaerlaken, rosetroot, ende getwernder witter siden, so de HEEre Mose geboden hadde.

6

Ende sy maecten twee Onix steenen, rontom in gout beslaghen, ende daer inne ghegrauen de namen der kinderen Israels vanden steensnijders.

7

Ende hechtense op de schouderen vanden lijfroc, dattet den kinderen Israels steenen der ghedachtenissen zijn souden, so de HEEre Mosi geboden hadde:

8

⁺ Ende sy maecten den Borstlap nae der const, ende na den wercke des Lijfrocs, van goude, gheelder siden, schaerlaken, rosetroot, ende getwernder witter siden,

+ B vers 8

9

Also dat hy viercant ende dubbel was, een hant lanck, ende breet,

10

Ende vuldenen met vier rijen van steenen. De eerste rije was een Sardus, Topasion, ende Smaragdus.

11

De ander was een Robijn, Saphier, ende Diamant.

12

De derde een Lincurius, Achates, ende Amethistus.

13

De vierde een Torkoys, Onix ende Iaspis. Ende sy waren in de rijen al in gout beslaghen, rontsom.

14

Ende de steenen stonden na de twelf namen der kinderen Israels. In elcken eenen naem ghegrauen vanden steensnijders, na den twelf stammen.

15

⁺ Ende sy maecten aenden borstlap ketenen met twee eynden van louteren goude,

+ C vers 15

16

Ende twee gulden spangen, ende twee gulden ringhen, ende hechteden de twee ringhen op de twee hoecken des Borstlaps.

17

Ende de twee gulden ketenen, toghen sy in de twee ringen, op de hoecken des Borstlaps.

18

Maer de twee eynden der ketenen, maecten sy aen de twee spanghen, ende hechtense aen de hoecken des Lijfrocx, teghen malcanderen ouer.

19

Ende sy maecten twee ander gulden ringhen, ende hechtense aen de twee ander hoecken des Borstlaps, aen zijnen rant, dat hy hem fijn schicte opten Lijfrock.

20

Ende sy maecten twee ander gulden ringen, die maectense op de twee hoecken, beneden aen den Lijfrock, teghen malcanderen ouer,

21

Daer den Lijfrock onder te samen gaet, dat den Borstlap met zijnen ringhen, aen de ringhen des Lijfrocs gheknoopt wert met eenen gheelen snoere, dat hy opten Lijfrock vast sate, ende niet los en werde vanden Lijfrock, so de HEEre Mosi gheboden hadde.

22

⁺ Ende hy maecte den siden Rock totten Lijfrock, ghewrocht, heel van gheelder siden,

+ D vers 22

23

Ende dat hol midden bouen in, ende om dat hol eenen boort, om dattet niet schueren en soude.

24

Ende sy maecten aen zijnen Soom granaetappelen van gheelder siden, schaerlaken, rosetroot, ende ghetwernder witter siden.

25

Ende sy maecten bellen van louteren goude, die deden sy tusscen de granaetappels,

26

Rontomme aen den soom des sijden Rocks, te weten, eenen granaetappel, ende een belle, so al rontsomme aenden soom, om daer in te dienen, so de HEEre Mosi gheboden hadde.

27

⁺ Ende sy maecten oock den engen Roc van witter siden gewrocht, voor Aaron ende voor zijne sonen,

+ E vers 27

28

Ende den hoet van witter siden, ende de schoone huyuen van witter siden, ende de broecken van witten getwernden lijnwade,

29

Ende den gesticten gordel van ghetwernder witter siden, geelder siden, scharlaken, rosetroot, soo de HEEre Mosi beuolen hadde.

30

Sy maecten op de voorhooftplate, namelijck, de heylige Croone van louteren goude, ende sy groeuen geschrift daer in. DE HEILICHEIT DES HEEREN.

31

Ende bonden een gheel snoer daer aen, datse van bouen aenden hoet ghehecht werdt, alsoo de HEEre Mosi gheboden hadde.

32

⁺ Also wert volbracht dat gantsche werc der Wooninghe der Hutten des getuychenis. Ende de kinderen Israels deden al wat de HEERE Mosi gheboden hadde,

+ F vers 32

33

Ende brochten de Wooninge tot Mose, de Hutte, ende alle haer ghereetschap, Ringhen, Berderen, Rijchelen, Columnen, Voeten.

34

Dat decksel vanden rootachtigen Rams vellen, dat decsel vanden Dasch vellen, ende dat Voorhancsel.

35

De Arcke des ghetuychenis, met haren Hantboomen, den Ghenadenstoel.

36

De Tafel met alle haer ghereetschap, ende de Thoonbrooden.

37

Den Candelaer metten Lampen toebereyt, ende alle zijn gereetschap, ende Olie totten Lichte.

38

Den schoonen gulden Altaer, ende salue, ende goet

[p. 36v]

rueckwerck, dat Laken in de duere der Hutten.

39

Den metalen Altaer, ende zijn metalen tralen, met zijnen hantboomen ende alle zijn gereetschap.

40

Dat Hantuat met zijne voeten. Dat omhancsel des Voorhofs, met zijnen Columnen ende voeten. Dat Laken in de poorte des Voorhofs, met zijnen zeelen ende nagelen. Ende alle zijn ghereetschap, tot den dienste der Wooninge der Hutten des getuychenis.

41

Aarons des Priesters officie cleederen, om int Heylichdom te dienen, ende oock zijnder sonen cleederen, dat sy Priesters officie deden.

42

De kinderen Israels dedent altemael, alsoot de HEEre Mosi beuolen hadde in alle desen dienste.

43

Ende Mose aensach alle dit werc dat zijt ghemaect hadden, so de HEEre gheboden had. Ende ghebenedijdese.