Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxviij. Capittel.

¶ Vanden Brantoffer Altaer, ende met zijnder toebehoorte.

1

⁺ ENde hy maeckte den Brantoffers^* Altaer van vueren houte, vijf ellen lanck ende breet, gelijck viercant, ende drie ellen hooch.

+ A vers 1

* Exod. 27.a.1. 2.Para. 1.a.5.

2

Ende hy maecte vier Hoornen, die wt hem ghingen, aen zijn vier hoecken, ende ouertrocse met metael.

3

Ende hy maecte alderley ghereetschap tot den Altaer, Aschpotten, Schuppen, Beckens, Crauwels, Vierpannen, ende al van metalen.

4

Ende hy maecte aenden Altaer een tralie, ghelijck een Net, van metale rontom van onder op tot aen de middele des Altaers,

5

Ende hy goot vier Ringhen aen de vier hoecken der metalen tralien, tot den hantboomen.

6

Die selue maecte hy van vueren houte, ende ouertrockse met metael,

7

Ende stacse in de Ringen, aen de siden des Altaers, datmen hem daer mede droege, ende hy maecte hem inwendich hol.

8

⁺ Ende hy maecte dat hantvat van metael, ende zijnen voet oock van metael, teghen de Vrouwen, die voor de duere der Hutten des getuychenis, dienden.

+ B vers 8

9

Ende hy maecte den Voorhof tegent Suyden, met een omhancsel, hondert ellen lanck,

10

Van ghetwernder witter siden, met haren twintich Columnen, ende twintich voeten van metale: Maer haer knoopen ende Reepen van siluer.

11

Des selfs ghelijcken teghent Noorden, hondert ellen, met twintich Columnen ende twintich voeten van metael: Maer haer knoopen ende reepen van siluer.

12

Maer teghent Westen, vijftich ellen met thien Columnen, ende thien voeten: Maer haer knoopen ende reepen van siluer.

13

Teghent Oosten vijftich ellen,

14

Vijfthien ellen op elcke side der poorten aenden Voorhof, te weten, met drie Columnen, ende drie voeten,

15

Dat alle de omhanckselen des voorhofs waren van witter ghetwernder siden,

16

Ende de voeten der Columnen van metael, ende haer knoopen ende reepen van siluer, also dat haer knoopen ouertrocken waren met siluer,

17

Maer haer Reepen waren silueren, aen alle de Columnen des voorhofs.

18

⁺ Ende dat Laken in de poorte des voorhofs maecte hy ghestict, van geelder siden, schaerlaken, rosetroot, ende ghetwernder witter siden, twintich ellen lanck, ende vijf ellen hooge, na de mate des omhancksels des voorhofs.

+ C vers 18

19

Daer toe vier Columnen, ende vier voeten van metale, ende haer knoopen van siluer, ende haer knoopen ouertrocken, ende haer reepen silueren.

20

Ende alle de nagelen der Wooningen ende des voorhofs rontom, waren van metael.

21

Dat is nv de somme totter Wooninge des ghetuychenis, die vertelt is, soo Mose geseyt heeft, tot den Godts dienst der Leuiten, onder de hant Ithamar, Aarons des Priesters soons,

22

Die Bezaleel de soon Vrijs des Hurs soon vanden stamme Iuda maecte. Alle dinc also de HEEre Mose geboden hadde.

23

Ende met hem Ahaliab de Soon Ahisamach vanden stamme Dan, een Meester van snijden, van te wercken, ende te sticken met gheelder siden, schaerlaken, rosetroot, ende witter siden.

24

⁺ Alle dat gout, dat daer verarbeyt is in alle desen wercke des Heylichdoms, dat totter Beweghinge ghegheuen wert, is negenentwintich Talenten, seuenhondert ende dertich Sikel, naden Sikel des Heylichdoms.

+ D vers 24

25

^* Maer dat ghetal des siluers dat vander Menichten quam, was hondert Talenten, duysent seuenhondert ende vijfentseuentich Sikels, na den Sikel des Heylichdoms.

* Exod. 30.b.13.

26

Soo menich hooft alsoo menighen haluen Sikel, na den Sikel des Heylichdoms, van allen die getelt werden van twintich iaren aen, ende daer ouer. Ses hondertmael duysent, drie duysent, vijf hondert ende vijftich.

[p. 36r]

27

Van de hondert talenten siluers gootmen de voeten des Heylichdoms, ende de voeten des voorhancsels, hondert voeten van hondert talenten, namelijck, een talent tot eenen voete.

28

Maer van de duysent, seuenhondert ende vijfentseuentich Sikels werden gemaect der Columnen knoopen, ende haer knoopen ouertrocken ende haer Reepen.

29

Mer de Beweginge des metaels was tseuentich Talenten, twee duysent ende vierhondert Sikels,

30

Daer af werden ghemaect de voeten in de duere der Hutten des ghetuychenis. Ende den metalen Altaer, ende de metalen tralie daer aen, ende alle de ghereetschap des Altaers,

31

Ende oock de voeten des voorhofs rontom, ende de voeten der poorten des voorhofs, ende alle de naghelen der Wooninghe, ende alle de naghelen des voorhofs rontsom.